تقييم لاب توب لينوفو Lenovo G580

آخر تحديث : 17-07-2014 الساعة 12:11 م

أشتريت منذ أيام لاب توب Lenovo G580 بالمواصفات الآتية

  • Intel i5 3210 processor
  • 4gb ddr3 rams
  • 500gb HDD
  • Geforce 610m 1gb vga

يباع فى كارفور بسعر 3399 جنيه

اللاب توب رائع – لوحة مفاتيح متينة واحساسها فخم ومريح للأصابع وبها باد للأرقام – تتش باد كبيرة بها سكرول – صوت السماعات دولبى مجسم – والصوت عالى جدا ورخيم – بعكس كثير من اللاب توبس اللى بيكون صوتهم واطى ومسرسع – كما يوجد 3 يو اس بى منهم 2 يو اس بى 3 – ووصلة اتش دى ام آى للتوصيل لشاشة ال سى دى كبيرة – رائعة لعرض الأفلام والألعاب بحجم عملاق وصوت مجسم

أدهشنى ان هذا اللاب توب يشغل الألعاب الحديثة بكفاءة عالية جدا بالنسبة للاب توب – طبعا مش زى الكمبيوترات البى سى – لكن ماكنتش متصور انه حيقدر يشغل بقوة وبسرعة عالية العاب زى:

  • Alan Wake
  • Sleeping Dogs
  • Dishonored
  • Fifa 13
  • GTA IV
  • Hitman 5 – Absolution
  • Mass Effect 3
  • Need For Speed 13
  • Torch Light 2

جميع الألعاب المذكورة تعمل بسرعة جميلة من أول مرة بدون الحاجة الى أى تعديل فى ضبط الجرافيك الخاص بكل لعبة – طبعاً الألعاب الجديدة بتضبط نفسها اوتوماتيك حسب الهاردوير اللى حتشتغل عليه – وقد وجدت أن الضبط بيبقى فى الميديوم فى أغلب الألعاب

اللاب توب بيأتى فاضى بدون ويندوز – لكن بعد أن وضعت ويندوز 7 عليه أصبح هايل وسريع جدا

بعد تشغيل اللاب توب لساعات طويلة وجدته مازال باردا وكأنه مطفى – ودة شئ جميل يحافظ على الهاردوير ويطول عمر مكوناته الداخلية

البروسيسور i5 3210 بروسيسور من الجيل الثالث – وهو جيل أقوى وأسرع من الجيل الثانى بحوالى 6% – ويستهلك طاقة تشغيل أقل مما يجعل البطارية تدوم أطول من الجيل الثانى – قرأت أنها تدوم 4 ساعات ونصف – لكنى لم أجرب ذلك بنفسى بعد

بعد أن وضعت البرامج الضرورية والألعاب – وضعت برنامج ديب فريز deep freeze للمحافظة على بارتيشن C الخاص بالويندوز وحمايته من أى فيروس أو أى برامج ضارة – حيث أن أى ضرر يلحق بالويندوز يختفى تماما بعد غلق الجهاز – وعندما نفتح اللاب توب لا يكون هناك وجود لأى تعديلات أو اضافات او حتى ممسوحات حدثت فى كل مرة وأى مرة – وهكذا لا نحتاج الى اى برامج مضادة للفيروسات anti virus – فهى تبطئ من سرعة أى جهاز تعمل عليه بلا أى داعى – طالما استخدمنا ديب فريز – اللى بيخللى اللاب توب بعد مدة طويلة يعمل بنفس السرعة اللى كان عليها يوم شراؤه

بعض العيوب البسيطة

طبعا لا يخلو اى جهاز من بعض العيوب

  • لاحظت فى للاب توب دة الصوت العالى لمشغل الدى فى دى – فعندما يعمل يكون صوته مثل ورشة الأخشاب ويهز سطح المكتب بقوة – مع ان عندى لاب توب سامسونج لا تسمع له صوت تقريبا
  • اليو اس بى 3 كنت متوقع انها حتنقل بسرعة صاروخ لكنى فوجئت انها بتنقل فى الأول بسرعة 100 ميجا فى الثانية وبعدين تقل الى 25 ميجا فقط – يعنى زى اليو اس بى 2 !! مع انى كنت بأنقل من هارد بورتابل يو اس بى 3 والنور بتاعه نور ازرق دليل ان النقل بيتم بين يو اس بى 3 وليس نور ابيض كما يفعل مع اليو اس بى 2
  • الشاشة لامعه – كما هو الحال فى معظم الأجهزة للأسف – وليست مطفية مما يعكس الأشياء عليها – لكن الإضاءة العالية للشاشة تخفى هذا العيب الى حد معقول

لكن تلك العيوب البسيطة لا تؤثر على تقييمى لهذا الجهاز الرائع – وأرشحه لكل من يبحث عن لاب توب رخيص لكن قوى وسريع ويمكنه تشغيل كثير من الألعاب بكفاءة وسرعة مناسبة

 

يتميز لينوفو G580 بلوحة مفاتيح قوية ومريحة واحساسها رائع

شارك هذا الموضوع
error

303 تعليقات

  1. انا بقالي اسبوع باسيرش على لاب كويس واخيرا استقريت على لينوفو جي 580 وبعد ما قررت اجيبه قلت اسيرش على عيوبه بالمره قبل ما اشتريه وكده شكلي كنت هاتدبس بس ياريت حد يرشحلي بديل بدل ما اقعد اسيرش تاني ايه اقرب بديل بنفس المواصفات والسعر بس منغير العيوب؟ وشكرا لعمو محمد جدا عللى مجهوده

    • عشان تعرف دوس يمين على Computer ثم اضغط على Properties ثم اختار Device Manager ثم دوس على Display Adapters
      لو عندك 2 كارت شاشة حتلاقيهم مكتوبين
      وبالنسبة للألعاب فاللاب توب نفسه بيشغل الكارت الأكبر لما يحتاجه بطريقة اوتوماتيك من غير تدخل منك – يعنى أى برنامج او لعبة فيها جرافيك كتير يروح مشغل الكارت الكبير لوحده – وغير كدة يفضل على الكارت الصغير اتوفير الطاقة

  2. عمو محمد انا بقالى فتره محتاره وبادور على لابتوب تكون امكانياته معقوله وفى حدود 4000 ولما حد من اصحابى اقترح عليا اللاب دا فدخلت اشوف مميزاته وعيوبه مع العلم انى للاسف معنديش خبره فى اللابات وعاوزه اجيب حاجه كويسه وفى نفس الوقت تكون عيوبها مقدور عليها فايه راى حضرتك وتقدر تساعدنى فى الموضوع دا
    وشكرا جدا لحضرتك

    • توكلى على الله واشترى لينوفو جى 580 – هو صحيح ناس كتير اشتكت من عيوب فيه بسيطة – لكنى الجهاز اللى انا اشتريته كان رائع وخالى من اى عيوب الحمد لله – المهم انك تشتريه من محل عنده سياسة الترجيع خلال 14 يوم – زى كارفور وسبينس – عشان لو ظهر اى عيب ترجعيه او تستبدليه خلال 14 يوم
      اختارى الموديل اللى البروسيسور بتاعه i5-3210 ورامات 4 جيجا وهارد 500 – مش بيسخن خالص وصوته رائع والكيبورد تحفة – احسن سعر بيكون فى كارفور على فكرة وخصوصا لما يكون فى عروض اليكترونيات – وبالتوفيق ان شاء الله ومبروك مقدماً

  3. السلام عليكم
    مشكورين جميعا على المعلومات الرئعة دى
    انا عندى مشكلة انا من اسبوع اشتريت لينوفو ج580 I3
    المشكلة بقا انى بحس ان الرؤية باهتة ولازم افتح الشاشة اوى عشان تكون مظبوطة ياترى ده عيب ولا لاء ياريت الرد عشان لو كدا اروح ارجعة النهاردة

    • انت ظابط نسبة الاضاءة على كام؟ Screen Brightness
      بعد ما تزودها: غير زاوية الرؤية بانك تحرك الشاشة أبعد وأقرب منك – لو البهتان راح وبقت الألوان تقيلة والإضاءة قوية والصورة واضحة يبقى جهازك تمام
      لو برضه بهتانة من كل زوايا الرؤية يبقى رجعه او استبدله

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.