افلام اجنبية لتعلم الانجليزية

عندى ليك مفاجأة النهاردة اضغط هنا عشان تشوفها (مفاجأة جديدة كل يوم)

القسم دة انا عملته لكل اللى زهق من الطرق التقليدية لتعلم اللغة الانجليزية وعايز طريقة تكون مسلية وممتعة

دى طريقة جديدة حتساعدكم تتكلموا وتفهموا انجليزى كويس جدا ان شاء الله

الطريقة تعتمد على مشاهدة افلام اجنبية – مع ترجمة للنص عربى وانجليزى فى نفس الوقت – بس ياترى كل الافلام تصلح؟ لأ طبعاً

عشان كدة انا انشأت لكم القسم دة – حتلاقوا على اليمين اسماء افلام اخترتها لكم بحيث يكون الحوار فيها واضح واللغة الانجليزية سليمة ومناسبة للتعلم من خلالها

كل فيلم حتلاقوا فى صفحته الاتى:

  • اسم الفيلم وصورته
  • رابط تنزيل برنامج uTorrent اللى حتنزلوا الافلام عن طريقه
  • رابط تنزيل الفيلم
  • ملف subtitles اعددته لكم يحتوى على حوار الفيلم بالانجليزى وترجمته بالعربى سطر سطر وجملة جملة – تقدروا تفتحوه بواسطة اى برنامج نصى مثل Notepad++

اختاروا من الافلام الموجودة على يمينكم الفيلم اللى يعجبكم – واتبعوا الخطوات التالية للاستفادة من كل فيلم

خطوات التعلم من الافلام

  • بعد تنزيل الفيلم ابدأ فى مشاهدته اولا بدون ترجمة – وحاول تخمن المعنى من سياق الاحداث
  • وبعدين شوفه مرة ثانية من اوله – لكن هذه المرة بالsubtitles عربى وانجليزى مع بعض من خلال الملف اللى اعددته لكم عن كل فيلم
  • اوقف الفيلم عند الجمل اللى عايز تقرأها كويس وتعرف معناها بالعربى – وبعدين كمل مشاهدة وهكذا – ان شالله تقف عند كل جملة – المهم انك ماتفوتش جملة من غير ما تكون قراتها وفهمت معناها
  • بعد الانتهاء من المشاهدة افتح ملف الترجمة من خلال أى برنامج نصوص مثل Notepad++ وابدأ فى قراءة الحوار – جملة انجليزى وترجمتها بالعربى وهكذا – ركز فى الكلمات وحروفها عشان تزود حصيلتك اللغوية
  • حاول تمثل الحوار – أختار أحد ابطال الفيلم وحاول تمثل شخصيته من خلال قراءة الحوار بتاعه – بنفس طريقة الممثل – حاول تجيب نفس طريقته فى الكلام ونفس طريقة نطقه – مرة فى مرة حتقدر باذن الله تقلده اكتر واكتر
  • وانت بتتسلى فى تقليد الممثلين من خلال الحوار زى ما بيقولوه بالضبط – انت كدة بتتعلم النطق الانجليزى الصح من اصحابه – ومع الوقت والتكرار حتلاقى نفسك بتتكلم زى الامريكان بالظبط – ودة مختلف بالطبع عن لغة الكتب اللى بتكون جافة – اما فى الافلام فحتتعلم لغة الحوار اللى الناس بتستخدمها فى حياتها كل يوم فى جميع المواقف

دة حيؤهلك ان شاء الله فى المستقبل لما تقدم فى أى شركة اجنبية او استثمارية انك فى الانترفيو – المقابلة – انك تبهرهم بطريقة نطقك وحيفتكروك كنت عايش برة فى بلاد الفرنجة ولسة جاى من الطيارة عليهم!

الانجليزى مهم جدا يا جماعة – يمكن اكتر من الشهادة الجامعية احيانا – ملايين اتخرجوا وقاعدين فى البيت من جميع التخصصات – حتى كليات القمة – اما اللى الانجليزى بتاعهم كويس فدول ما قعدوش – بالعكس – اتخطفوا خطف وبيشتغلوا دلوقتى شغلانات ممتازة بمرتبات عالية تحقق لهم حياة مريحة – فالشهادة لوحدها مش كفاية – اتقان اللغة هو اللى بيفتح لك مجالات واسعة للعمل والرزق

اتمنى لكم جميعا النجاح والتفوق – وادعو الله ان يحقق لكم امانيكم فى مستقبل واعد وحياة كلها سعادة ورخاء باذن الله

لو الموضوع نال اعجابك اضغط هنا لدعم الكاتب (جزاكم الله خيراً)

9 تعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *