كتير مننا بينام الظهر – لكن بعد الاستيقاظ تشعر بانك بتصحى بالعافية ولسة موخم – السبب فى كدة واضح وبسيط – الانسان مننا جسمه متعود ينام بالليل بس – فلما ننام الظهر جسمنا بيدخل فى نوم عميق ظنا منه ان دة وقت نوم الليل – عشان كدة لو طلبنا من حد يصحينا بعد ساعتين – او ظبطنا منبه او موبايل – حنلاقى نفسنا بنقوم بصعوبة لان الجسم دخل فى مرحلة النوم العميق كما يفعل فى نوم الليل
لكن التجارب اثبتت اننا لو نمنا 20 او 30 دقيقة فقط الظهر – حنصحى بسهولة فايقين وجددنا نشاطنا وريحنا جسمنا ومخنا تمام – بس بدون الدخول فى مرحلة النوم العميق اللى بيبقى صعب نخرج من وسطها
انا جربت الطريقة دى ولقيتها جميلة جدا ما شاء الله – ومن ساعتها بطلت انام كتير الظهر – لو حنام باظبط التايمر (المؤقت) بتاع الموبايل يرن بعد 30 دقيقة – وباصحى بسهولة وكل التعب والارهاق راح بمفعول كالسحر – ومش مهم على فكرة تنام من اول دقيقة – حتى لو غمضت عينيك فقط وفردت جسمك 20-30 دقيقة من غير ما يجيلك نوم حتريح أعصابك وعضلاتك وعينيك ومخك
جربوها وان شاء الله حتدعولى .. (يارب يدعولى يا رب)
انا يصخى بالليل وبنام طول النهار ودى عاده سيئه جدا ومش عارفه ازاى ابطلها
طبعا يا ايمى كدة وحش على صحتك لان ربنا خلق جسمنا يعمل بالنهار ويستريح بالليل – والحل بسيط – يمكنك اتباع طريقة من اتنين – الطريقة الاولى انك مرة تطبقى – يعنى تيجى فى نهاية ليلة ماتناميش بعدها بالنهار وتستحملى لغاية ما تبقى الساعة 8 بالليل وتنامى – هو صعب لكن انتى ممكن اليوم دة تقضيه برة – اخرجى وماتروحيش عند حد – خليكى فى مكان برة – نادى مثلا او خروجة مع صحابك او تسوق – المهم انك تبقى بعيد عن اى سرير طول النهار – لو قدرتى تعملى كدة يوم واحد حتتظبطى بعدها وتنامى بدرى وتصحى بدرى وتبقى هايلة باذن الله
اما لو مقدرتيش يبقى اتبعى طريقة تانية بنظام تدريجى:
اعملى لنفسك جدول نوم تمشى عليه خلال شهر – مثلا لو بتنامى 7ص نامى 6ص – وبعد يومين ثلاثة نامى 5ص – وكل يومين ثلاثة تبدرى الميعاد ساعة – وهكذا لغاية ما توصلى لانك تنامى فى مواعيد طبيعية صحية (افضل ميعاد للنوم 8 ساعات قبل الفجر – مثلا تنامى 10م وتصحى 6ص فى الشتاء – وتبدرى عن كدة فى الصيف عشان تلحقى الفجر – حتلاقى اليوم بقى فيه بركة لما تبدئيه بصلاة الفجر وحتلاحظى انك بقيتى اكثر نشاط وحيوية
مع تمنياتى لك بالصحة والعافية – ربنا يبارك لك وينور طريقك ويسعدك
شكرا يا استاز محمد على اهتمامك والله انت محترم جدا ربنا يزيدك من الاخلاق وشكرا لك
جزاك الله خيراً على كل ما تفيدنا به من معلومات حباك الله بها
وربنا يديك الصحة والعافية ويرزقك من فضله