آخر تحديث : 01-08-2014 الساعة 03:33 م
من فضل ربى انه اعطانى خبرة فى حاجات كتير – خبرات ثقافية وادبية وفنية وتكنولوجية واجتماعية ولله الحمد
الموقع دة انا انشأته من زمان – من سنة 2002 – لخدمة الناس ومساعدتهم فى كل المجالات اللى اقدر اخدمهم فيها – وكل يوم اصحى أقرأ اول حاجة تعليقاتكم – وافرح جدا لو حد طالب يستفسر عن حاجة او يستشيرنى فى حاجة – وكل ما زادت الطلبات كل ما حسيت ان اليوم أجمل واحلى – لان ربنا اعطانى هدايا كتير النهاردة – كل طلب او استشارة منكم هى هدية جميلة بالنسبة لى – وكل دقيقة اقضيها فى خدمة الناس بتشعرنى بسعادة لا توصف
انا شايف ان الانسان فى الدنيا دى فى سباق مع الزمن – الفائز فيها هو اللى يلحق يعمل كل ما يمكنه من خير للاخرين ونفع وقضاء لمصالح الناس – كلنا بعد سنوات تطول او تقصر مش حنبقى هنا – وماحدش حيقدر ياخد معاه اى حاجة – لا مال ولا مركز ولا نفوذ – اللى حينزل معانا هو بس عملنا الصالح ومدى نفعنا للاخرين
يا ريت لو عندكم اى سؤال او طلب مساعدة الا تترددوا فى كتابته لى
- لو عندكوا مشاكل فى حياتكوا ومحتاجين نصيحة اكتبوهالى هنا: حلال المشاكل – بريد القراء
- لو محتاجين أى استشارة فى الاجهزة وتكنولوجيا المعلومات حتلاقوا مواضيع كتير هنا: نصائح الكترونية
- ولو عن الموبايلات حتلاقوها هنا: موبايلات
- ولو عايزين وصفات أكل حتلاقوها هنا: بالهنا والشفا
- لو بتدوروا على معلومات ووصفات لأحسن نظام غذائى صحى حتلاقوها هنا: LCHF
- اما لو عايزين اصمم لكم الات حاسبة او جداول اكسيل تفيدكم فى اعمالكم وهواياتكم اطلبوها منى هنا اطلب آلة حاسبة او جداول اكسيل وانا اصممها لك – ناس كتير طلبت منى آلات حاسبة صممتها لهم هنا: آلات حاسبة
- اى مساعدات فى مراحل التعليم المختلفة – كتب مذكرات مراجعات اسئلة واجوبة وبرامج تعليمية مسجلة وكل ما يخص التعليم تلاقوه هنا: التربية والتعليم
- نصائح قبل شراء السلع المختلفة تلاقوها هنا: نصائح للمستهلكين
- عايز تزرع فى بلكونتك؟ حتلاقى مساعدة هنا: مزرعة فى البلكونة
- وعندى لكم نصائح كتير قوى مفيدة للى عايز يقوى لغته الانجليزية تلاقوها هنا: Learn English
- ولو بتخطط للعمل فى شركة اجنبية او استثمارية بمرتب عالى يبقى انت محتاج تكون كويس فى المحادثة الانجليزية عشان تنجح فى اى مقابلة شخصية: Learn English conversation
وأى استفسار انا تحت امركم
قديما قالوا كن جميلا تري الوجود جميلا …. وعنك اقول ان بجمالك انت صار الوجود جميلا ….الله معاك ويسدد خطاك
انا لا استاهل الكلام الكبير دة – الف شكر بجد
من فضلك كنت عايز اعرف التموين وصلك وبدأت توزعه على المواطنين وللا لسة لم يصل؟
حقيقة عجزت كلماتى عن وصفكم كفاعل خير// فعندما تجولت بموقعكم السهل البسيط الراقى كم امتعتنى ردودكم وتنوعكم فى جميع المناحى // حقيقة أنت إنسان عظيم // استطعت أن تنال الدعاء القلبى
