أحلى ماركة معجون صلصة طماطم فى مصر

آخر تحديث : 28-05-2016 الساعة 12:12 م

أحلى نوع صلصة طماطم جربتها فى مصر هى ماركة اسمها جاردينو Giardino هايلة فى عمل البيتزا لان طعمها فيه مزازة بتعطى البيتزا نفس نكهة الجاهز وأحلى – مش باحتاج لها اى اضافات – اللهم سوى معلقتين ماء ورشة زعتر اخضر – تفاصيل طريقتى لعمل البيتزا تجدونها هنا

تباع فى برطمانات 320جم (تركيز 20-22%) وسعرها وقت الكتابة 3ج وأحيانا فى العروض 2.50ج فقط (يوجد منها تركيز أعلى 26-28% فى علب صفيح 400جم و 800جم  بس ما جربتهومش)

تتميز بطعم الطماطم الطبيعى ولونها أحمر جميل – هى خفيفة شوية – ماركة زى وادى فود أتقل منها لكن وادى فود للأسف بها شئ من المرارة – الظاهر بيسخنوها زيادة عن اللزوم عشان تتقل لذلك تلاقيها غامقة ولونها بيترك لمسة مرارة فى الفم – فتفسد طعم الاكل – وخصوصا البيتزا – بينما صلصة جاردينو خالية من أى مرارة – تستخدم زى ماهى من البرطمان بتدى طعم رووووعة للبيتزا لا يتفوق عليه الا طعم البيتزا الشهيرة فى شوارع نيويورك

صلصة جاردينو من انتاج شركة الصعيد لصناعة المركزات والعصائر (جاردينو اليكس) هنا موقعها وهنا صفحتهم على الفيسبوك

عشان نختبر أى نوع معجون صلصة طماطم نفتح البرطمان ونتذوق حتة صغيرة على طرف معلقة – النوع الممتاز حتلاقيه بنفس طعم الطماطم الطبيعية – حلو وفى نفس الوقت مزز – ودة معناه ان الطماطم اللى المصنع بيستخدمها نوع جيد وانه بيستخدم أجهزة تبخير وضغط حديثة لتكثيف الصلصة بدون ما تفضل تغلى فترات طويلة لان دة اللى بيسبب زيادة الحموضة وطعم محروق شوية ويفقدها الطعامة الطبيعية للطماطم – أما المصانع الحديثة فبتكون قادرة على انتاج صلصة محتفظة بنفس الخواص الطبيعية والطعم اللذيذ للطماطم الطازجة – وهذا مايميز صلصة جاردينو الحقيقة – ربما يكون هناك ماركات مصرية أخرى بنفس الجودة – لكن حتى الان ومن تجاربى الشخصية لم أعثر بعد على أى نوع يمكن مقارنته بهذه الصلصة الرائعة

انتوا ايه رأيكم؟ ايه ماركة الصلصة اللى جربتوها وعجبتكم أكتر حاجة؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.