آخر تحديث : 18-01-2015 الساعة 12:35 م
الريحان كلنا نحب رائحته الجميلة – والحمد لله هو نبات سهل جدا زراعته والعناية به – ينمو بسرعة وشكله جميل وليس فقط رائحته العطرة
ريحان بعد زراعة الحبوب بشهرين – زرعته فى فبراير والصورة للريحان فى ابريل
طريقة زراعة الريحان
ننثر حبوب الريحان السوداء فى قصيص زرع به طمى او بيتموس (البيتموس أفضل وأنظف لأن الطين بيكون به ديدان)
حبوب الريحان توجد فى البراعم الناشفة لأى ريحان قديم – فالريحان فى نهاية الصيف تنمو أعلاه أزهار رقيقة بشكل عمودى فوق بعضها – ثم تجف الأزهار وتنشف – وينشف بعدها النبات ويصبح خشبى – فى هذا الوقت يمكننا قطع الجزء العمودى من الساق الذى نمت فيه الأزهار بعد أن جفت – وبدئا من شهر فبراير نحضر قصيص الزرع ونبدأ فى فرك البراعم الجافة من على الساق العمودى – سنلاحظ أننا عندما نفرك برعما سيتساقط منه حبوب سواء صغيرة فى حجم حبوب الرمل – تلك هى حبوب الريحان – وكل حبة منها ممكن أن تنمو لتصبح نبات ريحان كامل
ننثر كمية فى القصيص ثم نسقيها بماء خفيف
نواظب على سقى القصيص كل يوم فى البلكونة – ولو الدنيا حر نسقيها اكثر من مرة فى اليوم – المهم الا تجف الطينة اثناء نمو الحبوب
بعد حوالى اسبوعين ستبدأ سيقان صغيرة فى الظهور كل منها تحمل ورقتين غاية فى الصغر – واظب على سقيهم بالماء وستنمو بسرعة
بعد أن يمتلئ القصيص بالريحان ويكبر نسقيه كلما بدأت الطينة تجف وليس قبل ذلك – حتى لا تتعفن الجذور – فمعظم الناس يميتون نباتاتهم بسبب كثرة سقى النبات فتختنق الجذور ثم تتعفن فيموت الزرع
فى نهاية الصيف تظهر زهور بيضاء صغيرة رقيقة فى صفوف فوق بعضها تتحول بعد ذلك الى ثمار – عندما تتخشب تلك التيجان قصها واحتفظ بها لان بها بذور ريحان يمكن زراعتها من جديد
فى الخريف سيجف النبات – لا تنسى أن تقص الأجزاء العلوية من السيقان التى تكون على شكل تيجان والتى تحمل الزهور التى جفت واصبحت خشبية وتحولت الى ثمار – فهى الحبوب التى ستستخدمها فى الربيع القادم بإذن الله – وهكذا يمكننا من نبتة واحدة أن نحصل على عدد غير محدود من نبات الريحان العطرى الجميل – كما يمكننا إهداءها لمن نحب – فهى هدية جميلة مثلا لأى عروسين ليضعوها فى بلكونة شقتهم الجديدة – وهى أقيم من بوكيه الورد التقليدى اللى ييذبل ويلقى فى الزبالة بعد كام يوم – بينما الريحان كائن حى ينمو أمام أعينهم ويمدهم وبرائحة وعبق شذى رومانسى لسنوات وسنوات
ماذا افعل اذا كان الريحان يميل علي جنب هل اقصه
جس التربة لو ناشفة ولونها فايح لون التراب يبقى الريحان عطشان – اسقيه فورا قبل مايموت من العطش
اما لو التربة سوداء ورطبة يبقى انت بتسقى الزرع اكتر من اللازم وكدة حتتسبب فى عفن الجذور – لازم بين كل سقية واخرى تنتظر حتى تجد التربة ناشفة ولونها فاتح – ولاحظ ان النبات لا يحتاج ماء كثير فى الشتاء
طيب الريحان لما يكبر ،آخد منه ازاي بحيث يرجع يطلع تاني و الزرعه متبوظش ؟
قصى اللى انتى عايزاه بس سيبى ولو جزء ورقى بسيط
فى الواقع كل ما تقصى الرايحان بيطلع ضعف اللى قصيتيه ويزداد كثافة
قصيه دايما اولا باول واتركيه فى المطبخ غير مغطى حتى يجف وشيليه فى برطمان للسلطات والبيتزا والشوربة
طب الفل كيفيه التعمل معها لزم يكون ف الشمس
أنا زرعت ريحان بس لما أسيبه فى الشمس يدبل ولما أبعده عن الشمس يدبل وبعدين بيظهر فيه حاحات بيضاء على شكل خطوط. أنا عاوزه أعرف أسيبه فى السمش قد ايه وأسقيه كل قد ايه.
