الأكلة دى طعمها تحفة وسهلة جداً وكمان مغذية وصحية بدون أى دهون – خفيفة على المعدة
المقادير
- نصف كيلو لحم موزة (انا باستخدم البرازيلى دايما لطعامتها ورخصها)
- 2 بصل كبير
- 1 فلفل رومى كبير
- م ص فلفل اسود
- م ص بهارات
- 3 ورقات لورا
- 2 م ص ملح
- 2 بطاطس
الطريقة
- نفرم البصل والفلفل الرومى فى الخلاط مع قليل من الماء ثم نصبه فى حلة على النار ونضيف الفلفل والبهارات واللورا (الملح فى الآخر)
- نضيف قطع الموزة ونقلب على نار عالية خمس دقائق
- بعد الغليان نضيف بعض الماء ليغطى اللحم – وبعد ماتغلى مرة أخرى نغطى الحلة على أقل نار ممكنة ونتركها 5 ساعات (دة العيب الوحيد للحمة البرازيلى – لكن الطعم بيبقى بجد تحفة جربوها وحتدعولى ومش حتستخدموا غيرها)
- فى هذه الأثناء نقشر البطاطس ونقطعها بالطول حلقات بسمك صباع يدك تقريبا
- نضع حلقات البطاطس فى شواية على البوتاجاز – انا بستخدم شواية اسمها Crystal Oven ويوجد منها مصرى شكلها كدة:
سعرها عند بتوع الادوات المنزلية حوالى 45 جنيه
أو ممكن أى شواية تيفال – او حتى فى صينية تحت شواية الفرن العلوية بس حتاخذ وقت اكتر من شواية البوتاجاز
- نغطى الشواية ونترك البطاطس فيها على نار متوسطة حتى يحمر اسفلها وبعدين نقلبها على الوش التانى (مش مطلوب البطاطس تستوى – فقط تاخذ لسعة الشوى – وبعد كدة حنكمل سواها فى حلة اللحمة)
- وممكن نشوى كمان شرائح بصل وفلفل رومى لو نحب فى نفس الشواية على مرتين
- نضع البطاطش المشوية فى طبق ونتركها مكشوفة لتخرج الرطوبة منها تماما وتنشف أكتر
- قبل ربع ساعة من تسوية اللحم نضيف اليه المشويات والملح
- نقدمها سخنة طبعاً مع عيش بلدى (بالردة) وطبق سلطة ضخم جدا لتكتمل الفائدة الصحية
الفكرة ورا شوى البطاطس انه بيجعلها تفقد سوائلها وتجف – وبعد ما نحطها مع اللحمة حتتشرب بهريز اللحمة والبصل بدل عصير البطاطس اللى اتبخر اثناء الشوى – وفى نفس الوقت البطاطس مش حتنزل عصيرها فى اللحمة – يعنى حتاخد طعامة اللحمة ولا يظهر طعم البطاطس فى الأكل – أقصد مش حتغير من طعم اللحمة بالبصل – بل بالعكس الشوى حيزيدها طعامة
وبالف هنا وشفا – لاحظوا اننا ماستخدمناش اى سمن ولا زبدة ولا زيت – وبما ان الموزة بتبقى خالية من الدهن فبكدة تبقى وجبة صحية وخفيفة على المعدة – وعلى الجيب كمان !
التكلفة:
- حوالى 20 جنيه
(نصف كيلو موزة برازيلى: 16 جنيه + 2 بصل و2 بطاطس و1 فلفل: 4 جنيه = 20 جنيه تقريبا)
