اطلب جدول اكسيل وانا اصممه لك مجاناً

Posted by on

آخر تحديث : 22-02-2017 الساعة 02:10 ص

لو محتاج ألة حاسبة تحسب لك أى شئ أكتب طلباتك هنا وانا اصممها لك

وكمان لو محتاج جداول اكسيل تفيدك فى حساباتك او إدارة اعمالك او شئون مهنتك او حياتك اليومية اطلبها برضه هنا

من فضلكم عند طلب آلة حاسبة أو جدول اكسيل أكتبوا لى كل المطلوب بالتفصيل – يعنى كل العناصر اللى محتاجينها فى الالة او فى الجداول

تأكد من كتابة الايميل بتاعك صح فى الطلب بتاعك عشان تقدر تتابع معايا تنفيذ طلبك – حيجيلك اخطار عليه بمجرد الرد على طلبك – انا اتعامل فقط مع من يبدى جدية واهتمام وحاجة فعلية لما يطلبه – لذا يرجى قراءة الشروط التالية بعناية وحرص

يشترط لتنفيذ طلبكم الآتى:

  • ان يكون النشاط حلال لا يغضب الله
  • ان تكتب لى تفاصيل التفاصيل فى كل نقطة تريدها فى الالة الحاسبة او جدول اكسيل المطلوب ولا تترك أى تفصيلة
  • لا تتوقع ان لدى أى خبرة فى تخصصك – مثل علوم المحاسبة والطب والهندسة والتجارة او القونين او الادارة – خبرتى تكنيكية فقط فى تصميم جداول اكسيل والات حاسبة – لذا اشرح بالتفصيل كل ما تريد وكأنك تشرح لشخص لا يعمل فى مجالك وليس لديه اى خبرة او معلومات عنه ولا علاقة له به من قريب او بعيد – اذا افترضت انى اعلم شئ فى مجال تخصصك فلا تتوقع ان تحصل على ما تريد بالطريقة التى فى تصورك
  • لا يمكنك طلب أى تعديلات او تفاصيل اضافية بخلاف ما قمت بذكره فى تعليقك الاول – لذلك من الضرورى ان توضح كل ما تريد بكل تفاصيله فى تعليقك

حاليا الالات الحاسبة وجداول اكسيل اللى صممتها حتى الآن تجدها على اليمين – تصفحهم فقد تجد طلبك جاهز بالفعل ويمكننة ان اعدله لك ليكون مناسب اكثر لاحتياجاتك – او اصمم لك جدول جديد حسب رغبتك

باذن الله طلبك سينفذ ويظهرفى هذه القائمة لكى تستفيد انت ويستفيد الآخرين ايضاً

ويسعدنى تشريفكم لى بزيارة صفحة الخدمة المجانية على الفيس بوك

301 Comments

  1. عمو محمد ريحت الناس كلها ونسيتنى انا وانا عنى مشكله انا باساعد والدى فى محل التموين فى الصعيد واغلب الصعايده لا يحتاجون من السلع التمونيه الا السلع الاساسيه وهى السكر ةالارز والزيت واخنا بيكون عندنا زحام شديد فانا عاوز من حضرتك جدول انظر فيه اعرف من خلاله الفر ليه ايه بضاعه وتكون فى حدود دعمه فقط ارجو الرد سريعا وشكرا يا استاذ محمد

    رد على هذا التعليق << to this comment

    • حاضر من عنيا انا مش ناسيك والله
      عايز بس اعرف انت بتستخدم لاب توب وللا تابلت وللا موبايل؟ عشان حجم الشاشة بيفرق معايا فى تصميم الجداول
      وكمان عايز اعرف الحد الاقصى لعدد الافراد كام؟ 15 فرد؟ 20؟ 30؟ اكتر بطاقة كام فرد؟
      ومعلش استفسار كمان: الزيت الخليط 1 لتر تقصد اللى سعره 8.45 وللا زيت خليط صافى اللى سعره 7.60؟ وللا دة اتلغى من السلع الجديدة الشهر دة؟
      وعايز فى الجدول دة خانة تبين المطلوب دفعه نقدا وللا مش مهم؟ (اقصد هامش ربح البقال والجنيه رسوم)

      رد على هذا التعليق << to this comment

      • شوف كدة الجدول دة وقل لى هل هذا هو ما تقصد؟ وللا عايز أى تعديل او اضافة؟
        اول خانة على اليمين بتوضح المبلغ المتبقى لصاحب البطاقة – ولو المبلغ بالسالب يبقى فرق يدفعه نقدا (دة غير هامش رح البقال والجنية رسوم طبعا) – فالخانة دى ليك انت مش للمواطن عشان ما تلخبطوش ويفتكر انه حيدفع كدة بس
        اما لو عايز اجمالى اللى حيدفعه المواطن قل لى وانا اعدل الجدول
        http://my2cents.gawaher.com/7982

        رد على هذا التعليق << to this comment

      • الف شكر وبارك الله فيك
        انا عندى مشروع صغير توكيل مشترك فيه انا واتنين اصحابى يعنى ثلاث شركاء وعندنا راس مال ومخزن وسياره ومندوب والبضاعه طبعا كده انا اللى عاوزه شيت اضع فيه الاصول الثابته وراس المال والبضاعه الوارد والمنصرف والمرتجعات من العميل ومن السياره والى المصنع وزى مانت عارف نظام التوكيلات واخر كل شهر بعد المصاريف والايجارات والمرتبات اعرف الارباح والخسائر وتقسم على الشركاء او تضاف الى راس المال
        انا عارف انى طولت عليك ولكن جزاك الله كل الخير

        رد على هذا التعليق << to this comment

        • بالعكس كل ما تدينى تفاصيل اكثر كل ما قدرت اعمل لك طلبك مظبوط
          عموما انا حأعمل تصميم مبدئى قابل للتغيير – وبعدين تقول لى ايه اللى ناقص اوزدهولك
          عايزه بالعربى وللا انجليزى؟
          كم صنف تتعامل فيه – وماهى اسماء الاصناف؟
          هل للصنف الواحد سعر واحد محدد سواء فى الشراء او البيع ام متغير؟
          ام الصنف الواحد يوجد منه مقاسات اواوزان مختلفة واسعار مختلفة؟
          ماهى المصاريف بالظبط – بخلاف الايجارات والمرتبات
          هل تجنب من الربح مبلغ لدفع الضرائب؟

          رد على هذا التعليق << to this comment

  4. عايز اله حاسبة او شيت اكسل عن طريقة استطيع حساب قيمة ( اجمالى شهرى او اسبوعى او يومى )ساعات العمل الاضافية

    حيث اننى شهريا يحدث خطاء فى قيمة ساعات العمل الاضافية لى فى العمل ولا استطيع حساب او معرفة المبلغ المستحق لى

    وبصراحة بحس انى تايه وبيتضحك عليا

    رد على هذا التعليق << to this comment

    • طيب حاضر – بس ارجو اعطائى مزيد من التفاصيل
      مثلا هل قيمة ساعة العمل الاضافى ثابتة؟ وللا بتختلف فى المواسم والاجازات؟
      هل انت عايز تسجل باليوم اشتغلت كام ساعة؟ واليوم اللى ما عملتش فيه ساعات اضافية تسيبه فاضى؟
      وللا بالاسبوع؟
      وأى تفاصيل زيادة حتساعدنى فى التصميم

      رد على هذا التعليق << to this comment

      • شكرا لاهتمامك استاذ محمد … بخصوص البيانات اللى طلبتها ( قيمة ساعة العمل الاضافى ثابتة؟ وللا بتختلف فى المواسم والاجازات؟ ) هى كالتالى 5 للساعة ( وخلينى اقدر اغيرها او اعدلها حسب الزيادة السنوية فى مرتبى )
        اليوم الطبيعى للعمل يبداء من الساعة 7.30 ص الى الساعة 4 م ويتم بداية احتساب الاضافى بعد الرابعة وهو كالتالى
        * اول ساعة = ساعةو35
        * تانى ساعة = ساعةو35
        * تالت ساعة =ساعةو70
        * واى ساعة بعد ذلك حتى الاسعة 11 م =ساعةو70
        علما بأن ساعات العمل الاضافى الطبيعية هى من بعد الاساعة 4 م وحتى الساعة 7 م وفيما عدا ذلك استثناءو بشكل نادر
        يوم الجمعه يبداء حساب الاضافى من الساعة 8 ص وحتى 3 م او الى الانتهاء من العمل المكلف به وقد يمتد الى 8 م
        وحسابة الساعة بساعتين فى اى وقت من اليوم
        يوم السبت يبدا حساب الاضافى من الساعة 7.30 الى الساعة 3 م
        وحساب الساعة = ساعةو70
        ملحوظة قد تفيد او لا : احيانا قد نضطر للعمل يوم من ايام العمل الاضافية كالسبت بدلا من يوم اخر يكون اجازة اثناء الاسبوع ويكون السبت بديلا عن هذا اليوم وبالتالى يكون نفس المواعيد العادية ويحسب الاضافى بعد الرابعة فقط
        دى كل المعلومات المتاحة

        رد على هذا التعليق << to this comment

        • 4 استفسارات
          1- ” تالت ساعة =ساعةو70″ يعنى تقصد ساعتين وعشر دقائق؟
          2- “هى كالتالى 5 للساعة ( وخلينى اقدر اغيرها او اعدلها حسب الزيادة السنوية فى مرتبى )”
          لو هى نسبة ثابتة من مرتبك انا ممكن اصممها بحيث تكتب المرتب كام والشيت يحسب لك الساعة بكام
          3- وهل لو جيت فى يوم متأخر عن 7:30 واشتغلت اوفرتايم بيتحسب لك عادى وللا بيخصموا مدة التأخير
          يعنى مثلا جيت 8:30 وخلصت الساعة 5 – كدة ليك ساعة اضافى وللا دى بدل دى؟
          4- وهل عايز قيمة الاوفرتايم بالشهر؟ وللا كمان بالاسبوع؟

          رد على هذا التعليق << to this comment

  5. 1- ساعة و70 يعنى ساعة + 70% من قيمة الساعة
    2- تمام لو ممكن اكتب المرتب الاجمالى وهى تحسب الساعة بكام يكون افضل
    3- لو جيت متأخر بيحسبوا الاوفر تايم عادى مالوش دعوة بالتأخير ( التاخير بيتم عمل اذن تأخير ويخصم لوحده من رصيد الاجازات )
    4- لو ممكن القيمة بالاسبوع ثم بالشهر

    وافر الاحترام لك محمد على الاهتمام

    رد على هذا التعليق << to this comment

  7. برجاء عمل جدول اتعامل به فى المرتبات حيث ان ايام العمل فى الشهر 26 يوم وعدد الساعات 8 ساعات يوميا يعنى عدد الساعات الشهرية 208 ساعة وايضاً يوجد عمال عدد الساعات اليومية 10 ساعات يعنى 260 ساعة شهرية وعلى ذلك يحتسب الاضافات والخصومات

    رد على هذا التعليق << to this comment

    • تحت أمرك – بس عايز تفاصيل اكتر
      حضرتك عايز جدول تحسب بيه مرتبك – وللا انت مسئول المرتبات وعايز تحسب للعمال مرتباتهم آخر الشهر؟
      وهل العمال بيتحاسبوا على عدد الساعات وعدد الايام الفعلية؟
      يعنى لو شهر فبراير بيتحاسبوا غير شهر يناير مثلا؟
      وهل مش بيتحاسبوا على ايام الاجازات والعطلات الرسمية؟
      وماهى الخصومات – اسماءها ونسبتها
      وماهى الاضافات – اسماءها ونسبتها
      وعايز الجدول يساع كام عامل كحد أقصى؟
      وهل حتكتب اسم كل عامل ورقمه الكودى
      اى بيانات أخرى للعمال حتحتاج تكتبها؟
      كم أجر الساعة؟ وهل بتتغير من عامل لآخر وللا اجر الساعة ثابت للكل؟
      على فكرة مش كل الشهور حتبقى 26 يوم – هناك شهور 27 يوم بعد اسقاط ايام الجمعة
      هى الاجازة الاسبوعية جمعة فقط؟
      ياريت تفاصيل التفاصيل عشان اعمل لك حاجة كويسة شاملة

      رد على هذا التعليق << to this comment

  8. السلام عليكم
    انا مبتدئ فى الاكسيل وكنت عاوز اعمل ملف لتسهيل عملية الحساب ويكون مرجع سهل الرجوع للبيانات فيه

    انا عامل مرفق لشكل الشيت المبدأي اللي عاوز اعمله و مش قادر اعمل ترحيل بيانات من ورقه للتانيه

    في مثال اني عاوز اعمل شرط لو الخانه I7 تساوي MAG مثلا تترحل الصفوف اللى جمبها للورقه رقم 2 اللي اسمها mag حتي يتم تجميع رصيد الشركة دي لوحدها وهكذا
    كمان كنت عاوز اعمل خانه التنفيذ يبقي اختيار اعلم عليه ب صح او لا
    وعاوز اعمل فلتر لكل خانه بحيث لو عاوز اجيب كل الصفوف اللي مقدم حجز لوحدها

    http://www.filedropper.com/test1oneway
    دي اول مشاركه ليا واعتذر ان كنت بطلب طلبات كتيره

    رد على هذا التعليق << to this comment

    • – اولا لازم كل الشيتات تكون بنفس الترتيب واسماء العواميد – اعمل كوبى وبيست لاسماء العواميد فى كل الشيتات
      – وبعدين اختار A7 فى شيت mag واكتب فيها = وبعدين روح شيت الورقة الاولى واختار نفس الخانة ودوس انتر
      دلوقتى ارجع شيت ماج واسحب الخانة لغاية عدد الصفوف اللى انت عاوزه – 1000 – 10000 زى مانت عايز
      وبعدين اسحب شمال لغاية آخر عمود
      كدة شيت ماج حينقل دايما كل اللى حيتكتب فى الورقة الاولى
      لكن انت عايز الصفوف بتاعة شركة ماج بس هى اللى تظهر
      عشان كدة حنعمل فلتر بسيط
      اختار عمود I وبعدين دوس على Data وبعدين Filter
      خللى كل حاجة فى الشباك زى ماهى بس شيل الصح من امام All وعلم بس على
      mag
      الشركة
      blanks
      كدة شيت ماج حيظهر فيه السطور اللى فيها ماج بس
      كرر نفس الخطوات مع اى عدد من شيتات الشركات التانية – بس بدل ما تعلم على ماج علم على اسم الشركة اللى الشيت باسمها

      بالنسبة لتجميع الرصيد:
      تعالى مثلا فوق عمود K اللى اسمه “دائن” وادخل التالى:
      =SUBTOTAL(9,K7:K1007)
      (معلش الموقع هنا بيلخبط مكان الاقواس والعلامات – انت بس اعمل نسخة من المعادلة وحطها حتلاقيها اتعدلت عندك فى الشيت)
      كدة حيجمع لك السطور اللى ظاهرة بس (المثال دة على اساس لو حتستخدم 100

      بالنسبة لعمود التنفيذ:
      فى خانة اسم الخانة فوق على الشمال اكتب:
      P7:P1007
      ودوس انتر عشان تختارهم (زود العدد لو عايز اكتر)
      وبعدين دوس على
      DATA > Data Validation
      وتحت Allow غير Any Value الى List
      وبعدين فى خانة Source اكتب
      Yes,No
      بينهم كومة ضرورى – لو محتاج اختيارات اخرى زودها
      كدة اول ما تدوس على اى خانة فى العمود دة حيظهر لك سهم لما تفتحه تقدر تختار من الاختيارات اللى انت حددتها

      بالنسبة للفلتر انت ممكن تفلتر كل بيانات الورقة الاولى كالتالى:
      اختار كل الخانات اللى فيها اسماء العواميد: من A6:P6
      دوس على
      Data > Filter
      دلوقتى حتلاقى سهم عند كل عمود – دوس عليه واختار ترتيب البيانات بالطريقىة اللى انت عاوزها – الترتيب بيكون ذكى – يعنى لو اسماء حتختار ابجدى او عكسى – لو ارقام تقدر تختار من الاصغر للاكبر او العكس – لو تواريخ تقدر تختار من الاحدث للاقدم او العكس – وهكذا

      لو اى حاجة مش فاهمها قل لى وانا ممكن ابعت لك الشيت بتاعك فيه التعديلات دى جاهزة
      وربنا يوفقك وان شاء الله تبقى احسن منى فى اكسيل واتعلم منك

      رد على هذا التعليق << to this comment

      • فعلا فكرة التصفيه فكره ممتازه ومجتش في بالي , انا بشكر حضرتك جدا علي انك شرحتلي الخطوات ولم تكتفي بعمل المطلوب دون شرح
        الحمد لله عملت زي ما حضرتك قلت وكله تمام بس انا كنت عاوز اعمل شويه حاجات كمان من باب التطوير
        1- هل ممكن اني اعمل حمايه للسطور اللى اتكتب فيها بحيث لا يتم تعديلها لو نزلت للسطر التالي ( لعدم التلاعب)
        2- اخلي الصفحات اللي بيترحل فيها لا يتم التعديل فيها يدوي ولكن تاخد البيانات من الصفحة الاولي فقط (يتم تعديلها بكلمة سر )

        انا اسف ان طلباتي زادت بس انا نفسي اعمل ملف متاكمل والمشكله ان فيه معلومات كتيره جدا معرفهاش في اكسيل

        رد على هذا التعليق << to this comment

        • اولا بلاش تقول انك بتتعبنى – الحقيقة انى بكون سعيد جدا بخدمتك وخدمة كل الناس – لو عايز تسعدنى اكتر اسالنى اكتر – انا هنا فى خدمتك
          وانا كنت زيك وناس أكن لها كل احترام وتقدير علمتنى وساعدتنى – وان شاء الله فى المستقبل تقدر انت كمان تساعد غيرك وتكسب ثواب رائع باذن الله

          جنبدأ بالسؤال الثانى:

          “2- اخلي الصفحات اللي بيترحل فيها لا يتم التعديل فيها يدوي ولكن تاخد البيانات من الصفحة الاولي فقط (يتم تعديلها بكلمة سر )”
          سهل قوى:
          روح عند الشيتات بتاعة الشركات ودوس فوق على:
          Review > Protect sheet
          واكتب باسورد مرتين
          كدة كل شيتات الشركات لايمكن لاى شخص تعديلها وحتتعدل بنفسها فقط

          “1- هل ممكن اني اعمل حمايه للسطور اللى اتكتب فيها بحيث لا يتم تعديلها لو نزلت للسطر التالي ( لعدم التلاعب)”
          ايوة ممكن:
          اول حاجة اختار كل الخانات وبعدين دوس يمين وعند تاب الحماية protection شيل الصح يعنى خليهم كلهم unlocked
          وبعدين اعمل حماية للشيت بباسورد (الطريقة فى اجابة السؤال السابق)
          وبعدين دوس يمين على التاب بتاع اسم الشيت واختار View Code – وبعدين انسخ الكود التالى:

          Private Sub Worksheet_SelectionChange(ByVal Target As Range)
          Dim Rng
          Dim MyCell
          Set Rng = Range(“A1:Q53”)
          For Each MyCell In Rng
          If MyCell.Value = “” Then

          Else: ActiveSheet.Unprotect
          MyCell.Locked = True
          MyCell.FormulaHidden = False
          ActiveSheet.Protect DrawingObjects:=True, Contents:=True, Scenarios:=True
          ActiveSheet.EnableSelection = xlNoRestrictions
          End If
          Next
          End Sub

          وبعد كدة احفظ الفايل ك Excel macro-enabled work book
          عشان يحفظ لك الماكرو اللى نسخته
          كدة أى خانة فاضية يقدر الموظف يكتب فيها – لكن اى خانة مليانة او حتتملى حتبقى محمية ولا يستطيع احد تعديلها الا انت بالباسورد بتاعتك

          اسئلتك جميلة على فكرة – انا جاهز للاسئلة التالية

          رد على هذا التعليق << to this comment

          • للاسف مش عارف اعمل موضوع الماكرو دا

            كلك يمين على اسم الشيت وبعدين اختار ايه !!!

      • =SUBTOTAL(9,K7:K1007)
        (معلش الموقع هنا بيلخبط مكان الاقواس والعلامات – انت بس اعمل نسخة من المعادلة وحطها حتلاقيها اتعدلت عندك فى الشيت)
        كدة حيجمع لك السطور اللى ظاهرة بس (المثال دة على اساس لو حتستخدم 100

        سؤال عندي في المعادله دي ، هيا ال 9 دي معناها ايه ، وياعني ايه هتستخدم 100 ؟؟؟

        رد على هذا التعليق << to this comment

  9. مشكله اخري بدات بالظهور بالنسبة للصفحة الثانيه بتاعة الشركات زى mag مثلا
    كل لما اكتب سطر فى الصفحه الرئيسيه المفروض تترحل لوحدها — لكن دا مش بيحصل لازم اروح اشيل الفلتر واعمله تاني عشان تظهر السطور الجديده !!

    رد على هذا التعليق << to this comment

      • انا بعتذر انى مردتش عليك يا (حاج محمد ) بس كانت ظروف شغل سيئه اليومين اللي فاتو
        انا كنت وصلت فى الملف لموضوع الباسورد عن التعديل وعملت الكود بس لاحظت ان مفيش كلمة سر بتتطلب مجرد بتوقف الحمايه بس
        ثانيا : الملف حسيت انه اصبح تقيل فى التعامل بعد ما اتحول ل MACRO وحجمه اصبح اكبر كمان ، ونتيجة للتقل دا انا بفكر استغني عن موضوع كلمة السر

        باذن الله بكره هبدأ فى الملف من الاول لاني حاسس انه لخبط مني والدنيا مبقتش مظبوطه

        الف الف شكر ( حاج محمد ) على مساعدتك ليا واعتذر ان كنت هطلب منك طلبات جديده الايام اللي جايه دي لنفس الملف

        رد على هذا التعليق << to this comment

  10. السلام عليكم ورحمة الله وبركاته
    أولاً جزاكم الله خيرًا على هذه المجهود الرائع،
    ثانيًا: أنا تاجر تموين وكنت عايز تحديث للآله الحاسبة الموجودة لحساب السلع التوينية على الرابط التالي: http://my2cents.gawaher.com/%D8%A2%D9%84%D8%A9-%D8%AD%D8%A7%D8%B3%D8%A8%D8%A9-%D9%84%D9%84%D8%B3%D9%84%D8%B9-%D8%A7%D9%84%D8%AA%D9%85%D9%88%D9%8A%D9%86%D9%8A%D8%A9
    والتحديث هو لأسعار السكر حيث تم تنزيله من 4.90 +.025 إلى 4.50 + .025 ، هذا أول تعديل،
    أما التعديل الثاني فأريد زر لتسجيل العملية بعد إتمامها بتاريخ اليوم، والقدرة على مراجعة ما تم صرفه من سلع خلال اليوم، وما تم قبضه من مبالغ خلال نفس اليوم، وذلك حتى أقدر على الجرد على نفسي أو الجرد على العاملين في المحل، وجزاكم الله خيرًا.

    رد على هذا التعليق << to this comment

    • بالنسبة لاسعار السكر فهى بالفعل متعدلة – حضرتك اعمل تحديث للصفحة عندك: دوس على F5 او ايقونة التحديث اللى بجوار عنوان الصفحة فوق عندك فى المتصفح بتاعك – او لو بتستخدم نسخة محفوظة عى جهازك نزل النسخة الجديدة بدلا منها – وقل لى هل الاسعار كدة اتظبطت عندك وللا لأ

      وبالنسبة للطلب التانى حاضر من عنيا – بس عايز شوية معلومات:
      – هل لكل صاحب بطاقة عندك رقم؟ او هل يوجد رقم للبطاقة بتتعامل بيه (عشان تسجله مع كل حركة بيع)
      – هل بتقدر تستخدم برنامج اكسيل؟ الافضل تستخدم برنامج مجانى اسمه LibreOffice عشان هو دة اللى حأصمم لك طلبك عليه

      ولى سؤال خارج الموضوع محتاجر تاجر تموين محترم زى حضرتك يجاوبنى عليه:
      ليه بقالين كتير بياخذوا من المواطنين 5 جنيه أكثر من المبلغ المطلوب واللى بيظهر فى ايصال الماكينة؟
      هل هناك اتفاق معين خفى مع مكتب التموين لتحصيل المبلغ الزائد دة؟ وللا دة بيتم بمعرفة بقالين عايزين ياخدوا اكتر من حقهم؟
      بقالين كتير بيقولوا الخمسة جنيه دى مشال – هو دة رسمى انهم يحاسبوا المواطنين على المشال؟
      هل حضرتك بتاخد فلوس اكتر من الموضح فى ايصال الماكينة؟ ولو نعم فما هو السبب؟
      انا لا اقصد حضرتك بأى سوء – انا بس عايزك تساعدنى على الفهم عشان ناس كتير قوى بتشتكى لى من الموضوع دة
      وخصوصا ان بقالين كتير لا تعطى المواطنين ايصالات الماكينة وبالتالى لا يعرفون حقوقهم

      رد على هذا التعليق << to this comment

  11. أشكرك شكرًا جزيلاً على الرد والاهتمام
    – أولا: فعلاً لكل بطاقة عندي رقم (رقم البطاقة الذكية).
    – ثانيًا: بالنسبة لبرنامج أكسل هو أصعب من نظام الآله الحاسبة اللي حضرتك مصممها، فالآلة الحاسبة أسهل كتير بصراحة، وإن شاء الله هنزل برنامج LiberOffice وشاكر جدًا لحضرتك.
    – وأخيرًا بالنسبة لسؤال حضرتك ، موضوع الخمسة جنية دا غير رسمي ومبالغ فيه، لكن في نفس الوقت احنا كتجار تموين عندنا مشكلتين هما اللي بيخلوا كل تاجر يزود على البطاقة أكثر من إيصال الماكينة.
    المشكلة الأولى: إن الموظفين اللي بيقوموا بإجراءات الصرف للتجار بالإضافة للسواقين اللي بيجيبوا السلع لفرع الجملة، بالإضافة للسواقين اللي بيوصلوا السلع من فرع الجملة إلى محلات التموين، كلهم عايزين فلوس، ولو مدفعتش السلع تتأخر عليك وزباينك يزعلوا منك وممكن ينقلوا بطاقاتهم عند تاجر تاني السلع كلها موجودة عنده.
    على سبيل المثال: طن السكر هامش الربح اللي الوزارة محدداه للتاجر هو 250 جنية. الطن ده بيصرف كام لغاية ما يوصل لمحل التموين: 20 جنية لأمين المخزن، و20 جنية لأمين الخزينة اللي بيحرر الفاتورة، و20 جنية لسواق الجرار اللي وصل السكر لفرع الجملة ولو مأخدش هيطلع بالجرار على فرع جملة تاني بيدفع، والعمال اللي بينزلوا طن السكر من الجرار على السيارة النقل اللي هتوصله للمحل بيأخذوا 5 جنية، وصاحب السيارة النقل بياخذ مشال 50 جنية على الطن، والعمال اللي هتنزل الطن من السيارة النقل إلى المحل بيأخدوا 5 جنية على الطن برضوا، يبقى الطن اتكلف مصاريف 120 جنية من 250 جنية هامش الربح اللي محدداه الوزارة.
    ويا ريت حضرتك متقوليش اشتكوا وامتنعوا عن الدفع ، لأن ده حصل كتير دون جدوى والوزارة على علم تام بالكلام ده وساكته.
    المشكلة الثانية: إن المحافظة بعيدا عن وزارة التموين بتحصل على كل بطاقة من التاجر 50 قرشا معونة شتاء، (ودي طول السنة على فكرة) ورؤساء مكتب التموين بيحصلوها 75 قرشا مش 50 قرش بس.
    وبالتالي فالتاجر المحترم الشريف اللي عايز يمشي صح وراضي بالمكسب القليل لازم على الأقل يحصل 1 جنية فوق الإيصال علشان يغطي معونة الشتا بتاعت المحافظة ، والشنطة البلاستيك اللي بيطلبها الزبون.
    وهو ده اللي بيعطي الفرصة للتجار إنهم ياخدوا بالخمسة جنية زيادة على كل بطاقة، وإن كان دا مش مبرر، لكن أنا بفسر لحضرتك الموضوع من الجهات اللي محدش شايفها غير التجار.
    وأسف على التطويل.

    رد على هذا التعليق << to this comment

    • اشكرك جدا على الشرح الوافى – كل اللى ذكرته يعتبر “اتاوات” وليست اكراميات – لان الاكراميات بتدفعها عن طيب خاطر – اما الاتاوات فاما الدفع واما عدم التسليم – كدة يبقوا البقالين معذورين وكمان مجنى عليهم – والعيب يبقى على الحكومة ممثلة فى السيد وزير التموين اللى اكيد عارف ان المنظومة فاسدة كدة ومع ذلك لا يتحرك لوقف تلك المهزلة – وبصراحة احنا شعب صعب جدا او يمكن مستحيل تنظيمه – لان دايما هناك ثغرات يتم استغلالها والناس بقت تستحل السحت وتدخل بيه على عيالها وكأنه مال حلال – لكن لو تم اعتقال عدد من امناء المخازن والشيالين والسواقين وموظفى مكاتب التموين اللى بياخدوا فلوس من تجار التموين وتقديمهم لمحاكمات عاجلة بتهمة الاختلاس والرشوة – ولو تم نشر الخبر باسماؤهم وصورهم فى جميع وسائل الاعلام – لكان هذا رادعا قويا لامثالهم – الموضوع كله فى الادارة – لو الوزارة بتدار بكفاءة وذكاء وحزم لا يمكن هذا العبث يستمر

      اما الالة الحاسبة فهى امكانياتها بسيطة ولايمكنها تخزين بيانات – فهى تصلح للاستخدام الفورى فقط ولا تسجل ما سبق
      بالنسبة لرقم البطاقة هل تقدر يبقى عندك وقت تدخله انت او الموظف فى خانته مع كل عملية بيع؟
      والرقم دة بيكون من كام رقم – اقصد مثلا 6 ارقام؟ وللا سبعة وللا اكتر؟
      وعدد البطاقات اللى بتتعامل معاها تقريبا كام بطاقة كحد اقصى؟ 1000 وللا 10000 وللا اكتر؟

      انا حاعمل لك شيت على شكل سطور – كل سطر يبدأ بادخال رقم البطاقة وعدد الافراد – وفى نفس السطر تدون الكميات اللى اخذها المواطن – وفى نفس السطر حيظهر لك حسابه كام بالتفصيل – يعنى الشيت دة مش بس حيحسب لك مبيعاتك وفلوسك لأ كمان تقدر تستغنى بيه عن الالة الحاسبة لانه كمان حيحسب لك حساب تفصيلى لكل صاحب بطاقة

      وهكذا كل بطاقة حيبقى لها سطر – بس لازم تدخل رقم البطاقة فى الاول عشان تعرف بعد كدة بطاقة رقم كذا خدت ايه وأى بطاقة تجيلك حتعرف لو صرفت من قبل ام لا – ولو صرفت اكثر من مرة فى نفس الشهر برضه حتعرف من عدد السطور اللى بنفس رقم البطاقة – ولو مالهاش ولا سطر يبقى ماصرفتش الشهر دة اى حاجة لسه
      وحيكون عندك شيت تانى تقيد فيه البضاعة الواردة بالتاريخ والصنف والكمية العددية فى الخانات المخصصة لكل صنف
      وحتعرف باستمرار المتبقى فى المخزن بعد كل بيعة عشان تبقى عارف من قبلها ايه اللى بيخلص بسرعة ماتبيعش منه كتير وايه اللى رصيده كبير فتشجع الناس على شراؤه عشان تبيع منه اكتر

      انت عايز جملة المبيعات يوميا؟ وكمان الكميات المباعة يوميا؟ ولا عايزهم بالشهر؟ وللا الاتنين يومى وشهرى؟

      رد على هذا التعليق << to this comment

  13. ربنا يكرمك يا حاج محمد وشاكر لك جدًا.
    – بالنسبة لأرقام البطاقات الذكية فكل بطاقة تتكون من 12 رقم.
    – عدد البطاقات التي أتعامل معها من 2000 إلى 3000.
    – وكنت عايز جملة المبيعات يومي وشهري بعد إذنك.

    رد على هذا التعليق << to this comment

    • تفضل الملف اللى حضرتك طلبته جاهز للتنزيل من هنا:
      http://my2cents.gawaher.com/8269

      أرجو ان تجربه وتقول لى رأيك – ولو لقيت أى حاجة غلط او أى تعديل تحب اضيفه انا فى الانتظار
      ملحوظة: ماتستخدمش الملف الاصلى – اعمل منه نسخة واستخدمها للشهر الحالى – وخلى الاصلى فاضى عشان تعمل منه نسخ لكل شهر بعد كدة باذن الله
      (ملحوظة: ياريت ترد اسفل الرد دة – بالضغط على “اضف ردك على هذا التعليق” – بدلا من كتابة رد جديد – عشان اعرف ترتيب الردود بعد اذنك)

      رد على هذا التعليق << to this comment

  14. السلام عليكم ورحمة الله وبركاته
    بارك الله فيك وجزاك الله خيرا وجعل هذا العمل فى ميزان حسناتك
    ارجو من حضرتك تصميم برنامج خاص بالبقاله التموينيه الخاصة بى على النحو الموضح فى الملف المرفق
    على ان يكون فيه ( 1- مسلسل 2- اسم صاحب البطاقه 3- رقم البطاقه التموينيه 4- عد الافراد 5- ثم السلع التموينيه سكر – ارز – مكرونه – زيت – شاى – وترك اربع او خمس خانات فارغين لاضافة اى سلع اخرى مستلمه .
    البرنامج مصمم به الوارد- المباع – الجرد اليومى -البحث عن مستلم السلع بالاسم او برقم البطاقه لتسهيل عملية الصرف ولو هناك امكانية فرز المتبقى من الاسماء الغير مستلمه للسلع من المستلمه اكون شاكر جدا لك
    ……….
    امكانية معرفة هل الشخص صرف السلع او لا وتاريخ الصرف بمجرد البحث عنه بالاسم
    شكرا لك ومتاسف على الاطاله

    رد على هذا التعليق << to this comment

      • شكرا اخينا الكريم على ردك السريع
        الجدول ممتاز جدا جدا ويناسب الجميع ولكن اسمحلى انا من الارياف فاريد من حضرتك عمل نموزج مصغر لهذا الجدول تكون السلع فيه قليله بدلا من 30 سلعه هذه
        ويا حبذا لو كان التصميم كما ذكرت لحضرتك سابقا
        1- مسلسل 2- التاريخ 4-الاسم 5- رقم البطاقه
        ثم بقية عناصر الجدول كما هى مع الاختصار فى السلع وليكن اضافة سلع اساسيه فقط ( سكر – ارز – مكرونه – شاى – زيت – مع ترك 4 خانات اخرى فارغه تحسبا لاستلام سلع اخرى )
        سيدى الفاضل ليس المهم عندى تحديد انواع السكر ولا الزيوت فى الجدول فكلمة سكر او زيت تكفى
        اسف على الاطاله
        وكل عام وحضرتك بخير

        رد على هذا التعليق << to this comment

        • بالرغم من ان طلبك قد يبدو بسيطا لكن فى الحقيقة هو صعب التنفيذ لعدة اسباب
          الجداول عشان تحسب لك كل حاجة لازم اسجل فيها سعر كل حاجة – لكن ..
          اولا انواع السكر اسعارها مختلفة – فلو عملت السكر كله خانة واحدة يبقى حاستخدم انهى سعر – 4.25 وللا 4.50
          العمولة مختلفة كمان – يبقى احسب على 15 قرش وللا ربع جنيه
          لو عملت لك 4 خانات فاضية حيكون سعر وعمولة كل منها كام
          لازم البرنامج عشان يحسب لك صح وبدقة انه يكون عارف كل التفاصيل الصغيرة
          وحتى لو انا عملت لك بعض خانات السعر والعمولة فاضيين وانت اللى تحط فيهم الارقام – حيبقى دايما احتمال انك تكتب سعر بالخطأ وارد – وبالتالى الحساب كله يطلع غلط

          طب ما انت ممكن تستخدم نفس البرنامج زى ما هو لكن ما تكتبش حاجة الا فى الخانات اللى انت بتبيع وتشترى وتستلم فها – وباقى الخانات مش حتضرك فى حاجة – لكن وجودها يفيدك لو حصل فى المستقبل واستلمت نوع منهم وبدأت تبيع فيه

          انا جت لى فكرة
          تحب اعمل لك جداول فاضية انت اللى تسجل فيها اسماء السلع بالترتيب اللى يعجبك وكمان تسجل فيها الاسعار والعمولات الخاصة بكل سلعة؟ بس توعدنى انك تكتب العمولات والاسعار الرسمية – مع احترامى لحضرتك طبعا لكن لا انا اعرفك معرفة شخصية ولا انت تعرفنى – ويوجد وسطنا تجار كتير استغلاليين وانا لا احب ان اساعد اى حد على استغلال اى مواطن- فارجوك سامحنى فى صراحتى

          رد على هذا التعليق << to this comment

          • شكرا اخى الكريم على ردك
            انا معك فى كل كلمة قلتها وحاشا لله ان استغل احد فى اى شىء
            والعمليه فى النهاية عمليت ضمير وعلاقه بين العبد وربه
            ولعلم سيادتكم انا لسه تاجر معتمد جديد من 10 شهور فقط والحمد لله سبب طلب الاعتماد مساعدة الناس فى الحصول على حقها التموينى فى قريتها بدلا من التشتت على القرى المجاوره
            اما من ناحية الجداول فانا هدفى سلع بدون اسعار حتى اتمكن من الجرد السريع
            فالجدول هدفه تنظيمى لى وللسلع المستلمه من التموين والمنصرفه والباقى والناس المستلمه للسلع والغير مستلمه يعنى فى النهاية افتح البرنامج واعرف رصيدى كام فى السلع وباقى كام من الناس لم تصرف سلع واسمائهم
            متاسف على الاطاله
            وشكرا لكم

          • تفضل الملف اللى طلبته حتلاقى الرابط بتاعه فى آخر الموضوع التالى
            http://my2cents.gawaher.com/8269
            جربه ولو عايز اى تعديل لا تترد فى طلبه منى
            وربنا يكرمك ويوفقك وتبقى من كبار التجار باذن الله

  15. شكرا لحضرتك وبارك الله فيك
    نزلت الملف وحبيت استخدمه
    عند كتابة الاسماء تحت خانة الاسم تظهر لى الكلمه التاليه
    Protected cells can not be modified
    ولا استطيع كتابة اى اسم
    معزره هتعبك معى

    رد على هذا التعليق << to this comment

    • ولا يهمك – تم تعديل الملف – نزل النسخة المعدلة الان
      هو عدد البطاقات الى بتتعامل فيها كام بطاقة؟
      على فكرة لو حتسجل الاسماء وارقام البطاقات ممكن تسجلهم كلهم مرة واحدة – وبعدين تعمل نسخة من الملف جاهز بالاسماء كل شهر عشان ما تحتاجش تكتبهم كل مرة – المهم تخلى نسخة بالاسماء بدون بيانات الوارد والمبيعات

      رد على هذا التعليق << to this comment

  16. شكرا لك وبارك الله فيك فعلا تم التعديل ولكن ظهرت نفس المشكله عند كتابة السلع
    فالرجاء من حضرتك التعديل دا اولا.
    ثانيا خانة رقم البطاقة صغيره ولا تتسع لرقم البطاقه المكون من 12 رقم .
    ثالثا : اشكرك على فكرتك وهى نفس الفكره التى كانت فى مخى بان اسجل الاسماء مره واحد واعمل نسخة منها كل شهر بالاضافة الى اضافة الاسماء الجديده
    مع العلم ان عدد البطايق مبدئيا 300 بطاقه
    شكرا لك وجذاك الله خيرا بحق هذه الايام المباركه

    رد على هذا التعليق << to this comment

    • استأذنك نكون اكثر دقة فى كلامنا عشان تساعدنى افهمك احسن – انت بتقول “عند كتابة السلع” والجملة دى ممكن يكون لها اكثر من معنى:
      – اسماء السلع
      – عدد السلع
      – سعر السلع
      – ربح السلع
      فاى المعانى تقصد؟
      ان كنت تقصد اسماء السلع: هل انت متأكد من انك اتبعت الارشادات حرفياً؟ – لان انت المفروض تكتب اسماء السلع فى جدول المخزون السلعى فقط – والاسماء اللى حتكتبها فيها هتتنقل تلقائيا الى باقى الجداول – عشان كدة لو حاولت تكتبها فى الجداول الاخرى مش حتسمح لك
      الجداول بتسمح لك بتتسجيل 5000 بطاقة
      هل تشعر وانت بتستخدم الجداول انها بطيئة؟
      لو كدة قل لى وانا اعمل لك جداول تاخد مثلا 500 او 1000 عشان تبقى سريعة

      وعلى فكرة – الاطالة لا تدعو للاعتذار – بل تستحق الشكر – فكلما قرأت تفاصيل أكثر كلما كان هذا من دواعى سرورى لانه يساعدنى على خدمة الناس بشكل افضل – فى حين ان الاختصار يزعجنى ويتعبنى جدا ويصعب الامور علىً ويجعلنى اضرب اخماس فى اسداس

      رد على هذا التعليق << to this comment

  17. اخى الفاضل
    فى النسخه الجاهزه لحساب تاجر التموين التى فيها الاسعار وكل شى
    نسخة ميه ميه وسوف اطبقها ايضا عندما احضر طابعة للجهاز
    ولكن ينقصها اسم صاحب البطاقه والمسلسل للبطايق وتوسيع خانة رقم البطاقه
    فلو تم التعديل باضافة هذه الاعمده سيكون برنامج كامل والكمال لله وحده
    وهتوفر كتير
    اطمع فى كرم حضرتك بعمل هذه الاضافات لهذا الجدول ايضا
    متاسف على الاطاله
    وشكرا لحضرتك

    رد على هذا التعليق << to this comment

  18. لو سمحت أريد جدول اكسيل لجمعيه شهريه
    يكون بها أسماء الأفراد
    والشهور (أكتب البدايه وهو يكمل الى المده المطلوبه )
    مكان لادخال التسديدات الشهرية لكل فرد
    يجمع المجموع تلقائي
    أقدر أعرف مين الي مدفعش ومين الي لسه عنده فلوس

    وشكرا لحضرتك على خدماتك وبارك الله فيك
    https://www.facebook.com/goldenmask52

    رد على هذا التعليق << to this comment

  20. حاج محمد … كل عام وانت بخير
    انا كنت كلمتك قبل كده على الملف الاكسيل دا ( بالمرفقات ) انا سبته فتره طويله وجيت اخلص فيه النهارده بس لقيت كام مشكله كده اتمني انك تساعدني فيهم
    1- البيانات بالصفحه الاولي ( مبيعات ) مش بتترحل للصفحات الفرعية ( الشركات ) الا لما اشيل الفلتر واعمله تاني حتي لو عملت تحديث بيانات ( هيا اتحلت ب CTRL ALT L لما راجعت ردك الاخير — بس مفيش اي حل انها تتعمل تلقائي ؟؟
    2- الملف حجمه 2 ميجا وبيفتح ببطء مع اني حاولت افضيه بقدر المستطاع ( لو ممكن تراجع الملف في حالة وجود حاجه ممكن اختصرها )

    3-كلمة السر بتاع تعديل البيان بعد كتابته فى الصفحه الاولي فشلت فى عملها
    4- في خانة التاريخ لازم اكتب الشهر الاول وبعدين اليوم – بمعني لو كتبت 13/5 الثلاثة عشر الاول وبعدين الخمسة تبقي غلط ولازم اكتب ال 5 الاول ؟؟
    http://www.filedropper.com/test1onewayhome3

    رد على هذا التعليق << to this comment

    • بالنسبة للفلتر لايوجد تحديث تلقائي لازم الشورتكت
      الملف تقدر تصغر حجمه لو صغرت عدد الصفوف rows
      بالنسبة للتاريخ دة يرجع لضبط الويندوز فى جهازك لو فى كنترول بانل عدلت طريقة ظهور التاريخ حتلاقى الشيت بيقبل اليوم اولا قبل الشهر

      رد على هذا التعليق << to this comment

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.