سر القطايف المقرمشة الهشة

آخر تحديث : 08-06-2016 الساعة 01:20 ص

قناس كتير بتعمل القطايف وبتطلع يا اما ناشفة قوى يا اما طرية – لكن طبعا كلنا بنحبها تكون مقرمشة وهشة – اليكم السر:

  • أهم نصيحة للحصول على قطايف هشة ومقرمشة اننا نعمل العجينة فى البيت – وهى سهلة جداً – للطريقة اضغط هنا – اما عند شراء القطايف نختار البائع اللى القطايف بتاعته فيها خروم كبيرة كثيرة – دة معناه انها اتخمرت كويس وعند قليها حتطلع هشة – اما القطايف الملساء الخالية من الخروم بيكون البائع استعجل ولم يعطها وقت كافى للتخمير وعند قليها حتطلع ناشفة كالخشب
  • لازم تكون القطايف اللى نشتريها تكون طازجة وطرية – وتكون متغطية ومعزولة تماما عن الهواء من لحظة شراءها او عملها لحد ما نبدأ فى تحميرها – لو اتعرضت للهواء حتنشف وتبقى صلبة عند القلى
  • الذ حشو للقطايف نجهز خليط مكون من سودانى حلوانى مجروش مع جوز هند وسكر – ونحشى القطايف من الوجه المخرم – وبعدين نقفلها كويس بالضغط على طروفها جيدا باصابعنا
  • نقدح الزيت كويس – وبعد وضع القطايف فى الزيت نهدى النار ونتركها خمس دقائق ونقلبها ونكرر
  • لانستعجل فى التحمير – لازم ننتظر حتى يبقى لونها احمر – وقبل رفعها من الزيت نعلى النار حتى تحمر جيدا – ضرورى يكون لونها احمر عشان تبقى مقرمشة – بس مانتركهاش زيادة عند اللزوم لغاية ماتبقى سوداء طبعا
  • نضعها فى مصفاة ونتركها تصفى زيتها وتقل سخونتها – لازم ما تكونش سخنة قوى واحنا بنحطها فى الشربات
  • الشربات لازم يكون تقيل مش خفيف – يعنى كوب وربع سكر على كوب ماء – ومايكونش ساقع من الثلاجة – الافضل يكون دافى او بدرجة حرارة الغرفة (لو فى الثلاجة نطلعه قبلها بساعة على الاقل)
  • عند غمر القطايف فى الشربات نتركها أقل من دقيقة ثم نرفعها فوراً – لو تركناها كتير حتبقى طرية
  • اذا كنتى بتصنعى القطايف بنفسك فى البيت لا تستخدمى الحليب او بودرة حليب – لان الحليب بيخلى اى عجينة تبقى طرية وكدة مش حتقرمش

2 تعليقان

اترك رداً على امال عبد العزيز إلغاء الرد

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.