ربنا يخليك يارب – دعاءك لى يا استاذ عاطف أغلى عندى من كنوز الذهب – وكلماتك الكريمة تاج على راسى من فوق
جزاكم الله كل خير وربنا يسعدك دنيا وآخرة يارب
ربنا معاك هو ده ألى أنا كان نفسى أعمله فعلا
و لى الشرف في مساعدتك في أى شىء في مقدورتى
ربنا يقدرك تعمل الخير دايما – وجزاك الله خيرا على عرضك الكريم – ربنا يبارك فيك
انا من المعجبين بالموقع ولكنى اختلف معك فى الراى بخصوص اعجابك بباسم يوسف وتطاوله السخيف على كل من يعتلى السلطه سواء ايام مرسى او السيسى .ربما انت كتبت رايك منذ فتره قبل ايقاف اذاعة البرنامج لاننى ارى ان البلاد تتعرض لمخاطر كبيره لايجدى معها برنامج ساخر ونقد لايقدم ويفيد بل يضر كثيرا لاننا نحتاج الى نقد بناء يقدم افكار لحل مشاكلنا وليس لمقدم برامج كل همه هو تجميع مقاطع فيديو لاناس يريد السخريه منهم وتلصيقها بحيث تبدو انها تدين بعض الاشخاص لمجردتجميع بنامج وعرضه على المشاهدين..هل اعجبك عندما عرض مرسى ايام زيارته لباكستان وهو لابس البرنيطه وسخريته من ذلك..انا مختلف مع الاخوان ولكنى لااحب ان يتم الاستهزاء برئيس الجمهوريه بهذه الصوره ..سواء مرسى او السيسى..وبالمناسبه لو قرات الاحداث الاخيره جيدا ستعرف ان السيسى انقذ مصر من مصير اسود كالعراق وسوريا وليبيا وهذا ليس تمجيدا له ولكنها الحقيقه..وهو لم يقتل الاخوان بل هم قتلوا انفسهم لاصرارهم على اشعال الفوضى فى البلاد ومحاولة عودة رئيس بالقوه والارهاب لفظه الشعب علما بان رئيس الجمهوريه ليس ملاكا خالى من الاخطاء ولكن لننتظر ونرى من الاصلح ..حمى الله مصر..ارجو الرد والتعليق
السلام عليكم ورحمة الله وبركاته
بمناسبة فرحك الكبير بكل طلب يرد إلى سيادتك
فأرجو مساعدتى فى كيفية إنقاص وزنى الذى أعانى كثيراً منه خاصة أنه زاد بمعدل النصف من 64 ك إلى 94 ك فى مدة 3 سنوات ولا أعلم سبباً لهذه الزيادة سوى أننى تركت العمل وأجلس فى البيت وبدأ يظهر عندى بوادر إكتئاب
بالنسبة للوزن انا كتبت لحضرتك رد حتلاقيه تحت موضوع النظام الغذائى اللى بانصح بيه كل الناس الباحثين عن الرشاقة والصحة والحيوية
وبالنسبة للاكتئاب الف بعد الشر عنك – اسهل شئ للخروج من الاكتئاب هو فعل الخير – ابحثى عن اى جمعية خيرية او دار ايتام وزوريهم وحاولى تتعاونى معهم فى اى عمل تطوعى يشغل وقت فراغك – عمل الخير بيشعرنا بالرضا عن نفسنا وان لنا اهمية فى الحياة وان حياتنا ليها معنى ومفيدة للاخرين – بكدة حيبقى دايما عندك هدف نبيل تعيشى عشانه ويملا حياتك رضا وسعادة باذن الله
مع تمنياتى لك بحياة سعيدة مليئة بالنشاط والتفاؤل والخير باذن الله – وتحت امرك فى اى مساعدة او نصيحة
السلام عليكم ورحمة الله وبركاته
بمناسبة فرحك الكبير بكل طلب يرد إلى سيادتك أود أن اتقدم لمعاليك بخالص الشكر على عطاؤك كنموذج للمصرى الأصيل بجوده وكرمه … حفظك الله تعالى