كنا زمان لما نروح مكان لأول مرة نقف كل شوية نسأل الناس واكشاك السجاير والمحلات – دلوقتى خلاص من خلال موبايلك تقدر توصل لأى مكان بدون أى مساعدة وبدون حتى اتصال بالنت – الا بس فى البداية لتحديد المكان اللى انت رايحه

كل الموبايلات الحديثة دلوقتى فيها خاصية الجى بى اس GPS – تعالوا نشوف ازاى نستخدمها للوصول بكل سهولة لأى مكان جديد علينا

• قبل ما تنزل من بيتك اللى فيه انترنت wifi افتح خرائط جوجل Maps فى موبايلك
• الموبايل حيحدد لك لوحده انت فين دلوقتى
• دوس على علامة المايك وقول بصوتك اسم الشارع او المكان اللى عايز تروحه – مثلا “شارع يوسف عباس مدينة نصر” أو “ميدان سفنكس المهندسين” او “ميدان المنشية اسكندرية” – أو أكتب فى شباك البحث Search المكان اللى انت عايز تروحه – مثلا اسم شارع او جامعة او مدرسة او وزارة او مسجد – أى حاجة انت عايز تروحها
• لو المكان مشهور حيظهر لك على طول – لو يوجد منه اكتر من واحد بنفس الاسم حيديلك اختيارات تدوس منها على اللى انت تقصده
• بعد ما يظهر لك المكان وعليه علامة حمراء – حتلاقى اسفل الشاشة شكل سيارة ومكتوب تحتها المدة الزمنية اللى حيستغرقها المشوار بالعربية – دوس على السيارة
• حتظهر لك خريطة فيها خط ازرق موصل ما بين مكانك الحالى والمكان اللى انت رايحه
• لو رايح مشى دوس اعلى الشاشة على علامة المشى
• لو رايح بالمواصلات دوس على شكل الاتوبيس
• لو رايح بعربيتك دوس تحت على كلمة “Start Navigation”
• حتظهر لك خريطة اتجاهات تبدأ من تحت بيتك
• اخرج وخد الموبايل معاك – مفتوح على الخريطة نفسها ما تغيرهاش – كدة خلاص مش محتاج نت
• دلوقتى تقدر تركب عربيتك وحتسمع بنت بتقول لك تمشى ازاى – من غير نت – لان المساعدة بتكون بالقمر الصناعى – انت كنت محتاج النت فقط عشان تقول له انت عاوز تروح فين – بعد كدة حيشتغل من القمر الصناعى اللى يقدر طول الوقت يحدد انت فين اثناء ما انت ماشى او سايق او راكب
• حط الموبايل امامك واقف على جنبه – انا باحطه على التابلوه فى مكان ظل عند العدادات عشان ابقى شايفه طول الوقت وانا عيونى على الطريق
• بعد ما تبدأ تاخد سرعتك فى الطرق الرئيسية – البنت حتسكت وتبدأ تسمع بدلا منها صوت جرس عالى – لما تسمع “تن” رنة واحدة دة معناه ان بعد قليل حتحود – ولما تسمع رنتين “تن تن” دة معناه ان التحويدة قربت خلاص – ودة بيحدده الساتلايت حسب سرعتك وقتها
• لو دخلت أى فتحة غلط او مشيت فى أى طريق مختلف – حودت لمنطقة خارج اتجاه السير عشان تزود بنزين مثلا – مفيش مشكلة – حيفضل معاك ويحدد لك ازاى تكمل وتروح برضه لوجهتك من مكانك الجديد
• كل دة بدون ان تكون متصل بالنت – النت بس بنحتاجه لما نعوز نحدد احنا رايحين فين فى الاول بس
• بعد ما توصل بالسلامة للمكان اللى انت عاوزه – لو المكان دة متوفر فيه نت تقدر تخللى الجى بى اس يساعدك على العودة – او ممكن تفتح النت من الداتا دقيقة واحدة تحدد فيها عايز ترجع فين وبعدين تقفل النت