احمى ولادك من تضييع وقتهم على الموبايل

كثير من الاباء والامهات بيشتكوا من ان ولادهم مش بيسيبوا الموبايل من ايدهم – طول النهار فيس وواتس آب وتشات وفايبر – بدل ما يقعدوا يذاكروا ويستفيدوا من كل الوقت الضائع دة بسبب الموبايل والنت

عندى لكم حل بسيط – من خلال برنامج صغير تنزلوه على موبايل ولادكم – تقدروا تمنعوا عنهم كل الآبس/البرامج اللى بتضيع وقتهم طوال الاسبوع ماعدا يوم الاجازة – الجمعة او اليوم اللى هما يختاروه – تفتح لهم فيه البرامج كلها

الآب او البرنامج اسمه AppLock اضغط على الاسم أو الصورة لفتح صفحته على جوجل بلاى

انا جربت برامج كتير مشابهة لكن كلهم يقدر ابنك ببساطة انه يمسحهم من على الموبايل uninstall – وحتى لو البرنامج مصمم بحيث يمنع انه يتمسح – ممكن ابنك يدخل على جوجل بلاى ويدوس uninstall من هناك – أما البرنامج دة فهو لا يمكن مسحه الا باستخدام باسورد/كلمة سر انت اللى تحددها وانت بس اللى تعرفها – وتقدر تمنع ولادك حتى من فتح جوجل بلاى وبالتالى مفيش وسيلة انهم يمسحوا البرنامج لا من الموبايل ولا عن طريق جوج بلاى – ولا يقدروا ينزلوا أى آبس / برامج جديدة بدون موافقتك – وكمان تقدر تمنع ولادك من الدخول على اعدادت البرنامج نفسه – ومش حيقدروا يمسحوا أى برامج من على الموبايل

من خلال البرنامج تقدر تحدد كل البرامج اللى ولادك بيضيعوا وقتهم فيها وتعمل لها Lock قفل – كدة اى برنامج منهم لا يمكن يتفتح الا بالباسورد اللى انت حددتها فى البداية

تقدر كمان تخفى الايقونة بتاعة برنامج AppLock من على الموبايل خالص لزيادة الحماية – وبعدين لما تعوز تفتحه تقدر تكتب الباسورد فى التليفون كانك بتطلب نمرة عادية بس تكتب قبلها علامة الشباك # وبعدين تدوس على علامة السماعة عادى حتلاقى البرنامج فتح لك

وتقدر تعمل 2 بروفايل – واحد ليوم الاجازة والتانى لايام المذاكرة – وتسمى كل منهم بحيث فى يوم الاجازة تفعل بروفايل الاجازة وباقى الايام تتركه مفعل على البروفايل التانى

عشان تعمل بروفايل جديد: بعد ما تفتح البرنامج علم على كل البرامج اللى عايز تقفلها – وبعدين بص تحت حتلاقى 4 ايقونات – دوس على تانى ايقونة على اليمين (اللى شكل الهلال وجنبها علامة +) حتلاقيه كتب لك فوق: Save as new profile دوس على علامة الصح اللى جنبها واكتب الاسم اللى يعجبك

طبعا فى الحالتين لازم تمنع الدخول على جوجل بلاى وتمنع مسح البرامج – لكن فى بروفايل الاجازة افتح الفيس وكل البرامج اللى بيحبوها طبعا

ولو عايز تكافئ ولادك بعد مثلا ما سمعوا كلامك وذاكروا وعملوا الواجب – تقدر فى أى يوم تفعل بروفايل الاجازة لمدة نصف ساعة مثلا او ساعة حسب ما تشوف انت – كنوع من الحافز لهم لو ذاكروا كويس وانت رضيت عنهم – من كتر ادمانهم للفيس مثلا حيبقوا مستعدين يشتغلوا لك حتى عبيد لو طلبت كدة ما دام دة حيخليك تفتح لهم نصاية لله يا مؤمن!

تقدر كمان تضبط الايام اللى البرنامج يقفل فيها برامج تضييع الوقت واليوم اللى يفتحهم فيه – من خلال خاصية Time Lock اللى بتسمح لك تحدد الساعات والايام اللى يفعل فيها البروفايل اللى انت عاوزه فى الوقت واليوم (او الايام) الى انت عاوزها

برنامج هايل بصراحة ومرن جدا والوحيد اللى لقيته فعلا بيخليك تعمل كنترول على موبايلات ولادك ومحدش يقدر يتغلب عليه – أنصح كل اولياء الامور بتنزيله على موبايلات ولادهم عشان يحموهم من تضييع وقتهم وعشان ينجحوا بتفوق باذن الله

شارك هذا الموضوع
error

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.