تخفيض السكر فى الدم

فوجئت منذ ايام بأن قياس السكر فى دمى ارتفع مرة أخرى الى 185 (صايم) – وهو نفس الرقم تقريبا اللى كان من حوالى 3 سنين لما اكتشفت لاول مرة ان عندى السكر – بالرغم من انى وصلته الى 100 بدون ادوية – لكن يبدو انى لخبطت كتير مؤخراً وخصوصا فى النشويات

بدأت أقرأ كتير عن كيفية تخفيض الجلوكوز فى الدم – وعرفت ان السبب الرئيسى هو تناول النشويات (الكربوهيدرات) – فقررت من اليوم ان امتنع باذن الله تماماً عن تناول 3 اطعمة: العيش والارز والمكرونة – فهى اكتر اكلات بترفع السكر – الكربوهيدرات مهمة لجسم الانسان – لكن على مريض السكر ان يختار اقل الاكلات احتواءا عليها – وباذن الله سأبدأ فى تعويد نفسى على تناول الطعام بالملعقة بدون عيش ولا رز ولا مكرونة

كان لابد من ايجاد بديل للعيش والارز والمكرونة يكون مشبع وفى نفس الوقت منخفض الكربوهيدرات – ووجدت حل ممتاز – بطاطس اوجراتان – البطاطس بها كربوهيدرات اقل بكتير من العيش والرز والمكرونة – وطبق بطاطس اوجراتان ليس به سوى 1/3 الكربوهيدرات الموجودة فى رغيف العيش أو أقل – بالرغم من انه مشبع تماماً مثله – ويمكن اكتر

طريقتى لعمل بطاطس اوجراتان

ربع كيلو بطاطس – نغسلها كويس وبعدين نقشرها ونضعها فى طبق ماء

نضع نصف كوب حليب ونصف كوب ماء وذرة ملح وفلفل فى حلة على النار – وبعدين نبشر البطاطس بالمبشرة الواسعة ونسقطها على الحلة بحيث تنزل فى الحليب مباشرةً ونقلبهم مع بعض ونغطيهم عشر دقائق – بس كل شوية نحك القعر بملعقة خشب عشان ما تتحرقش – وفى الآخر نضيف ملعقتين جبنة رومى او شيدر مبشورة (اختيارى) وبعد رفع البطاطس من على النار نخرط حبتين طماطم مكعبات ونقلبهم فى البطاطس – الطبق دة لذيذ ومشبع – بعد ما تاكله حتحس كانك كلت خروف – وممكن نستخدمه كبديل للعيش – والجميل انه كوجبة كاملة يحتوى على 50 جرام كربوهيدرات فقط – بس المهم ماناكلش حاجة تانية معاها

كمان من المهم ان نتجنب الاكل الكتير فى نفس الوجبة – فالأفضل تقسيم ما سنأكله فى الوجبة الواحدة على وجبتين او ثلاثة – حتى لايرتفع الجلوكوز فى الدم فجأة – فبدلاً من تناول 3 وجبات كبيرة فى اليوم ممكن ناكل 6 وجبات صغيرة – بين كل وجبة والثانية ساعتين او ثلاث ساعات – فمثلا لو على السفرة امامك وجبة كبيرة تناول نصفها فقط وقوم – وبعد ساعتين تلاتة تناول باقى الوجبة

وبصفة عامة يجب على مريض السكر ان يلتزم بالا تزيد الكربوهيدرات فى أى وجبة عن 75 جرام للرجل – و60 جرام للمرأة

لمعرفة عدد جرامات الكربوهيدرات الموجودة فى أى نوع من الطعام اضغط هنا

شارك هذا الموضوع
error

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.