منجز ماكس نظام هايل – انترنت سريع بدون خط تليفون ارضى

تحديث:

للأسف شركة اتصالات عدلت نظام منجز 25 الجديد وأصبح أسوأ بكتير- فبعد أن كانوا بيعطوك 2 جيجا (1.5 جيجا تصفح و 0.5 جيجا ستريمنج وتشات ويوتيوب) – أصبحت الآن 1.25 جيجا فقط شاملة كل شئ – مش بس كدة – كان الاول تقدر لو خلصت الميجات بتاعتك تستمر فى التصفح لباقى الشهر لكن بسرعة اقل – من غير ما تدفع ولا مليم – دلوقتى اول ما تخلص ال1.25 جيجا يروحوا خاصمين منك 20 جنيه من غير ما يسألوك مقابل 1 جيجا اضافية – ولو مفيش رصيد تتوقف الخدمة تماما لحين الشحن – يعنى يا اما تشحن ب20 جنيه يا اما تقضى باقى الشهر بدون نت!

كدة التسعيرة خلوها موحدة – الجيجا ب20 جنيه – على جميع الأنظمة منجز او موبايل انترنت – ودة سعر مغالى فيه جدا مقارنة بالدى اس ال ويعتبر اكثر من 6 اضعاف السعر (الجيجا ب3ج فقط فى الدى اس ال عند شراء 25 جيجا اضافية ب75ج فى نظام تورنيدو)

تحديث سابق:

نظام ماكس 25 الجديد يعطيك 500 ميجا ستريمنج وشات وداونلود + 1.5 جيجا تصفح – بعد ال500 ميجا مايخلصوا ما تقدرش تشوف يوتيوب ولا تعمل شات – اما التصفح فيظل سريع – بسرعة 512 ك ب – الى ان تصل الى استخدام 1.5 جيجا – بعدها تقل السرعة الى الربع – اى 128 ك ب – وبعد 2 جيجا تقل الى 64 ك ب – وبعد 3 جيجا تقل الى 32 ك ب – ولا يمكن اعادة السرعة الا بعد انتظار نهاية الشهر عند ميعاد التجديد الشهرى

————————————-

تحديث سابق:

اسهل طريقة لتجديد الاشتراك هى عن طريق برنامج اتصالات المتصطب على جهازك – فقط اضغط على Prepaid Packages ثم ادخل ال15 رقم بتوع كارت شحن ب25 (بعد خربشة الكارت) ثم اضغط على زر “Recharge”

ولمعرفة حالة اشتراكك ورصيدك والكمية اللى استهلكتها اضغط على زر “Balance Inquiry” من نفس الصفحة

————————————-

شعار منجز: انا مش بتاع شات ولا يوتيوب – انا بتاع تصفح وفيس وبس

لما تكون فى مكان مافيهوش خط تليفون أرضى للاشتراك فى خدمة الدى اس ال – بتبقى مشكلة مزعجة

لكن هذا تغير الآن بعد أن طرحت شركة إتصالات طريقة “منجز” الجديدة – حيث يمكنك الإشتراك فى باقة ماكس – والتكلفة كالآتى:

  1. ستشترى يو اس بى مودم – سعرها فى فروع اتصالات 125 جنيه – وفى محلات الموبايل حتلاقيها بسعر أقل – من 100 الى 110 – انا اشترتها ب105 – وبتتباع فى بعض فروع سوبرماركت المحمل ب85 فقط – لكن لما فتحت العلبة لقيت الشريحة حد قطعها من الكارت ووضعها فى اليو اس بى – خدمة العملاء لما سألتهم قالوا لى المفروض تكون الشريحة فى الكارت عند الشراء – فأنصحكم لو حتشتروها من محلات موبايل تتأكدوا ان الشريحة مش منزوعة من الكارت – بس عموما الخط اشتغل معايا بدون مشاكل ووجدته غير مسجل باسم حد قبلى
  2. تشحن خط الموبايل اللى جاى مع المودم بمبلغ 25 جنيه – وهى قيمة الإشتراك الشهرى فى باقة ماكس

باقة ماكس تعطيك انترنت سريع 7.2 (السرعة الفعلية تشبه سرعة 512kb) ميجابايت  – وتجعل الكمبيوتر المنزلى أو اللاب توب متصل بالنت طوال الوقت ومن أى مكان – لتصفح لجميع مواقع النت بلا حدود – لكن بسرعات تقل كلما زاد استهلاكك من التصفح – بالإضافة الى 500 ميجابايت للإستخدامات الأخرى غير التصفح – مثل الداونلود والتورنت والفيديو والألعاب – بمعنى أن التصفح لا يشمل مشاهدة فيديوهات يوتيوب – فالفيديو بيتحسب من ال500 ميجا مش من الجيجات بتوع التصفح

باقة منجز ماكس هى أول حل يتيح لك إنترنت منزلى بديل للدى اس ال – يعنى من دلوقتى ممكن تستغنى عن تليفون المنزل وتلغيه لتتخلص من فواتيره الربع سنوية – لإن ناس كتير كانوا بيضطروا لعدم الغاء الخط الأرضى بسبب الدى اس ال – رغم اعتمادهم شبه الكلى على الموبايل فى مكالماتهم

وطبعا منجز ماكس حل مثالى فى المصايف والرحلات وأثناء السفر الى أى مكان فى مصر

باقة منجز ماكس مناسبة لك إذا كنت تحتاج أساساً الى تصفح مواقع النت والايميلات وقراءة الجرائد والمجلات وخدمات جوجل وغيرها – لكنها ستكون مكلفة جدا لك إذا كنت تريد مشاهدة فيديوهات يوتيوب او تنزيل افلام او برامج من التورنت أو مواقع تحميل الملفات – فال 500 ميجا المتاحة للاستخدامات الاخرى لن تكفى مثلاً لمشاهدة فيديوهات يوتيوب أكثر من يوم واحد او يومين فى الشهر كله – وستحتاج الى “اكسترا ميجابايت” أسعارهم كالتالى:

  • اكسترا 700 ميجابايت بـ 15 جنيه
  • اكسترا 4 جيجابايت بـ 60 جنيه
  • اكسترا 10 جيجابايت بـ 125 جنيه
  • اكسترا 20 جيجابايت بـ 225 جنيه

أما فى حالة التصفح فقط فلن تضطر الى دفع أكثر من 25 جنيه فى الشهر – وحتى لو ال2 جيجا خلصوا قبل نهاية الشهر – لن تدفع شئ إضافى – بس السرعة ستقل من 512 كيلوبايت الى 128 بعد استهلاك 1.5 جيجا تصفح – ثم الى 64 عند الوصول الى 2 جيجا – ثم 32 لما بعد 3 جيجا لباقى الشهر – ثم تعود الى512 ك ب مع بداية شحن الشهر التالى

على فكرة – بعد استهلاك ال500 ميجا المخصصة لغير التصفح – سيظل بإمكانك لعب games بتاعة فيس بوك – فمثلاً لعبة البلياردو pool life tour بتشتغل معاك عادى حتى بعد استهلاك ال500 ميجا – وكذلك العاب اخرى اون لاين كتيرة – يوتيوب هو اللى مش بيشتغل بعد استهلاك ال500 ميجا

والظريف فى منجز ماكس انك مش مضطر تشحن كل شهر متواصل – فلو حابب توقف شهرين تلاتة أو اكثر مفيش مشكلة – ولما تحب تشحن فى أى شهر فى المستقبل إشحن ب25 جنيه حيشتغل معاك عادى – يعنى الخط مالوش فترة صلاحية – فهو صالح معاك على طول وجاهز للشحن فى أى شهر ترغب فى استخدامه – ودة مناسب جدا للى بيسافروا برة وبيرجعوا مصر اجازة شهر او شهرين فى السنة – او أثناء المصايف – يقدروا يشحنوا فى فترة اقامتهم فقط ولا يدفعوا شئ باقى السنة

ملحوظة

عند الوصول إلي 1.5 جيجابايت من التصفح والبريد الإلكتروني سوف تنخفض السرعة إلى 128Kbps وعند الوصول إلي 2GB سوف تنخفض السرعة إلى 64Kbps و عند الوصول إلي 3GB سوف تنخفض السرعة إلى 32Kbps لحين موعد التجديد الشهرى

ملحوظة هامة

طريقة الشريحتين
اذا كان تصفحك بيستهلك اكثر من 1.5 جيجا فى الشهر – ومش عايز يعذبوك بالسرعة البطيئة بعد ال 1.5 جيجا – ممكن تشترى شريحة داتا تانية ب15 جنيه تشحنها ب25ج وتستمع ب500 ميجا ستريمنج + 1.5 جيجا تصفح بسرعة عالية – يعنى تدفع فى الشهر 50 جنيه يعطوك 1 جيجا ستريمنج + 3 جيجا تصفح بسرعة 512

الحل دة أفضل وأوفر من شراء اكسترا ميجابايتس الا لو كنت غاوى يوتيوب طبعا

لو الموضوع نال اعجابك اضغط هنا لدعم الكاتب (جزاكم الله خيراً)

333 تعليق

  1. طب انا عندى يو اس بى اتصالات ومشترك فى باقة 49 الشهرية .. ايه المطلوب منى عمله عشان اغير الى منجز .. وهل لازم اشترى يو اس بى جديدة واشترى كمان خط اتصالات جديد ارجو شرح طريقة التحويل الى منجز تفصيليا وجزاك الله عنا خير الجزاء

    • التحويل الى منجز بسيط انت مش محتاج تشترى يو اس بى جديدة ولا خط جديد – كل المطلوب للتحويل انك تبعت رسالة فاضية الى 583 – حيخصموا منك 5 جنيه رسوم تحويل وبكدة تبقى حولت لنظام منجز وتشحن كل شهر ب25 جنيه فقط – والشهر اللى مش محتاج فيه نت ماتشحنش بلا مشاكل
      وبنفس الطريقة يمكن بها التحويل من باقات 49،99،149،199

    • عند إستخدام أى شات صوت أو صورة – ياهو أو أى مسنجر آخر – فإنك تستهلك من ال200 ميجا الشهرية – وليس من ال2 جيجا المخصصة للتصفح – عشان كدة ممكن تشات مرة واحدة تلاقى ال200 ميجا خلصوا – ويقفل المسنجر بقية الشهر
      لعلاج المشكلة دى لا تستخدم إلا تشات تكست text كتابة فقط – لا صوت ولا صورة مناسبين لمنجز – إلا لو دفعت اكسترا فوق ال25 جنيه الشهرية كما وضحت بالأعلى

  2. بعد اذنك لو انا استخدمت شات كتابة بس فى الياهو … هل ده حيأثر على ال 200 ميجا بتاعة التحميل ؟؟

    وبفرض ال 200 ميجا بتاعة التحميل خلصت وعايز احمل تانى حيتحسب من ضمن ايه بالظبط ؟؟؟

  3. للاسف انا حولت لمنجز و فعلا سيء جدا جدا انا عايز ارجع تاني لبقاقه 19 بلا حدود ومش عارف بردو كل ما ادوس علي الباقه عشان ارجع ليها بيديني قيلد بصراحة منجز سيء جدا جدا جدا جدا انصح الناس بعدم التحويل ليه لانه نظام لسحب مبالغ اكتر من العميل ليس الا

  4. طيب حضرتك انا لسه عامله من شهر والشهر خلص النهرده وطبعا لازم تجديد الاشتراك ب ٢٥ هيا كانت شغاله تمام قبل مااحول بعد ما حولت حولت ١٥ جنيه علشان ماكنت فاهم ايه نظامها فالمهم اشتغل فاقولت تمام اشتغل بيها دلوقتى واروح احول عشرة جنيه تانيه ويبقوا 25 بس اكتشفت انها اخدت ١٥جنيه والفلاشه قفلت ومش عارف نظامها ايه… اشحن ازاى اروجوا الرد بسرعه واسف ع الاطاله

    • لازم تشحن ب25 جنيه لإنك لو شحنت ب15 بس حيعاملوك بسعر تانى غالى “في حالة عدم وجود رصيد كافي لتجديد باقة Max سوف يتم محاسبتك بالسعر الموحد 25 قرش للميجابيت” – لغاية ماتشحن ويبقى رصيدك 25 جنيه ساعتها حترجع لنظام منجز 2 جيجا فى الشهر – ممكن تشحن على الهواء بالنمرة بتاعة شريحة الداتا اللى داخل اليو اس بى (رقمها مكتوب على علية اليو اس بى) – أو تشحن بكارت 15 وكارت 10 ورا بعض

  5. نظام سى جدا لما تنتهى ال 200 ميجا بيقف اى شات عن العمل ودا مكنش بيحصل فى الباقات القديمة دا نظم معمول علشان السرقة فقط انصح الجميع بترك شركة اتصالات لانها تستغل الناس شركة اجنبية صاحبها ضاحى خرفان اللى كان بيحرض ضد الاخوان

    • من برنامج إتصالات يو اس بى مودم إضغط على تاب Statistics حتلاقى استهلاكك بالتفصيل فى اليوم والشهر والسنة – لكن لاحظ إن البرنامج بيحسب استهلاك الشهر من يوم 1 الى آخر الشهر – وليس كما هو مفروض من يوم تجديد اشتراكك – ودة خطأ فى تصميم البرنامج

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *