آخر تحديث : 31-03-2015 الساعة 10:40 م

من فترة الدقيق عندى خلص – وكان عندى جلاش مجمد كتير من عرض لجلاش البريمو (4 لفات ب10ج) – فقررت أجرب اعمل بيتزا بالجلاش – ولما بدأنا ناكلها مكناش مصدقين – الطعم رهيييييب! – لازم تجربوها حتعجبكم أكتر من البيتزا العادية

المقادير

• 2 لفة جلاش 400جم
• بصلة صغيرة
• طماطماية متوسطة
• 1 فلفل رومى كبيرة
• 3 ملاعق كبيرة حلقات زيتون مخلى (نتأكد من خلوه من البذر حلقة حلقة)
• صوص بيتزا الخمس دقائق – مكون على البارد من خلط الآتى
  • 1 ملعقة كبيرة معجون صلصة طماطم
  • 2 ملعقة كبيرة خل
  • 2 ملعقة كبيرة زيت
  • 1 ملعقة صغيرة بودرة ثوم
  • 1 ملعقة صغيرة أحادى جلوتامات الصوديوم MSG (اختيارى)
  • 1 ملعقة كبيرة اوريجانو او بردقوش او زعتر مطحون
  • نصف ملعقة صغيرة فلفل اسود مطحون
• 3 ملاعق سمن بلدى + 3 ملاعق زيت
• كوب حليب بارد

الطريقة

• نسيح السمن مع الزيت على نار هادية ونحضر فرشاه لدهنهم
• نقشر البصلة ونخطرها مكعبات صغيرة نصف سم – ونخرط الفلفل والطماطم بنفس الحجم – ونضيف لهم الزيتون ونقلبهم مع بعض
• ندهن قعر صينية كبيرة بفرشاة خليط السمن
• نرص ورقتين جلاش ثم ندهنهم بالفرشة – الأطراف أولا ثم الوسط
• بعد 6 ورقات ندهن الاطراف الفرشة ونفرد نصف صوص البيتزا عليهم
• ثم نكرر 6 ورقات ندهن بالفرشة بعد كل 2
• نفرد نصف الخضروات ثم نكرر 6 ورقات ثم نفرد الجبنة المبشورة ثم 6 ورقات ثم باقى الخضروات ثم ست ورقات
• طول الوقت كل ورقتين ندهن بالفرشة خليط السمن بكميات بسيطة جدا – ماعدا فى الآخر ندهن وش الجلاش كويس
• نضعها فى رف متوسط فى الفرن على حرارة 200 درجة لمدة نصف ساعة أو حتى يحمر الوش
• فور اخراجها من الفرن نسقيها بالحليب
• بعد قليل ستتشرب الحليب فنقطعها وتقدم ساخنة

وبالف هنا وشفا