آلة حاسبة تحسب لك اسعار السلع التموينية الجديدة فى رمضان

آخر تحديث : 24-08-2014 الساعة 10:40 ص

ملحوظة

بعد شهر رمضان انتقل الى هذه الصفحة:
آلة حاسبة للسلع التموينية بعد رمضان

اليكم قائمة اسعار السلع التموينية الجديدة – وآلة حاسبة تسهل عليكم اختيار السلع وعددها حسب المبلغ المخصص لاسرتك – كل فرد فى البطاقة التموينية له مبلغ 15 جنيه تعطيه له الحكومة فى شكل سلع يختار منها مايشاء – مع زيادة 7 جنيهات للفرد فى شهر يوليو فقط بمناسبة رمضان – يعنى لو بطاقتك التموينية مقيد بها مثلا 5 افراد يبقى ليك 22×5 يعنى 110 جنيه (فى الشهور التالية ليك 5×15 يعنى 75 جنيه فقط) – المبلغ دة تشترى بيه اللى انت عاوزه بالاسعار الموضحة فى الجدول التالى – بدون مقابل – يعنى مجاناً طالما لم تتجاوز المبلغ المخصص للبطاقة – حتدفع بس مبلغ بسيط عمولة للبقال التموينى عن كل كيس او زجاجة تاخذها – ربح للبقال – حسب ماهو موضح فى الجدول التالىtmwn

 

لاحظوا ان كل بطاقة تدفع 2 جنيه رسوم فى شهر 7 (رمضان) لكن ابتداءا من شهر 8 والشهور التالية تدفع 1 جنيه رسوم فقط – وهذا المبلغ محسوب ضمن اجمالى المطلوب دفعه فى ايصال الماكينة الذى يستلمه المواطن من البقال التموينى – ولا يحق للبقال طلب أى مبلغ يزيد عما هو موضح فى هذا الايصال – وعلى المواطنين التأكد من استلام الايصال قبل الدفع لمنع أى استغلال لهم من بعض البقالين الذين يحاولون فرض مبالغ على المواطن ليست من حقهم

 

وقد اعددت لكم الحاسب الالى التالى ليساعدكم على معرفة المبلغ الذى يمكنكم شراء سلع به – كما يساعدكم على تحديد الكميات التى تريدونها من كل سلعة فى حدود المبلغ المخصص لكم

ملحوظة

الالة الحاسبة هنا تحسب 22 جنيه لكل فرد حيث اننا فى رمضان – وبعد رمضان اضغط هنا لاستخدام الآلة الحاسبة التى تحسب على اساس 15 جنيه للفرد

اكتب تحت كل سلعة تريدها العدد المطلوب منها – ستجد المبلغ المتبقى ينقص امام عينيك – استمر فى ادخال مزيد من اعداد السلع حتى ترى ان المبلغ المتبقى اصبح صفر

الالة الحاسبة يمكنكم استخدامها فورا وايضا يمكنكم حفظها على اجهزتكم (بالضغط على زر Ctrl + S مع بعض) واستخدامها فى أى وقت وأى مكان بدون الحاجة الى الاتصال بالنت – كما يمكنكم استخدام الالة من خلال الموبايل بنفس الطريقة من خلال متصفح الانترنت على موبايلك

بعد رمضان اضغط هنا لاستخدام الآلة الحاسبة التى تحسب على اساس 15 جنيه للفرد

تحديث

اشتكى كتير من المواطنين من استغلال بعض بقالين التموين لهم وأخذ نقود اضافية ليست من حقهم – وبعض البقالين لا يسلمون ايصال الماكينة للمواطن – هذا الايصال ضرورى ويجب على كل مواطن ان يصر على استلامه ليعرف حقه ولا يدفع أكثر من الموضح فى الايصال الرسمى – وبعض البقالين يكتبون ورقة بخط اليد بالحساب وهذا ايضا مرفوض – اطلب ايصال الماكينة المطبوع ولا تدفع شيئا الا ما هو موضح فى هذا الايصال

اليكم صورة لايصال الماكينة لبطاقة تموين بها 9 افراد فى شهر رمضان (22ج للفرد) – ستلاحظون ان كل كيس سكر او ارز عليه 25 قرش ربح للبقال لا أكثر – ونفس المبلغ لكل زجاجة زيت – وكل شئ محسوب فى الايصال – بما فيه 1 جنيه حافز يقالين و1 جنيه خدمة الكترونية

20140727_172445-002

المبلغ المطلوب دفعه للبقال هو السطر قبل الأخير “مستحق الدفع” – وهو حاصل جمع الصافى + هامش الربح + حافز بقالين + خدمة الكترونية

أما السطر الأخير فيظهر اذا كان لديك رصيد دعم لم تستخدمه – ويمكنك ان تشترى سلع اخرى به حتى لا تترك حقك

بعد رمضان اضغط هنا لاستخدام الآلة الحاسبة التى تحسب على اساس 15 جنيه للفرد

شارك هذا الموضوع
error

267 تعليق

  1. هل هناك حد أقصى من السلع لكل بطاقة تموينية؟
    اذا كانت الاجابة بنعم … ارجو التوضيح هل الحد الأقصى سيحسب ككميات لكل سلعة أم مبلغ معين؟
    اذا كانت الاجابة بلا …. فهل سيكون ذلك مدخل اخر لحدوث تجاوزات وبيع سلع مدعومة في السوق السوداء مثلا ؟
    وشكراً

    • لا يوجد حد أقصى – ولا توجد سلع مدعمة فى النظام الجديد – كل ما فى الامر هو بيع السلع بسعر جملة المفترض أن يقل قليلا عن سعر السوق – تماما كما فى عروض الهايبر المعروفة – ممكن تلاقى سلع ارخص فى الهايبر ماركت وسلع تانية أغلى – الاختيار لك
      مثلا زجاجة زيت دوار شمس 900جم وليس لتر سعرها فى التموين بعمولة البقال 10ج بينما فى المحمل تجد ماركة سلايت 3 لتر ب27 جنيه يعنى اللتر ب9ج – نفس الشئ بالنسبة للسكر المحلى – وحتى الارز ب4ج فى التموين و3.25 فى الاسواق الشعبية – اما المكرونة ففى التموين الكيلو ب4.29 وفى الاسواق الشعبية ب3.50 فقط – لذلك ليس من الحكمة ان نشترى زيت دوار شمس ولا سكر ولا ارز ولا مكرونة نقداً من بقال التموين – نأخذ فقط بقدر المبلغ المجانى المخصص للبطاقة
      السلعة الوحيدة التى وجدتها معقولة فى التموين: فول التدميس ب5ج – وهو نفس سعره فى الاسواق الشعبية – واللحمة ب30ج (لكن لو لحمة هندى يبقى لو ببلاش لا تشتروها)
      يمكنك قراءة تفاصيل أكثر هنا: http://my2cents.gawaher.com/7730

  2. طبعا بشركة على مجهودك وردك على المواطنين ولكن لي سؤال
    عايز اعرف بس بوضوح
    انا فرد واحد في البطاقة ولي دعم 15 ج
    انا هعرف من عند البقال ك سكر +ك أرز +زجاجة زيت هدف. هدفي فلوس أم لا
    حاجة ثانية
    ك السكر الواحد من البقال للمواطن بكام في التموين

  3. لو سمحت ياعمو محمد حضرتك بتقول للفرد 22 ج يأخذ بهم سلع تموينية هل سيدفع هذا المبلغ للتاجر أم عمولة التاجر فقط ؟
    وليكم أنا بطاقتي بفردين هل سأدفع للبقال 44 ج بما يقابلهم من سلع كما هو موضح من قبل ؟ أم سأدفع ربح التاجر فقط ؟

    • استاذ أحمد: الحكومة قررت تعطى لكل فرد من افراد اسرتك المقيدين ببطاقة التموين مبلغ 22 جنيه – وبعد رمضان 15 جنيه – تأخذهم فى شكل سلع – حتدفع فقط عمولة البقال والرسوم – كل ما عليك ادخال عدد الافراد فى البطاقة ثم عدد العبوات اللى عايزها من كل سلعة لغاية خانة المبلغ المتبقى ما تصل الى صفر – واللى حتدفعه نقدا حيظهر لك على طول

  4. السلام عليكم ورحمة الله وبركاته
    بارك الله فيك وجزاك الله خيراً على مجهودك
    ممكن توضيح لخانة إجمالى المطلوب دفعه نقداً (شاملاً رسوم 2.50ج)
    فبطاقتي عدد 2 فرد واخترت عدد 6 كيلو سكر محلي وعدد 4 كيس مكرونة
    فإجمالي المواد المختارة بقيمة 34.80 جم – وربح البقال 2.10 جم – والمبلغ المتبقى 9.20 – وإجمالى المطلوب دفعه نقداً (شاملاً رسوم 2.50ج) 4.60 جم ؟ فهل لي رصيد أم ماذا ؟؟ أرجو التوضيح .

    • يبقى حضرتك سايب للحكومة 9.20ج – اما عمولة البقال فدى بتدفعها نقدى حتى لو كان ليك رصيد لم تستخدمه – ونفس الشئ بالنسبة للرسوم 2.50 بتدفعها نقدى بغض النظر اشتريت بكام ولا انتوا كام فرد لانه مبلغ ثابت على الكل – الأفضل انك تزود اختياراتك لغاية مايوصل الباقى الى صفر

  5. جزاك الله خيراً
    هل يمكن الرجوع الى التاجر مرة أخرى وذيادة الاختيارات أم لا يمكنني علماً بأننى صرفت ما ذكرتة لحضرتك ولم يأخذ منى التاجر لا عمولة بقال ولا حتي الرسوم ؟؟؟

  6. من فضلكم انا اخدت تموينى الشهر ده وهو عدد ١٥ سكر و ١٠ زيت و ٨ مكرونه ١ دقيق كبير ١ صلصه ،
    المفروض ادفع كام بالظبط. مع العلم ان عدد افراد البطاقه ٩ أفراد
    المفروض ادفع كام فى شهر رمضان
    والمفروض ادفع كام بعد شهر رمضان
    افيدونا وجزاكم الله خير

  7. من فضلك حضرتك ما ردتش على.
    انا دفعت للبقال والله ٥٠ ج
    والناس كتير كانو بيدفعو.
    اكتر او اقل من المبلغ ده وكانو مستغربين
    وكانو بيقولو اما التليفزيون كان بيقول حاجه تانيه غير الكلام ده
    احنا مش عارفين حاجه
    يعنى انا اللى دفعته للبقال ده. كتير والا قليل
    والا احول من عنده لبقال تانى
    افيدونا من فضلكم

    • آسف للتأخير – كدة البقال أخد 40 جنيه ليسوا من حقه – لا تترك حقك – ارجع له وخد فلوسك اللى اخذها بدون وجه حق – طب هل اعطاك الايصال اللى بيطلع من الماكينة؟ لو معاك الايصال اكتب لنا عنا سعر كل صنف بالتفصيل عشان نعرف الغلط جه منين – ولو فيه خطأ حنقولك

  8. من فضلك يا عمو محمد
    حضرتك ماردتش على
    انا لم اقول شيئا يغضبك
    انا حبيت اعرف مين اللى بيسرقنى
    ده مزعلك فى ايه
    انا كل اللى قلته انى دفعت ٥٠ ج
    فى ١٥ سكر مكتوب عليه فريست و
    ١٠ زيت مرجانه خليط و
    ٨ مكرونه و
    ١ برطمان صلصه و
    ١ كيس دقيق كبير
    افيدونا بالله عليكم هل ده حقى والا احول نفسى الى بقال اخر
    وشكرا

    • أخى العزيز انا رديت عليك على طول – لكن الظاهر حضرتك لم تقرأ الرد – بص فوق شوية حتلاقى ردى تحت تعليقك على طول
      ولو الايميل بتاعك مظبوط حتلاقى يجيلك اخطار بمجرد كتابة رد لأى من تعليقاتك هنا – من فضلك تأكد من الايميل وافتحه حتلاقى الاخطارات اللى اتبعتت لك
      ومفيش زعل ولا أى حاجة لا سمح الله – ومنتظر ردك على اسئلتى عشان اقدر اساعدك – وياريت لو حد تانى دفع كتير كدة يقول لنا – عايزين نعرف دى حالات فردية من بقالين بلا ضمير وللا ايه بالظبط

      • اكرمكم الله
        يعن انا المفروض ادفع كام
        والمفروض ان مفتشين التموين يكونو ا موجودين اثناء صرف التموين
        ويعرفوا الناس بصوت عالى عشان الناس. مش فاهمه حاجه
        وزى بتاع التموين ما بيقولنا بندفع واحنا زى الجزم
        ياريت حضرتك تقول للمسؤلين
        والله هتكسب ثواب
        اسم البقال زينب عبد الهادى
        وعنوانه. ٧٧ ش السلام عين شمس الشرقيه
        وياريت الصحافه تيجى وتصور السرقه اللى بتحصل
        قبل ما الناس تعمل مشاكل
        والناس بتقول ان الوزاره مشتركه معاهم فى سرقه الشعب
        اللهم بلغت اللهم فأشهد

  9. الاستاذ الفاضل صرفت تمويني لكن لي بعض الاستفسارات المهمه اولا عدد السلع لدي التاجر لم تكن هي المعلن عنها لما سالته قال كبر دماغك ثانيا عرض علينا نوعين من الزيوت الاول قال ان سعره75و9 اسمه الممتاز(1 لتر)مكوناته زيت دوار الشمس-انتاج شركه ارما للزيوت -العاشر من رمضان-والسكر اسمه التجاري رحمه مكتوب عليه سكر ابيض مستورد سعر الكيس 50و4 اما الارو مكتوب عليه رزالملكه والغؤيبه لا يوجد عليه سعر
    بطاقتي 5 افراد استحق دعما قدره110 5 زجاجات زيت من نفس النوع المشار اليه +10 اكياس سكر +4 رزالبائع طلب مبلغ 11 جنيه -لما سألته قال الربح + الرسوم 50و7==والباقي دمغه ومشال فهل هذل ضحيح تملا
    لمن الجأ اذا كان هناك خطا ؟؟؟ رفض البائع تسليمي ايصال الماكينه بحجه انه طلب منه ذلك للمراجعه
    ثالثا المقررات المتوفره لديه من الزيةت صنفان فقط ما اشرت اليه والاخر سعره 75و7
    كانت عروضه كالاتي عندنا زيت بسعر 10–واخر بسعر 8

    سيدي عندما احصل علي تلك المقررات من البائع وانا اريد لحوم فكيف احصل عليها بدون الايصال ال1ي لم احصل عليه من الباءع يقول الباءع اذهب الي المجمعات الاستهلاكيه وتعامل معها
    حلو اذن هل توجد نفس الماكينان في المجمعات الاستهلاكيه -اذن عليه استطيع الحصول علي طلباتي من هناك افضل من هذا التعقيد والنصب ارجو توضيح حقوقي من فضلك واذا كانت هناك ارقام تليفونات سريعه ياريت تفيدنا بيها

    • يبدو ان بعض تجار التموين اتفقوا على سرقة المواطنين ولا حول ولا قوة الا بالله – حضرتك أقل واحد اتسرقت – البقال المفروض ياخد منك 7.25 فقط – يعنى أخد 3.75 بدون وجه حق – سرقة يعنى – عشان كدة رفض يعطيك ايصال الماكينة لانه حيكشف لك انه حرامى – وكان لازم حضرتك ترفض الدفع الا اذا سلمك الايصال – لو كل مواطن تمسك بحقه لما تمكن هؤلاء معدومى الضمير من سرقة المواطنين فى رمضان! مواطنين آخرين اتسرقوا فى 40 وخمسين جنيه
      رسوم البقال 2.50 فقط وليس 7.50 كما يدعى – والمشال وباقى المصاريف على البقال ولا علاقة للمواطن به باى حال من الاحوال – وكيلو السكر المستورد سعره 4.25 كما ورد بقائمة وزارة التموين وليس 4.50
      انصحك تبلغ مكتب التموين التابع له ليتم شطب هذا البقال وايقاف نشاطه – بس مش عارف حتثبت دة ازاى من غير ايصال – حاول تاخد معاك مواطنين آخرين حدث معهم نفس النصب من نفس البقال

  10. الاستاذ الفاضل مشكور سيادتك جدا لكن احب ان اوضح بعض النقاط اليوم الجمعه ذهبت الي التاجر واصريت علي الايصال ومراجعه الحساب وفي حاله رفضه عليه ان يعطيني ورقه بذلك او سوف استشهد ببعض المواطنينن وايضا كلبت منه قائمه السلع المتوفره لديه ووضعها كعينات وكتابه الاسعار عليها لكي يقرر العميل ما1ا يختار رفض في البدايه محاورا اياي انته اخدت ايه من اي صنف وانا تحت امرك طيب روح هات التموين

    اصل الايصالات بيطلبوها مني للمراجعه انا ممكن اصور ليك الايصال—طيب ممكن اعمل ليك واحد تاني من علي الماكينه –تلك كانت الردودد -جاريته لاصل معاه للنهايه بكل ادب بدون ان اخرج عن شعوري
    وفي النهايه اكتشفت التلاعب الذي ارجو من حضرتك توعيه الناس به
    وهو ان التاجر يتلاعب بالاصناف ويستغل جهل الناس يقدم مثلا الزيت الاقل سعرا بال1ي اعلي منه وايضا في الشاي والمكرونه ل1ا ارجوك في كل المواقع وضح 1لك للناس وسوف اسرد لك ماحدث التاجر اسمه ورثه رزق محمد علي يتبع داءره اساحل روض الفرج رابع —تم اكتشاف الاتي ان الزيت الذي عرضه علي وتمت محاسبتي عليه هو جليط وليس زيت عباد الشمس كانت هناك سرقه في كل عبوه اتنين جنيه يعني 5 زجاجات 10 جنيه —-ده اول بند ارجعت الزيت واستبدلته بزيت عباد الشمس الصافي وده مهم جدا ان المواطن يقرا الي مكتوب علي المنتج ويعرف السعر من الكشفالي عند البقال ويكلع عليه –كمان اعترضت انه لايوجد مششال فقال طيب عاوز معونه شتا
    فسجت منه وقلا له ده كان ايام مرسي ياروح بابا كان بيسرقوا الناس اما دلوقتي لاالريس بتاعنا هو الي بيدينا موش بياخد مننا وانته كمان بتاخد حقك مفيش حد بيجصم منك حاجه بلاش سرقه بقه وانضفوا – تصدق انه طبع الايصال وعليه نفس الحجات الي اخدتها طلبت منه الفرق بعد ان يقرأ ماهو اجمالي المبلغ المطلوب فاجاب 7 جنيهات فقط وفعلا طلبت الفرق كان هناك كيس رز اخدته وتسلمت منه مبلغ 3 جنيه وتعلل بعدم وجود فكه فنظرت اليه ساخرا وقلت له سوف احاسبك عليه المره القادمه
    سيدي الفاضل بالمناسبه المبلغ الموضوع بالاله الحاسبه فيه جطائ مايستحقه التاجر من هامش ربح علاوه علي مبلغ 1 واحد جنيه حافز تشجيعي للتاجر –وايضا واحد جنيه خدمات اليكترونيه وهو ما اوضحته الماكينه اذن لا يستحق نصف جنيه ارجو التصحيحح واعلام الجميع واشكرك للردك

    • أشكر حضرتك على المتابعة – وأرجو من كل المواطنين الحذر عند صرف التموين والاستفادة من تجربة استاذ محمد أنور ونصيحته بضرورة التأكد من نوع السلع حتى لا يحدث خداع وتبديل السلع باصناف اقل جودة – ويجب على كل مواطن الاصرار على استلام ايصال الماكينة ومراجعته قبل الدفع حتى تتأكدوا من ان السلع التى استلمتوها هى نفسها المذكورة فى الايصال – ورفض دفع أى رسوم يدعيها البقال سوى ماهو موضح بالايصال فقط لاغير
      اما بالنسبة لمعونة الشتاء 50 قرش فهذه المعلومة ذكرها لى أكثر من تاجر هنا – ياريت حد يأكد لى المعلومة دى قبل ما الغيها من الالة الحاسبة – زمان كانت معونة الشتاء بستلم طوابع بقمتها – فين الطوابع بقى؟

  11. ارجو من سيادتك هل يحق لي ان استرد قيمه دعم الخبز لعدد 5 افراد لاني حتي الان لم احصل علي رغيف واحد ببطاقتي التموينيه ظظظ ومن اي مكان استرده ظظظ هل من البقال ظظ ام من المخبز ام من المجمعات الاستهلاكيه ام من الافران وما قيمه هذا الدعم لعدد 5 افراد وشكرا

    • كل فرد له 5 ارغفة فى اليوم – يعنى 150 زغيف فى الشهر – كل رغيف لم تأخذه يعطوك بداله 10 قروش – يعنى كدة 15 جنيه للفرد فى خمسة يساوى 75 جنيه فى الشهر طالما لم تأخذ عيش طول الشهر ويضافوا الى رصيدك فى البطاقة الذكية – تأخذ بهم سلع اضافية من البقال التموينى زيادة على المبلغ المخصص للتموين

  12. طيب بما ان تاجر التموين اللى بتعامل معاه زمته واسعة جدا ربحه اللى بياخده هيكون مذكور فى الفاتورة اللى بيدهالى وﻻ هو اللى بيقولى عليها ﻻن كدة بنكون لحمه طريه فى بقه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.