انتشار التابلت والموبايلات الذكية smart phones جعل من السهل جداً قراءة الكتب وأخذها معك فى أى مكان – بدلاً من شنط الكتب اللى بتقطم الضهر

لكن النسخ الاليكترونية من الكتب مازالت قليلة جداً – مع ان عملية تحويل كتاب ورقى الى نسخة اليكترونية PDF عملية سهلة جداً

فهل فكرت من قبل فى المساهمة فى نشر تقافة الكتب الاليكترونية؟ – لو عايز تجرب اليك  بعض الخطوات السهلة اللى انا باتبعها فى عمل نسخ اليكترونية من كتب وزارة التربية والتعليم للطلبة واللى ممكن تعملها بنفسك فى وقت فراغك – الكتاب حياخد منك حوالى ساعتين زمن فى المتوسط – لكن دعاء الناس ليك حينسيك كل التعب والوقت:

ستحتاج الآتى

• اول حاجة لازم يكون عندك ماسح ضوئى scanner او طابعة متعددة الوظائف يكون فيها سكانر – انا باستخدم طابعة كانون Canon Pixma MP250 – وهى طابعة متعددة الأغراض ورخيصة جداً – فى حدود 270ج من كارفور او كومبيومى
• وحتحتاج برنامجين – واحد لتصوير صفحات الكتب – ودة بييجى مع الطابعة اللى حتشتريها – والبرنامج التانى لتعديل الصفحات وقطع الطروف المشوهة crop ووضع الصفحات اللى ممكن تكون نسيت تصورها – انا باستخدم برنامج اسمه Foxit Advanced PDF Editor اصدار 3.05
• وطبعا نسخة من الكتاب اللى حتحوله الى نسخة اليكترونية – يفضل تكون نسخة جديدة وتكون مستغنى عنها لاننا حنقطعها ورقة ورقة – بيت بيت – دار دار – الى آخر المقولة الشهيرة – بس ولا يهمك ما انت حيكون معاك نسخة اليكترونية احسن من الورقية من نواحى كتيييرة قوى

خطوات العمل

• من برنامج Canon MP Navigator EX اضغط على One Click ثم اضغط على Save as PDF file
• فى الشباك اللى حيتفتح لك اختار لو الكتاب ملون او رماديات او ابيض واسود
• وبالنسبة لdocument size اختار auto detect
• واختار resolution 200 dpi
• وعند Save as type اختار Multiple pages واضغط على الزر اللى جنبه Set – وفى الشبك اللى حيفتح غير الdecompression من standard الى high وبعدين دوس OK
• ضع الكتاب مقلوب بحيث يكون الغلاف لأسفل ومزنوق عند الزاوية العلوية شمال- ثم اقفل غطاء السكانر على الكتاب – ثم اضغط زر Scan الاخضر الكبير فى نفس الشباك اللى عدلت فيه كل ما سبق
• بعد ما السكانر يصور الغلاف حيظهر لك شباك صغير فيه زرارين Exit و Scan – سيبه دلوقتى – خد الكتاب واقطع صفحة الغلاف ثم ضع الكتاب على وجهه مرة أخرى المرة دى على الصفحة الأولى واقفل عليه غطاء السكانر – ثم دوس على زر Scan
• طلع الكتاب – واقطع الصفحة الأولى واعدها مقلوبة على وشها على السكانر – وغطى ودوس على زر Scan
• كرر نفس الخطوتين السابقتين مع باقى صفحات الكتاب – مرة تحط الكتاب على وشه – والمرة التانية تخرج الكتاب من السكانر وتقطع الصفحة اللى صورتها وتقلبها على الوش التانى وتصورها – يعنى تصور الصفحة مرة وهى ماسكة فى الكتاب زى ما هى – ومرة بعد فصلها عن الكتاب وقلبها على الوش التانى – والسبب اننا بنقطع كل الصفحات عشان نتجنب ظهور خيالات سوداء لو تنينا الكتاب من غير قطع الصفحة – والسبب اننا مش بنقطع كل الصفحات أولا قبل بدء التصوير اننا نتجنب ان الصفحات تتلخبط مننا واحنا بنصور
• بعد تصوير آخر صفحة – بدلا من الضغط على زر Scan نضغط على زر Exit – سيقوم برنامج كانون بدمج كل الصفحات فى كتاب واحد – وستجده باسم IMG
• دلوقتى افتح بقى البرنامج التانى: Foxit Advanced PDF Editor
• إضغط على اول ايقونة على الشمال فوق Open – وافتح ملف الكتاب IMG
• راجع الصفحات صفحة صفحة – لو لقيت اى صفحة نسيت تصورها – روح برنامج كانون وصورها هى لوحدها ودوس Exit – وبعدين فى برنامج فوكسيت قف عند الصفحة اللى قبل الصفحة الناقصة – ودوس فوق على Document ثم Pages ثم Insert from document – واختار الصفحة اللى صورتها لوحدها عشان تغرزها فى النص بعد الصفحة اللى انت واقف عندها
• غالباً مكان قطع الصفحات بيكون مشوه صور الصفحات فى الجنبين – ولعلاج هذه المشكلة وتصليح كل الصفحات مرة واحدة: اضغط فوق على Tools ثم Crop tool
• بالماوس بتاعك دوس واسحب لتكوين مستطيل حوالين الصفحة بحيث تخللى الطروف المشوهة برة المستطيل اللى عملته – ممكن تسحب اطراف المستطيل لتعديل المساحة اللى حتقصها – وبعد ما تظبط ابعاد الصفحة من فوق وتحت ويمين وشمال – تاركا الأجزاء المشوها خارج المستطيل – اضغط على زر Enter فى الكيبورد – او اضغط مرتين بالماوس وسط المستطيل – حيطلع لك شباك يسألك عايز تقص الصفحة دى بس وللا كل الصفحات – طبعاً اختار All pages عشان كل الصفحات تكون نفس المقاس
• بعد ما اطمنت ان كتابك على أكمل وجه – دوس على تانى ايقونة شمال من فوق Save
• غير اسم ملف كتابك الى الاسم الحقيقى بدلا من IMG دى
• كدة النسخة الاليكترونية بقت جاهزة لرفعها على أى موقع مشاركة ملفات مفضل لديك – انا بأفضل موقع mediafire.com

بعد رفع الملف خذ الرابط بتاعه وانشره على صفحاتك المفضلة من المنتديات او مواقع التوصل الاجتماعى او مدونتك الخاصة لكى تعم الفائدة – وهنيالك يا فاعل الخير – مش حتصدق كم الدعوات اللى الناس حتدعيهولك!

ونصيحتى لك عزيزى القارئ أن تتجنب الكتب التى لاصحابها حقوق نشر وطبع حتى لا نتعدى على حقوق الآخرين – وهناك كتب كثيرة يمكننا تحويلها – مثل الكتب المدرسية لوزارة التربية والتعليم – والكتب الدينية وغيرها من كتب التراث

يقول المصطفى صلى الله عليه وسلم: ” أحب الناس إلى الله أنفعهم للناس” – فكن نافعاً للناس أخى الكريم حتى تكون حبيب الله سبحانه وتعالى وحبيب سيدنا النبى عليه أفضل الصلاة والسلام