كفتة حاتى فى الفرن من اسرار الكبابجية

(آخر تحديث 4-9-2017)

مهما عملنا كفتة فى البيت بنلاقى ان كفتة الحاتى أطعم – لكن بعد ما تعرفوا هنا اسرار الكبابجية حتقدروا تعملوا كفتة حاتى ولا احلى كبابجى – حنشويها بالظبط فى ربع ساعة فقط! – بدون تعب وبهدلة الفحم ولا اضراره الصحية – حنستخدم فقط قطعة واحدة صغيرة من الفحم عشان ناخد منها دخان ونكهة الكبابجى

سر كفتة حاتى الكبابجية يتلخص اولا فى ان يكون اللحم المفروم به دهن – او اذا كان احمر نضيف له لية ضانى – لاكساب اللحمة المفرومة طعامة الشوى الضانى – وثانيا اضافة ارز مطحون ليتشرب السوائل من الكفتة أثناء الشوى فلا تكش بل تطلع كما هى بنفس الجحم بل اكبر قليلا ومحتفظة بطعامة الكفتة


المقادير

  • نصف كيلو لحم كندوز مفروم بالدهن (اذا كان لحم احمر نضيف ثمن كيلو لية ضانى)
  • ربع كيلو بصل
  • 100جم ارز مطحون ناعم
  • معلقة صغيرة ملح
  • معلقة صغيرة روزمارى مطحون (او معلقة صغيرة فلفل اسود + نصف معلقة صغيرة كبابة صينى)
  • معلقة صغيرة ملح صينى
  • ثمن معلقة صغيرة قرفة
  • عصير ليمونة
  •  معلقة كبيرة زيت

الطريقة

  • نطحن الارز فى مطحنة التوابل حتى يصير ناعم
  • نفرم البصلة فى الكبة نبضات متقطعة – عايزين البصل فتافيت لكن من غير ما يتحول لعصير
  • نضرب اللية فى الكبة حتى تصبح ناعمة
  • نخلط الكل مع اللحمة فى طبق كبير ونعجنهم مع بعض باليد كويس قوى
  • نترك الطبق فى الثلاجة ليلة او 8 ساعات
  • نقسم اللحمة ونشكل 16 كورة
  • نصبع الكفتة 16 صباع على سيخ أو يد معلقة خشب او حتى قلم رصاص – ونرصهم فى صينية تيفال – نلف يد المعلقة الخشب واحنا بنسحب الكفتة عشان طولها يفضل زى ما هو
  • نشعل الشواية العلوية لفرن البوتاجاز
  • نضع الصينية فى الرف الاوسط تحت الشواية لمدة 9 دقائق
  • لو عايزين نكهة الفحم فى الكفتة: نحضر قطعة فحم صغيرة وقطعة صغيرة من ورقة فويل نطبقها مجوز ونحيط بها الفحمة ونطبقها عليها فى كف ايدنا لتصبح كالطبق على مقاس الفحمة – وبعدين نركن الطبق ونحط قطعة الفحم على نار البوتاجاز حتى تتوهج
  • نخرج الصينية ونقلب الكفتة على ظهرها وبواسطة مساكة حديد نضع قطعة الفحم المتوهجة فى الطبق الفويل بتاعها ونحطه فى وسط الصينية ونرش على الفحمة معلقة من بهريز الكفتة اللى فى قعر الصينية عشان تعمل دخان الكبابجى ونعيد الصينية فورا تحت الشواية ونقفل باب الفرن 5 دقائق
  • نخرجها وتقدم ساخنة فى طبق مفروش بالبقدونس مع سلطة طحينة

لمعرفة طريقة جميلة لسلطة الطحينة اضغط هنا

 

 

لو الموضوع نال اعجابك اضغط هنا لدعم الكاتب (جزاكم الله خيراً)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *