آخر تحديث : 07-08-2017 الساعة 08:59 م

لو عندك كاميرا ديجيتال يبقى انت عندك كل ما تحتاجه لعمل صور لمدارس الولاد والشهادات والكارنيهات وجوازات السفر – تستطيع أن تحصل على 9 صور شخصية ب1 او 2 جنيه  – بدلا من الذهاب الى استوديو تصوير يكلفك 40 جنيه وربما أكثر

تحتاج الى

• كاميرا ديجيتال
• برنامج Picasa المجانى
• برنامج xps2img المجانى

الخطوات

• التقط صورة لمن يحتاج صور شخصية – ويفضل ان تكون الخلفية بيضاء – كحائط ابيض مثلا – وخصوصا لو الصور حتقدمها لجهات رسمية
• انقل الصورة من الكاميرا الى الكمبيوتر او اللاب توب – من خلال كابل USB او اخرج كارت الذاكرة من الكاميرا وضعه فى قارئ الكروت فى اللاب توب او الكمبيوتر ثم انقل الصورة
• افتح برنامج بيكاسا واختار الصورة بالضغط عليها مرتين
• حتلاقى على شمالك فى بيكاسا ادوات تساعدك على تحسين الصورة
• اول حاجة دوس على زر Crop يعنى قص الزوائد – طريقته سهلة: دوس بالماوس واسحب عشان تعمل مستطيل حوالين الجزء اللى انت عاوزه من الصورة – حتلاقى الجزء اللى رسمت مستطيل حواليه منور وباقى الصورة مضلمة – الطروف المضلمة دى هى اللى حتتقص ويفضل بس الجزء المنور – ممكن تيجى بسهم الماوس عند أى ضلع من المستطيل وتسحبه لبرة أو لجوة عشان تظبط اللى انت عاوزه يفضل من الصورة – وبعد ما تكون راضى دوس على Apply
• بعد كدة للحصول على الوان واضاءة مثالية  دوس على زر I’m feeling Lucky – حتلاقى الصورة اتحسنت تلقائيا – – لو حسيت ان الاول كانت الصورة افضل دوس زر Undo I’m feeling lucky
• حرك مؤشر Fill Light عشان تزود الاضاءة خصوصا لو الصورة غامقة او مضلمة – وكمان عشان لو الخلفية بهتانة او رمادى تبقى الخلفية بيضاء وهو المطلوب من الجهات الرسمية
• بعد ما تخلص التعديلات دوس فوق على الزر الطويل Back to Library
• ثم اضغط من القائمة الرئيسية فوق على Tools ثم Experimental ثم Passport Photo
• دوس على ايقونة الاربع صور الاول – وبعدين دوس على ال9 صور
• دوس على Printer واختار Microsoft XPS Document Writer
• دوس على علامة + لغاية ما تملا الكارت بالصور – الكارت حياخد 9 صور
• دوس تحت على زر Print
• فى الشباك اللى حيتفتح لك اختار اسم لكارت الصور والمكان اللى عايز تحفظه فيه
• كدة بيكاسا حفظ لك كارت ال9 صور بصيغة XPS – خلاص كدة اقفل Picasa
• الخطوة الثانية اننا نحول الكارت من صيغة XPS الى صيغة PNG او JPEG اللى بتتعامل بيها محلات طباعة الصور زى كوداك اكسبريس مثلا
• افتح مجلد xps2img – ودوس على xps2imgUI
• دوس امام XPS File عشان تختار كارت ال9 صوراللى عملته
• دوس امام Output Folder عشان تختار المجلد اللى حيحفظ لك الكارت فيه بعد تحويله الى صيغة تفهمها محلات طبع الصور
• دوس امام Image Type واختار JPEG
• دوس امام JPEG Quality واختار 100
• دوس امام Image DPI واختار 600
• اترك باقى الاختيارات كما هى ودوس تحت على زر Convert
• خذ نسخة من ملف الصورة اللى اتعمل لك وحطه على فلاشة وتوجه الى أى محل طبع صور – مثلا كوداك اكسبريس – واطلب طبع نسخة واحدة من الصورة مقاس 13×18 (وليس 10×15) – سعرها تقريبا 2 جنيه – حتستلمها بعد ساعة – لكن لو المحل صغير ممكن يسلمها لك تانى يوم
• قص ال9 صور بالمقص فتصبح عندك 9 صور شخصية لم تكلفك سوى 2 جنيه فقط بدل ما كنت حتدفع 40 جنيه فى ستوديو التصوير
• ميزة أخرى جميلة فى الطريقة دى انك تقدر تاخد صور كتير لنفس الشخص – وبعد كدة تتفرج عليهم وكلهم وتختار احلى صورة للطباعة – اما فى الاستوديو فالصورة بتكون انت وحظك وما عندكش اختيارات