طاجن ورقة لحمة فى الفرن

عندى ليك مفاجأة النهاردة اضغط هنا عشان تشوفها (مفاجأة جديدة كل يوم)

لا أنسى ابدا الطعم الرائع لورقة اللحمة الى كان ابى الله يرحمه بيعملها لنا زمان – لحمة وبصل وطماطم ويلفهم فى ورقة لحمة سميكة – نوع ورق كان الجزارين زمان بيستخدموه فى لف اللحمة اعتقد عشان توزن اكتر على حساب وزن اللحمة – المهم بابا كان بيجيب ورقة لحمة من الجزار ويلف فيها اللحمة والبصل والطماطم ويوديها الفرن الافرنجى – وتطلع والورقة لونها مسود شوية والريحة ما حصلتش والطعم حكاية

النهاردة ورق اللحمة دة لم يعد موجود – وماحدش فاضى يروح الفرن عشان يشوى لحمة وما اعتقدش الافران حتى حتوافق دلوقتى زى زمان ايام الروقان – عشان كدة حأجرب النهاردة اعملها فى البيت بس بتعديلات من عندى – فى تجربة جديدة من تجاربى ى المطبخ – ويارب تطلع حلوة – حأقول لكم على المقادير والطريقة – وبعد الفطار حابقى اكتب لكم النتيجة فى التعليقات

المقادير

  • معلقتين سمن
  • نص كيلو مكعبات لحمة كندوز برازيلى
  • 3 بصلات كبار
  • قرن فلفل حامى
  • 3 فصوص ثوم
  • 3 حبات طماطم كبار
  • 3 حبات فلفل رومى
  • ملح وفلفل وكبابة صينى وورق لورا مطحونين
  • كيلو بطاطس (اختيارى)

الطريقة

  • نشوح مكعبات اللحمة فى السمن على نار عالية ونقلب معاها بصلتين كبار بعد تقطيعهم ارباع ثم حلقات رفيعة
  • نضيف التوابل نقلب بضع دقائق لتشويح اللحمة ثم نضيف 3 كوب ماء ونضيف قرن الفلفل الحامى مقطع 3 حتت
  • بعد ماء اللحم ما يغلى نغطى الحلة ونوطى النار خالص اقل حاجة ونتركها 4-5 ساعات لغاية ما تستوى (3 ساعات فقط لو نقعنا اللحمة فى ماء وملح ليلة قبلها – 3 معالق ملح صغيرة هرم ندوبهم فى ماء وننقع فيهم اللحمة بحيث يغطى المحلول الملحى اللحمة ونشيلها فى الثلاجة لليوم التالى – وتانى يوم ندلق الماء ونشطف اللحم ونبدأ فى طهيه – دة حيخلى اللحمة تستوى اسرع وتبقى طرية زى الملبن فى الأكل وما تشدش خالص)
  • بعد ما اللحمة تستوى لو كان صوص اللحم كتير نتركها على النار بدون غطاء عشان نقصر الصوص بحيث يبقى تقيل وقليل – دة حيضاعف طعامة الصوص جدا
  • فى هذه الاثناء نقطع البصلة الثالثة والطماطم جوانح بالطول ونقطع الفلفل مربعات – ونحطهم فى طاجن فخار او صينية فرن – وبعد ما الصوص يقل ويبقى ثقيل ناخد معلقتين منه ونرشهم على الخضروات ونقلب – ما نحطش صوص كتير – يادوبك صوص يدهن الخضروات من غير ما يعوم فى قعر الطاجن – عايزين نشويهم مش نسلقهم – وبعدين نرفع اللحمة والبصل من الصوص باستخدام مقصوصة ونحطهم مع الخضروات ونقلبهم مع بعض – ونغطى باقى الصوص فى الحلة على نار هادية جدا عشان ما تبردش – وهنا لو عايزين نكتر الطاجن ممكن نضيف فى الحلة بطاطس مكعبات تستوى فى الصوص 20 دقيقة مع التقليب مرة فى نص الوقت عشان تستوى من فوق وتحت وتاخد طعمه اللذيذ
  • نحط الطاجن تحت الشواية العلوية للفرن حتى تأخذ لون الشوى اللذيذ – حوالى 20 دقيقة
  • بعد ما نطلع الطاجن من الفرن نصب الصوص الساخن على الوش ونقدمها – اما لو كنا حطينا بطاطس فى الصوص يبقى بعد ما نفردها على وش الصينية ندخلها الفرن 20 دقيقة تحت الشواية تانى لحد ما البطاطس تتشوى ويبقى لونها ذهبى – بالف هنا وشفا

ايه رأيكم؟ تفتكروا حتطلع حلوة؟ – حأقول لكم النتيجة فى التعليقات بعد الفطار باذن الله

لو الموضوع نال اعجابك اضغط هنا لدعم الكاتب (جزاكم الله خيراً)

3 تعليقات

  1. السلام عليكم
    اولا تسلمي على الوصفه و المجهود ربنا يجازيكي خير
    بس انا عندي تعليق بسيط ان اكبر غلط هو نقع اللحمه نيه ف ماء و ملح او حتى ماء بس لانها بكده بتفقد قيمتها الغذائيه بخروج السائل الاحمر ال هو مش دم بس سائل نسيج اللحمه ال فيه القيمه الغذائيه للحمه و الكلام ده انا درسته و قريته كمان في كتاب نظيره
    و تسلم ايدك على الوصفه الحلوه

    • الف شكر على كلماتك الطيبة – بس على فكرة انا راجل
      انا عارف ان الستات تقريبا محتكرين وصفات الاكل على النت – فاى واحد يكتب وصفة الناس تفتكره ست – لكن الحقيقة ان رجالة كتير بتعرف تطبخ حلو يمكن احسن من ستات كتير لو توفر لهم الوقت
      بالنسبة للمحلول الملحى كلام حضرتك مظبوط جدا – ولاحظى ان انا لم اذكر اننى بارمى ماء النقع – بالعكس انا باستخدمه فى الطبخة زى ما هو – وبالتالى لا يوجد فقد فى القيمة الغذائية للحمة – الفكرة بس ان الملح بيفك انسجة البروتين ويجعلها طرية
      لكن عموما انا دلوقتى بطلت انقع اللحمة – وبدلا من ذلك باطهيها طهى بطئ مع كل الاضافات (ملح وفلفل – كبابة صينى – بصل – ثوم – طماطم – ورق لورا.. الخ) على اقل نار ممكنة مغطاه مدة طويلة – 6 ساعات – بدون اضافة ماء – وبعد ما تستوى باضيف ماء لو عايز منها شوربة – بتطلع طرية جدا – بدلا من تعب النقع ليلة قبلها
      شرفتينى بزيارتك وبارك الله فيكى

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *