آخر تحديث : 10-04-2015 الساعة 04:22 م
اليكم طريقة سهلة لتشكيل عجينة البيتزا قبل وضعها على قاعدة البيتزا
اليوم حنتعلم ازاى نشكل البيتزا يدويا – نبدأ بالادوات:
- قطاعة عجينة بلاستيك او معدن
- صحن تعفير مكون من خليط من الدقيق وسميد البسبوسة بنسبة متساوية 50/50
- شبكة بيتزا X-Disc (مش عارف بتتباع فين فى مصر – حد يعرف؟)
- وطبعا كرات العجينة
الخطوات
- حنبدأ برش قليل من الدقيق من الصحن على وش العجينة – وبعدين نزحلق قطاعة العجينة عشان نسلكها نرفعها عليها
- نحط كرة العجين فى صحن التعفير ونقلبها فيه وش وظهر
- ننقل العجينة الى الرخامة – واذا وجدنا اى ثقوب فى ظهر العجينة نقفلها بقرصها بصوابعنا وبعدين نحطها بنفس وضعها اللى كانت علية فى وعاء التخمير (لاحظ ان وشها لما ننقلها على الشبكة حيبقى لتحت وقعرها هو اللى حيبقى لفوق)
- نرش قليل من الخليط الدقيق على وش العجينة – ونمسح على العجينة بايدنا لتوزيع الدقيق عليها
- نضع صوابع ايدينا الاثنين فوق بعض ونضغط بيهم على طروف العجينة لتكوين شفة – حنلاحظ لما نضغط على طروف العجينة انها بتترفع لأعلى – وبنفس الاصابع نلف العجينة عشان نكرر حتى نكمل الدائرة
- نبدأ بنفس حركة الاصابع فى الضغط من داخل القرص الى خارجه – متجنبين مركز القرص – ونعمل على ان ضغط اصابعنا يكون خفيف قرب المركز وأقوى بالتدريج كلما اقتربنا من الطروف – الفكرة اننا عايزين مركز القرص سميك عشان لما نشد العجينة لفردها يبقى عندنا سمك فى السنتر يتحمل لسحب للخارج
- نقلب القرص على ظهره ونبدأ خطوة شد الطروف – وذك بأن نضع صوابع وبطن ايدينا مفرودة فى المكان اللى قبل الطرف مباشرة – ونبدأ بالايد اليمين نشد الغجينة يمين بينما الايد الثانية بتقوم بوطيفتين – فهى مرتكزة على القرص عشان ما يتحركش واحنا بنسحب بالايد التانية – وكل ما نشد جزء الايد التانية تلف القرص عشان تجيب لليد اليمين جزء جديد تشده – وهكذا
- وبعدين نأتى لخطوة hand slapping وهى كالاتى: نحط دراعنا فوق قرص البيتزا عند منتصفه وباصابع ايدنا الثانية طرف القرص ونرميه على دراعنا – ونبدأ ننقل القرص من دراع لدراع ونكرر حتى ينفرد القرص ويصبح مماثل او أكثر قليلا من مقاس الشبكة
- نفرد القرص عى الشبكة – ولو لقيناه أصغر ناخده على دراعنا تانى ونكرر – اما لو لقيناه اكبر نرفع الشبكة ونلقيها على الرخامة حنلاقى العجينة تنكمش قليلا ونكرر اذا لزم الامر حتى يصبح قطر القرص مطابق لمقاس الشبكة
اليكم فيديو جميل جدا يشرح كل نلك الخطوات بمنتهى الاتقان