طريقة عمل المايونيز والثومية

عندى ليك مفاجأة النهاردة اضغط هنا عشان تشوفها (مفاجأة جديدة كل يوم)

بعد سنوات من الفشل قدرت مؤخراً اتقن عمل المايونيز – بطريقة سهلة جداً – بل زادت خبرتى فى صنعه حتى عرفت ازاى اجعله جامد مش طرى وبكمية أقل من الزيت – اليكم الطريقة بالتفصيل

اضغط هنا

المقادير

  • 1 بيضة
  • ملعقة مستردة
  • ربع ملعقة صغيرة ملح
  • ربع ملعقة صغيرة شطة
  • ملعقة صغيرة فلفل اسود
  • كوب زيت دوار شمس او ذرة
  • ملعقة خل وملعقة عصير ليمون

الادوات

  • خلاط صغير او كبة – والأفضل الميكسر اللى بيتمسك باليد وسلاحه مبطط فى القعر

الطريقة

  • نضرب اولا البيضة لوحدها لغاية ما تعمل رغاوى وتبقى هشة
  • نضيف الملح والشطة ونضربهم جيدا
  • نضيف قليل من الزيت – ملعقتين ثلاثة – ونضرب تانى لثوانى
  • نضيف زيت اكثر – حوالى ربع كوب – ونضرب تانى
  • نضيف باقى الزيت ونضرب تانى
  • نضيف المستردة والخل وعصير الليمون والفلفل ونضرب مرة اخيرة

ملاحظات

  • لو الخلاط او الكبة عندك بها فتحة من فوق الافضل نصب الزيت سرسوب صغير اثناء ضرب البيض والملح
  • ضرب البيض لوحده اولا يجعل المايونيز هش وجميل
  • ضرب البيض والملح والشطة لوحدهم مع قليل من الزيت يخللى المايونيز يتقل ومايبقاش طرى –  بكمية أقل من الزيت

ثومية

ممكن نعمل بنفس الطريقة ثومية garlic sauce خطيرة بتعديل بسيط – والمقادير 6 فقط: بيض وملح وثوم وزيت وليمون وخل

  • نضرب البيضة والملح لغاية ما تتكون فقاعات
  • نضيف زيت دوار شمس بالتدريج ولما يبدأ يتقل نحط 5 فصوص ثوم كبار مهروسين ونضرب لغلية ما يبقوا ناعمين
  • نستمر فى اضافة زيت بالتدريج بنفس طريقة المايونيز لغلية ما يجمد
  • فى الآخر نضيف عصير ليمونة كبيرة ومعلقة كبيرة خل ونضرب مرة أخيرة
  • لا نستخدم مستردة ولا شطة ولا فلفل اسود
  • نحفظ المايونيز والثومية فى الثلاجة

ثومية أصلية

الطريقى التقليدية الاصلية للثومية اللبنانى تختلف عن الطريقة السابقة – انا لسة ما جربتهاش بس باذن الله ناوى اجربها قريب

المقادير

  • كوب فصوص ثوم
  • كوب وربع زيت
  • عصير ليمونة بنزهير
  • ربع معلقة صغيرة ملح

الطريقة

  • نضرب الثوم مع الملح فى الكبة او الخلاط
  • نضيف الزيت قطرات بالتدريج اثناء تشغيل الخلاط
  • نضيف قليل من عصير الليمون من حين لاخر
  • نستمر فى وضع الزيت سرسوب اثناء ما الخلاط شغال لغاية ما نخلص الزيت – حنلاقى الثومية تقلت وبقت جاهزة
  • نحط الثومية فى علبة بلاستيك فى الثلاجة ويفضل ان تبات فى الثلاجة لليوم التالى عشان يبقى طعمها احلى
  • ممكن تتحفظ فى الثلاجة اسابيع

تحديث – ثومية بطريقة اسهل واسرع

الطريقة الاصلية بتستخدم كمية رهيبة من الثوم – انا وجدت طريقة احسن واسهل واسرع وهى الطريقة اللى بتستخدمها المطاعم اللبنانية والخليجية

المقادير

  • 5 فصوص ثوم كبيرة مهروسة
  • نصف معلقة صغيرة ملح
  • ربع كوب عصير ليمون بنزهير-ايطالى-اضاليا (او معلقتين كبار خل)
  • كوب زيت
  • بياض 2 بيضة مثلجة
  • من 2 الى 4 معلقة كبيرة ماء مثلج

الطريقة

  • نضرب الثوم مع الملح ومعلقة عصير ليمون وربع الزيت فى الخلاط
  • بعد ما ينعم الخليط نضيف بالتبادل مرة سرسوب زيت ومرة معلقة صغيرة عصير ليمون
  • اثناء دوران الخلاط نضيف بياض البيض يكون مثلج (انا باحطها فى الفريزر 10 دقائق قبل ما ابدأ) وبعدين نضيف باقى الزيت سرسوب برضه لغاية ما الثومية تتقل
  • فى الاخر نضيف معلقتين ماء مثلج (باحطهم 10 دقائق برضه فى طبق معدن فى الفريزر) ونضرب حنلاقى الماء المثلج عمل مفعول السحر: خلى الثومية لونها ابيض كالحليب وناعمة كالحرير وتقيلة كالمايونيز

وبالف هنا وشفا

لو الموضوع نال اعجابك اضغط هنا لدعم الكاتب (جزاكم الله خيراً)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *