آخر تحديث : 23-03-2019 الساعة 10:28 م
البرجر الجاهز سواءاً من مطاعم الوجبات السريعة او المجمد من السوبرماركت يحتوى على نسبة قليلة من اللحم ومعظمه فول صويا وعيش مفروم ومواد حافظة والوان صناعية وكيماويات ضارة بصحتك
أفضل شئ هو عمل برجر بيتى صحى بلا أى اضافات صناعية او تجارية ضارة
اليكم طريقة سهلة وسريعة لعمل برجر بيتى شهى ولذيذ – تتميز طريقتى اولا بخلوها من المواد الحافظة طبعاً – بالاضافة الى اننا يمكننا الحصول على برجر مربع للعيش الكايزر – أو نقسمه 3 اجزاء للفينو – يكون جاهز دائماً فى 5 دقائق فى أى وقت نحتاج لعمل برجر
المقادير (تكفى لعمل 24 مربع برجر تكفى لعمل 48 سندوتش فينو)
- 1 كيلو لحم كندوز مفروم بالدهن
- نصف كيلو بصل
- 3 معلقة صغيرة ملح
- معلقة صغيرة ملح صينى
- نصف معلقة صغيرة كبابة صينى
- ثمن معلقة صغيرة قرفة
- 3 معالق خل
- 2 بيضة
- 4 معالق زيت
- 300جم ارز ناشف مطحون ناعم (200جم لو اللحمة المفرومة حمراء) (يلغى اذا كنت تتبع نظام LCHF)
- 4 اكياس بلاستيك مقاس 35×20سم
الطريقة
- نفرم البصل مع البيض والخل فى الكبة ثم نضيف التوابل والارز المطحون ونضربهم مع بعض كويس
- نخلطهم مع اللحمة فى طبق كبير ونضيف الزيت ونعجنهم مع بعض باليد كويس قوى
- نترك الطبق فى الثلاجة ساعتين ليتماسك اللحم
- نقسم اللحم فى 4 اكياس بلاستيك مقاس 35×20سم – ونضغط على كل كيس بحيث نفرد اللحم ويمكن ان نستخدم نشابة ليصبح مبطط بالتساوى مثل اكياس الملوخية المجمدة – وبحيث تملأ اللحمة 27سم من طول الكيس – وباقى الكيس نثنيه تحته
- نضع الاكياس فى صينية او على قطعة كرتون وندخلها فى الفريزر
- بعد ان يتماسك اللحم قليلا – وقبل ان يتجمد – نخرج الكيس من الفريزر ونضعه على رخامة المطبخ – وباستخدام مسطرة معدن او سيخ نعمل خطوط غائرة: 2 بالعرض وواحد بالطول بحيث نقسم اللحم داخل الكيس الى 6 مربعات – كل مربع 9 × 9 سم تقريباً – كما فى الشكل التالى:
- نعيد اكياس البرجر الى الفريزر – وتصبح جاهزة للشوى نأخذ منها فى أى وقت العدد الذى نحتاجه
- نضع مربعات البرجر المجمدة فى شواية حديد او طاسة تيفال على النار ونقلبها كل دقيقة على الوجه الآخر ونكرر ذلك 4 مرات الى ان تأخد لون الشوى الداكن
- واذا كنا حنعمل سندوتشات فينو نقسم بعد الشوى كل مربع 4 صوابع ليملأوا رغيفين فينو بالطول
- نقدمها ساخنة مع سلطة طحينة
- فى حالة السندوتشات نفتح العيش ونضعه على وجهه مطرح البرجر عشان يسخن ويمتص بهريز الشوى اللذيذ – ثم ندهنه طحينة قبل وضع البرجر فيه
لمعرفة طريقة جميلة لسلطة الطحينة اضغط هنا
مقادير صوص البرجر اللذيذ
- كوب زيت
- 1 صفار بيضة
- 3 ملعقة كبيرة خل او عصير ليمون
- نصف ملعقة صغيرة ملح
- نصف ملعقة صغيرة فلفل
- 2 ملعقة كبيرة كتشب
- 2 ملعقة كبيرة مستردة
- ربع ملعقة صغيرة بودرة ثوم
- 4 حلقات خيار مخلل
تضرب كل مكونات الصوص فى الخلاط – ويا سلام لو عندك زجاجة كتشب او مستردة بلاستيك فاضية من النوع اللى له بوز رفيع – نملاها بالصوص بتاعنا وعند الاستخدام نضغط على الزجاجة فتنزل الصوص فى السندوتش بسهولة وبيد واحدة بدل غلبة استخدام معلقة وبرطمان وغطا وايدينا الاتنين
جمال الصوص دة انه بيجمع بين الكتشب والمستردة والمايونيز كلهم فى ضغطة واحدة سريعة وسهلة
استغنوا بوصفتى عن البرجر الجاهز فهو مقلب كما كتبت من قبل – اقرأ التفاصيل بالضغط هنا