البرامج التعليمية الجديدة – مهازل بديكورات شيك

آخر تحديث : 21-09-2010 الساعة 12:49 م

كلنا فرحنا لما الوزير قال حنعمل برامج تعليمية جديدة ومتطورة وعلى أحدث مستوى – وإنه وفر لها كل الإمكانيات التكنولوجية الحديثة الوسائل التعليمية المتطورة .. لكن ..
إتضح إن التجديد الوحيد كان فى الديكور … هيييييييييييه

مكاتب زجاج وديكورات ولا كوشة العروسة وشاشات عريضة خلف المدرس ولاب توب أمامه وداتا شو بجواره – جميل – طب وبعدين؟
نفس المدرسين بأخطائهم اللغوية وعيوبهم الخلقية فى النطق والبلاهة والزهولة أمام الكاميرا – ونفس السهو والنسيان وكإن المدرسين بيحبوا وللا إيه مش عارف – واحد باصص فى الأرض – وواحد بيبرق لنا – وواحدة خايفة ومتلجلجة – وأخرى ضاربة بوز كإنها جاية من خناقة
وبعدين ليه كلهم قاعدين والكاميرا مركزة على طول على وجوههم السمحة؟ هو إحنا حنتفرج على نشرة أخبار؟ ياعالم فوقوا بقى – الأجهزة اللى إتهببوا وجابوهالكوا دى عملتوا بيها إيه
برضة عم حسن بتاع الشاى هو هو اللى شايل الليلة كلها – والأخطاء فظيعة وكالسيل المنهمر – ولا فيه ذوق بالإعتذار عن أى خطأ
جايبين عيال مش عارفة إنجليزى هما اللى بيشرحوا لنا الكلمات – وهما مش عارفين ينطقوا
والمذيعة قاعدة فى كازينو وساحبة طالب معاها – هى تسأله – وهو يجاوب غلط – فتروح منشكحة قوى وتقول له برافو – يالهوى – أنا مخى حينفجر من التخلف اللى أنا بشوفه – لو تابعتوا المدرسة دى حلقتين تلاتة حتنسوا شوية الإنجليزى اللى عندكم على إيديها الكريمة

فين الوزير؟ فين المسئولين؟ إيه اللى بيحصل فى البلد دى؟ هما قفلوا وللا إيه؟ الدنيا بتضلم كدة ليه كل يوم أكثر؟ دة كدة خلاص حيجيبوا ضرفها

وزير التعليم والإعلام دول لازم حد يكلمهم ياجماعة – دول حيخربوا أجيال كاملة وممكن يخرجوا عاهات مش خريجين
لاجول ولا قوة إللا بالله – أنا أنصحكم جميعا بمقاطعة البرامج التغليمية المتخلفة دى
والحمد لله يوجد دلوقتى بديل رائع – أحسن من كل البرامج التعليمية وأحسن من أى درس خصوصى
الخل السحرى مجانى ولا يكلف شيئا – وهو إسطوانات بها مناهج الوزارة من إنتاج مركز التطوير التكنولوجى التابع للوزارة
بس للأسف لسة ماعملوش إسطوانات لكل المناهج – وفيه سنوات حظها أحسن من سنوات أخرى
التفاصيل و روابط التنزيل تجدوها هنا و هنا

شارك هذا الموضوع
error

18 تعليق

  1. كلمة حق
    لا أتفق معك
    البرامج الجديدة فعلا مختلفة
    أتكلم عن المرحلة الابتدائية
    مادة دسمة و شرح و تدريبات لمدة ساعة

    كما أن شرح بعض المواد كاللغة العربية للثالث الابتدائي
    تستخدم فيه الاسطوانات المرفوعة الآن على موقع الوزارة

    • معذرة لا أتفق معك في كل ما قلته
      فهناك برامج جديدة جيدة وليست بهذا السوء الذي تتحدث عنه
      أنا أتكلم عن المرحلة الثانوية
      وشكراً لكم

  2. ههههههههههههههههههه بالله عليك انت عجبك البرامج طب اعد انت اودمها كدة واتحداك لو فهمت حرررررررررف حسبى الله ونعم الوكييييييييييييييييييييييييييييييييييييييل

  3. أنتم تريدون المعلومات جاهزة و الأسئلة جاهزة وكل شئ على طبق من ذهب
    نعم لماذا لا أستفيد منها؟؟
    فالبرامج الجديدة التي اسمها ( في بيتنا مدرسة )برامج ممتازة
    فهل هي بكل هذا السوء الذي تصفه أنت ؟؟
    اتق الله… اتق الله… اتق الله

    • حرام عليك الراجل كلامة مش كلة غلط هو عندة حق بردة فى جزء من كلامه

  4. كلامةصح:1)جداول البرامج نازلة غلط
    2)المشكلة بعض البرامج مجرد مدرس بيقرأ من ورق ادامه و مفيش شرح
    كلامةغلط:1)ان المدرسين مش بالسوء دة و في بعض المدرسين كويسين

