كفتة ارز بيتى

آخر تحديث : 15-11-2017 الساعة 03:10 م

اليكم طريقة عمل كفتة الارز فى البيت – باللحم مفروم بدلا من اللحم الجملى

الكفتة دى اقتصادية وموفرة جدا – لان دى كمية حتدينا 2100جم كفتة تكفى لعمل 24 وجبة لفرد واحد – او 6 وجبات ل4 افراد – نقدر نقسمها فى اكياس ونحفظها فى الفريزر للمرات القادمة

المقادير

  • كيلو لحمة مفرومة
  • نصف كيلو بصل
  • نصف كيلو ارز نى ناشف
  • 100جم خضرة مفرية (بقدونس – كزبرة – شبت)
  • معلقة كبيرة ثوم مهروس
  • ملح وروزمارى مطحون وملح صينى
  • ذرة ورق لورا مطحون وذرة قرفة
  • بيضة
  • 6 معالق زيت

الطريقة

  • نقشر البصل ونخرطه ونقطع البقدونس قطع صغيرة ونضربهم قليلا نبضات مع الثوم والتوابل فى الكبة – عايزينهم فتافيت صغيرة لكن مش عصير
  • نطحن الارز ناشف كما هو – بدون غسيل – فى مطحنة التوابل 3 دقائق حتى يصبح ناعما
  • نضع الكل فى طبق واسع ونعجنهم باليد جيدا حتى يختلط كل الرز تماما مع الخلطة
  • نضع الطبق فى الثلاجة لمدة ساعة على الاقل حتى تتماسك الخلطة
  • نقسم الكمية فى اكياس – وزن الكفتة كلها بيبقى 2100جم – لو قسمناه على 3 اكياس حيبقى وزن الكيس 700جم يكفى 4 افراد لمدة يومين – نعمل جزء النهاردة وجزئين نشيلهم فى كيسين فى الفريزر
  • نشكل الخلطة صوابع فى ايدنا ونرصها فى صينية ونشيلها فى الفريزر نصف ساعة عشان تتماسك
  • نسخن الزيت فى طاسة
  • نسقط فى الزيت الساخن كمية مناسبة لحجم الطاسة
  • 7 دقائق فقط فى الزيت مع قلبها فى نصف الوقت (لو قعدت اكتر من كدة عصارة اللحمة حتتسرب منها وتفقد البهريز بتاعها فى الزيت فتقل طعامتها) ثم نخرجها من الطاسة ونتركها حتى تبرد
  • ممكن لو نحب نضيف بطاطس لصلصة الكفتة نحضرها باننا تغسلها ونقشرها ونقطعها مكعبات

الصلصة

  • نخرط بصل مقطع صغير وفلفلاية رومى وقرن فلفل او نضربهم فى الكبة نبضات قصيرة
  • نشوحهم مع مكعبات البطاطس فى حلة مع الزيت المتبقى من تحمير الكفتة – حتى يذبل البصل – حوالى دقيقتين على نار عالية مع التقليب
  • نصب عليهم كيلو عصير طماطم مضروب فى الخلاط مع ثلث برطمان صلصة طماطم (او البرطمان كله + ملو البرطمان 4 مرات ماء لو كانت الطماطم غالية)
  • نقلب فى الحلة ثوم مفروم وروزمارى مطحون وذرة ورق لورا مطحون وذرة كبابة صينى وملح حسب المذاق المرغوب
  • بعد خمس دقائق نحط الكفتة فى الصلصة ونقلب
    • ممكن نترك نصف كمية الكفتة بدون صلصة للى بيحبها كدة (بتبقى جميلة جدا بدون صلصة على فكرة – عندهم حق اللى بيحبوها كدة محمرة برة الصلصة – يعنى ممكن نقدم الكفتة محمرة فى طبق لوحده – والصلصة لوحدها نحطها على الرز اثناء التقديم – ولادى بيحبوها كدة اكتر)
  • نغطيها على نار هادية جدا جدا حتى تمام النضج – لمدة 20 دقيقة – ونراعى اننا فى نصف الوقت نقلبها ولو شربت صلصتها نضيف بعض الماء حتى لا يحترق القعر – الصلصة المفروض تكون ثقيلة فمنزودش ماء كثير المهم النار تكون ضعيفة جدا شمعة – زى ما بنسوى الرز بالظبط
  • لو حناكلها مع مكرونة نخفف الصلصة بملو برطمان ماء مرتين كمان
  • بعد ما نطفى النار نترك الحلة متغطية 10 دقائق كمان لاكمال التسوية

اقترح عليكم تقديمها مع مكرونة بالثوم والزيت و خيار مخلل او كرنب مخلل

وبالف هنا وشفا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *