لو هوايتك تزرع فى البلكونة حتلاقى بعض النباتات بتنشف فى نهاية موسمها – بعض الناس بيرموا النبات بالاصيص وبالطينة بتاعته – لكن الناس الشاطرة بتقتلع النبات اللى مات من جذوره وتزرع مكانه نبات جديد

كدة حيبقى عندنا أصيص وطينة نزرع فيها أى نباتات بنحبها – لكن بما ان الطينة كان فيها زرغ سابق فبتكون منهكة لانها فقدت العناصر الغذائية بعد ما تغذت عليها جذور النبات القديم

عشان كدة حأقول لكم على طريقة جميلة جدا نعملها قبل ما نزرع النباتات اللى بنحبها – طريقة حتخلى الطينة تكتسب عناصر غذائية هايلة وتجدد نشاطها وتكون بالفعل جاهزة لأى زرع جديد

الطريقة هى اننا نزرع فى الطينة دى بنات الحلبة – الحلبة الحصى العادية اللى بتتباع عند العطار وبنغليها عشان نشرب مشروب الحلبة – بس طبعا مش حنغليها – احنا نجيب مقدار معلقة او اثنين كبار وننقعهم فى طبق صغير مع ماء يغطيهم لمدة 24 ساعة – وبعدين تانى يوم ناخد شوية طينة ناشفة من القصيصي القديم ونقلبهم فى الطبق الصغير مع بذور الحلبة بما فى الطبق من ماء – لو لقينا الخليط لسة مبلول نزود شوية طينة كمان فى الطبق ونقلب لغاية ما نحصل على طينة مفرولة مش لازقة فى بعضها

وبعدين نشيل طبقة قليلة (بعمق حوالى 5سم) من الطينة على جنب – فى طبق ثانى اكبر – ونبدأ نبدر فى القصيص خليط الطين والحلبة من الطبق الصغير ونوزعه بالتساوى على كل مساحة الطينة – وبعدين نغطيهم بطبقة الطينة اللى شيلناها فى الطبق الكبير – كدة احنا زرعنا بذور الحلبة بعمق حوالى 5سم – وبعدين نسقى القصيص بالماء لكن بحذر وبطء لاننا لو سقينا بماء منهدر بقوة الترتيب حيتلخبط والبذور ممكن تعوم لفوق

نترك القصيص فى البلكونة كما هو – ونخللى التربة دايما مبلولة – وباذن الله بعد أقل من أسبوع البراعم الخضراء الرقيقة حتبدأ فى البزوغ على سطح التربة – بعدها نسقى على فترات أقل ويستحسن برشاش ماء عشان ما نزعجش البراعم الصغيرة او نتسبب فى ميلها وهى لسة صغننة

الحلبة بتكبر بسرعة وبتملا القصيص كله خضرة لامعة مزدهرة – وجذورها بتمد الطينة بمواد غذائية مفيدة جدا – فهناك نباتات تأخذ ونباتات أخرى تعطى – والبقوليات من النوع الثانى – والحلبة اسهل نوع بقوليات فى زراعته

بعد الحلبة ما تعلى وتبقى بارتفاع 10 او 15 سم انزعها من الطين وخرطها كما تخرط البقدونس بالسكين – وبعدين اعدها الى القصيص وقلبها فى التربة بحيث تختلط جيدا بالطينة – كدة الحلبة حتتحلل وتخللى التربة خصبة جدا وكمان حتخللى التربة مسامية ومناسبة جدا لأى زرع جديد عايز تزرعه – ومش حتحتاج سماد هى كدة التربة تمام

نزع الحلبة من التربة يمكن تشوفه اجراء قاسى يخلو من الحنان – لو حبيت الحلبة قوى كدة مفيش مشاكل – انا عاذرك وعارف اد ايه هى بتبقى كيوت – خليها فى القصيص وهى على فكرة شكلها شيك جدا – وبعكس النباتات التانية بيبقى خضارها كثيف ومالى القصيص كله وعيدانها منتصبة وواقفة فى إباء و أناقة تسر الناظرين

وسواءا قلبك طاوعك ونزعت الحلبة عشان تزرع نبات آخر او ما قدرتش ونشأت علاقة حب بينك وبينها – فى الحالتين انت الكسبان – فما أجمل ان تربى كائن حى وتراه ينمو ويكبر امام عينيك – ويملأ كل من بلكونتك بهجة ونضارة وقلبك سعادة وأمل مع اشراقة كل يوم جديد