  5. لو حد تابع قناة تعليمية 3 من 8ص الى 10ص اليوم – درس اللغة العربية لأولى إعدادى عادوه هو نفسه 3 مرات – نفس التسجيل نفس الدرس نفس الكلام بالحرف – 3 مرات خلال ساعتين – ولا رقيب ولاحسيب ولامتابع من جهاز التليفزيون ولاوزارة التعليم ولا وزارة الإعلام – بينما البرامج المقرر بثها لايلتزموا ببثها فى مواعيدها أصلا

    ومازال التليفزيون يعتمد إعتمادا كليا فى تشغيل البرامج وتوقيتات العرض وتشغيل كل الأجهزة و الأستوديوهات الحديثة على عم إبراهيم بتاع الشاى – وقد إقترحنا عليهم تعيين بتاع شاى إضافى لمساعدته لكن لم يستمع إلينا أحد – ومازال عم حسن لوحده المكلف بعمل كل شيئ فى تليفزيون جمهورية مصر العربية – من الألف الى الياء – بالإضافة الى وظيفته الأساسية التى يتوقع أن تزيد أعباءها فى فصل الشتاء مع تزايد طلبات الشاى الذى يطلبه المسئولين أكثر فى ايام البرد

    • كلامك صحيح 100 % أستاذ / محمد
      وليس فقط درس اللغة العربية لأولى إعدادى (قناة تعليمية 3)
      بل غيره وغيره وعلى سبيل المثال لا الحصر
      درس الأحياء للثانوية العامة على القناة التعليمية4
      لم يُعرض منه إلا 3 حصص فقط حتى الآن ونحن في الاسبوع الرابع من بداية البرامج

  6. انت كلامك مية مية ياعمو انا مش عارفة برامج تعليمية اية اللى واجعين دماغنا بيها هو احنا بنفهم

  7. بلا خيبه وزير تعليم فاشل ربنا يخده حسبن اله ونعم الوكيل

  8. حرام عليك يا محمد علشان البرامج ساعدنا شويه انا عن نفسى مبسوطه

    وبذاكر فى البيت

  9. كثير من مقدمى البرامج التعليمية عندما يتحدثون باللغة الإنجليزية – سواءاً دروس اللغة الإنجليزية أو science أو math يشوهون اللغة بطريقة نطقهم العجيبة – وأخشى أن تتربى أجيال كاملة من أبناءنا معتقدين أن هذا العجب العجاب الذى ينطق به السادة المدرسين هو لغة إنجليزية

    ألا يوجد فيك ياتليفزيون مصر شخص واحد يوقف هذا الهزل والجهل بأبسط قواعد النطق؟
    ناهيك عن أخطاء بالجملة فى ال spelling وبالبنط العريض وفى العناوين نفسها – والمدرس يفتقد للأمانة العلمية ولايصحح للطلبة مايروه على الشاشة من أخطاء فادحة جامحة فاضحة – وإنما يكمل القراءة وكأنه فى كوكب آخر لايكلف نفسه حتى النظر فى ما هو معروض على الشاشة أمامه

    حتى الآن البرامج التعليمية عبارة عن مهازل تنم عن جهل وتخلف منقطع النظير – وهى فى مجملها مجرد سرد لنصوص الدروس كما هى – أعرف أن البعض لايتفق معى فى نقدى لتلك البرامج – ولكن لو شاهدتم كيف تصنع البرامج التعليمية فى الدول الأخرى لعرفتم الفرق الشاسع بين عقول تفكر وتبدع وتعرف كيف توظف الوسائل التعليمية الحديثة وخلفها جيوش من الفنيين والمصممين والمبرمجين – وبين جهاز تليفزيون قومى يعتمد فقط على عم حسن بتاع الشاى وبعض الوجوه العجيبة التى تملأ الشاشة طوال الوقت وكأننا فى حصص تشريح لملامح المدرسين وتفاصيل وجوهم السمحة وأفواههم التى لاتستطيع أن تنطق كلمة إنجليزية واحدة نطقاً سليماً – بينما أولادنا مستسلمين تماماً لما يسمعوه ظانين أنهم ينهلون العلم من منابعه السليمة ياولداه

    محمد على عندما أراد تأسيس نهضة حديثة فى مصر قام بإرسال عمال وصنايعية لأوربا لكى يتعلموا وينقلوا لمصر أحدث الإبتكارات – الآن لدينا أعداد هائلة من المصريين يعيشون بيننا من الذين ولدوا ودرسوا منذ طفولتهم فى أمريكا – وآلاف ممن درسوا طوال حياتهم فى مدارس أجنبية وجامعات أمريكية وإنجليزية – لماذا لايستعين التليفزيون بهؤلاء؟ لا أحد يفكر فى الإستفادة منهم فى تعليم الأجيال القادمة – ولانعرف من أين يأتون لنا بتلك الوجوه التى نراها فى القنوات التعليمية – هل المحسوبية والواسطة دخلت أيضا فى البرامج التعليمية؟ أين الكفاءات المصرية الشامخة؟ لماذا الإصرار على إخراج أجيال كاملة تجهل الطريقة الصحيحة للنطق والثقافة والعلم؟

  10. انا اتفق مع كاتب الموضوع

    انا بجد مش عارفة اعبر عن مدى الارف

    والتناحة الى هما فيها انا

    فى لغات

    بتفرج عليهم عشان اضحك بس

    على طريقة نطقهم

Comments are closed.