آخر تحديث : 19-11-2018 الساعة 01:59 م

اقدم لكم اسهل واطعم عيش توست ممكن تعملوه فى البيت بمنتهى السهولة – حنستخدم خميرة الخباز – تباع فى أى فرن – وحنستخدم ردة حتى تكتمل الفائدة الصحية – لكن فى حالة عدم وجود ردة نستبدلها بنفس وزنها دقيق

المقادير

• 1جم خميرة خباز
• 900جم ماء
• 850جم دقيق
• 150جم ردة ناعمة (اذا لم تتوفر ردة نضع 150جم دقيق بدلا منها)

الطريقة

• نذيب قطعة الخميرة فى كوب صغير مع قيل من ماء العجن باستخدام معلقة صغيرة – ثم نضعها فى طبق العجن
• نصب باقى ماء العجن ونقلب
• نضيف الدقيق والملح ونقلب الكل كويس بعصاية خشب او ايد معلقة خشب حتى يمتزج كل الدقيق بالماء
• نغطى العجينة ونتركها على المطبخ 20 دقيقة
• نكرر التقليب مرة ثانية ثم نغطيها ونتركها 20 دقيقة اخرى
• نقلب مرة ثالثة ثم نصب العجينة فى 3 قوالب عيش توست او صينية كبيرة بس تكون جوانبها عالية – انا باستخدم صينية 30سم×22سم وارتفاعها اجنابها 6.5سم
• الصوانى الالومنيوم تعطى نتائج ممتازة – لكن حتى لا يلتصق بها العيش علينا اتباع الاتى قبل استخدام الصينية أول مرة فقط لتحويلها الى صينية لا يلتصق بها الطعام كالتيفال تماما:
  • ندهن الصينية من الداخل بقليل من الزيت باستخدام فرشة
  • نضع الصينية على نار بوتاجاز عالية حتى يبدأ الزيت اخراج دخان ابيض
  • نعرض كل جوانب الصينية للنار بنفس الطريقة حتى يدخن الزيت من كل الجوانب
  • نطفئ النار ونصب الزيت فى بلاعة الحوض ونترك الصينية حتى تبرد تماما
  • بذلك تكون الصينية قد تغطت بطبقة ملساء من الزيت وتصبح كالتيفال غير قابلة للالتصاق
  • بعد استخدام الصينية لا نغسلها بالصابون – اذا احتجنا الى غسلها نغسلها فقط بالماء حتى لا نفقد طبقة الزيت الملساء
  • اذا لم نستخدمها فترة طويلة قد يصبح للزيت رائحة غير لطيفة – فى هذه الحالة نغسلها بالصابون ونكرر الخطوات السابقة من البداية مرة أخرى

• نضع القوالب فى فرن البوتاجاز ونقفل الباب ونتركهم لغاية ما يصلوا الى ضعف ارتفاعهم (حوالى 6-8 ساعات)

• نشعل الفرن على درجة 180 لمدة ساعة
• نخرج العيش من القوالب ونضعه على ظهره على شبكة تهوية
• نخبط بصوابعنا على قعر العيش – لو بيخبط زى مانكون بنخبط على خشب يبقى استوى – اما لو لقينا القعر طرى نضعه فى الفرن بدون القوالب لمدة 5-7 دقائق
• لو لقينا العيش لازق نغطيه بفوطة نصف ساعة ليسهل اخراجه
• عندما يبرد تماما نضعه فى اكياس فى الثلاجة
• فى اليوم التالى نقطعه شرائح ليسهل تقطيعه

بعد ما تجربوا العيش دة مش حتشتروا عيش تانى من اى فرن – كفاية بس ريحته اللى تجنن وبتملا الشقة كلها – ريحة ملهاش حل فى جمالها

وشرائح العيش حتلاقوها طرية وجميلة فى عمل السندوتشات او فى الغموس – وكمان العيش دة موفر جدا – ارخص 4 مرات على الاقل من الجاهز

طريقة حفظ خميرة الخباز وتقسيمها

اليكم طريقة سهلة لحفظ خميرة الخباز وتقسيمها

• خميرة الخباز اللى اشتريناها ممكن نقسمها ونحطها فى أكياس بلاستيك – كل كيس 100جم
• نفرد الكيس على رخامة المطبخ – ثم نضغط بايدينا على الكيس بحيث نفرد الخميرة ونبططها لغاية ما تتحول الى شريحة رقيقة مستطيلة تملأ معظم الكيس – زى اكياس الملوخية المجمدة لكن ارفع
• باستخدام ظهر سكينة طويلة او مسطرة نضغط لعمل خطوط غائرة فى الخميرة وهى فى الكيس كما هى – بحيث نعمل خطوط طولية وعرضية تقسم الخميرة الى مربعات صغيرة وهى داخل الكيس – فمثلا اذا وضعنا 100جم خميرة نقسم الخميرة الى 10 خطوط طولية و10 خطوط عرضية فنحصل على 100 قطعة وزن الواحدة 1جم
• نضع الكيس مفرود فى الفريزر ليتجمد
• بعد يومين نمسك الكيس ونكسر المربعات المجمدة من عند الخطوط الطولية والعرضية لنفصلهم عن بعض – ثم نضعهم فى برطمان او علبة بلاستيك
• بتعيش فى الفريزر سنة وممكن اكتر – قالب الخميرة وزن نصف كيلو او 400جم سعره فى الفرن من 5 الى 7 جنيه – بعد تقسيمه وحفظه فى الفريزر نقدر نخبز بيهم 400 او 500 مرة – كل مرة كيلو دقيق

وبالف هنا وشفا