شكرا
أنا زرعت ريحان بس لما أسيبه فى الشمس يدبل ولما أبعده عن الشمس يدبل وبعدين بيظهر فيه حاحات بيضاء على شكل خطوط. أنا عاوزه أعرف أسيبه فى السمش قد ايه وأسقيه كل قد ايه.
ولو اليحان الجدور بتاعته نشفت بس هو بيزرع ينفع أرجع الجدور كويسه تانى حتى لو بالبرى.
شكرا
آسف للتأخر فى الرد – بالنسبة للماء عند حضرتك مؤشر واضح: التربة – لو التربة لونها اسود وملمسها رطب دة معناه ان لا تسقى النبات – لو التربة اصبحت باللون الترابى وملمسها جاف اسقى النبات – دى قاعدة بسيطة وتنطبق على جميع انواع النباتات – ولما الاوراق تدبل دة معناه ان التربة نشفت من مدة ولم تسقيه – يعنى عطشان موت – اسقيه فورا وبعد ساعة حتلاقى الاوراق تفرح وتعلى تانى – اما بالنسبة للشمس فالريحان ينمو اسرع فى الشمس – بس طبعا حيعطش اسرع مما لو كان فى الظل – يعنى لو عايزة تسقيه على فترات متباعدة ضعيه فى الظل لكن لو عايزاه ينمو اسرع ضعيه فى الشمس – بس حيعطش بسرعة – وفى الايام الحر قوى ممكن يحتاج سقى مرتين فى اليوم – بس أهم حاجة لون التربة – لا تسقى ابدا نبات تربته لونها اسود وملمسها رطب
الخطوط واللطع البيضاء دة مرض يصيب النباتات – اول حاجة ابعدى النبات المصاب عن باقى النباتات لانه معدى لهم – وبعدين باستخدام قطنة مبللة يمكنك التخلص بسهولة من تلك البقع وان شاء الله ما ترجعش تانى
وبالنسبة لزرع ريحان جديد – اسهل حاجة الزرع عن طريق البذور – انتظرى حتى فى نهاية الخريف لما الزهور اللى على شكل تيجان رأسية تذبل وتنشف خالص – وبعدين قصى فروع التيجان دى – وضعيها فى طبق بلاستيك غويط – وافركى الزهرات بين اصابع يدك حتلاقى حبوب سوداء صغيرة جدا فى حجم حبات الرمل – احتفظى بالحبوب السوداء حيبقى عند رصيد يكفيكى لسنوات طويلة – الحبة الواحدة تنتج زرعة كاملة – ازرعيهم بدئا من فبراير من كل عام قبل الربيع على طول
الله ينور على المعلومات دي بس أنا عندي سؤال انا زارع ريحان في البلكونة وبيوصله شمس كويسة أوي وبسقيه كل يوم بالليل بس ظهر فيه ورق أصفر كتير في الفترة الأخيرة فده ممكن يكون من ايه.. شكراً لكم
غالبا السبب هو انك بتسقى النبات اكتر من اللازم – ودة مش بيؤدى بس لاصفرار الاوراق دة ممكن يسبب غفن الجذور وموت النبات – لان جذور النبات محتاجة تتنفس ولو غرقانة فى ماء على طول بتتخنق وتعفن – والاوراق الصفراء مؤشر انذار
ما ينفعش حضرتك تسقى الزرع كل ليلة – لازم تنتظر لغاية الطينة ما يبقى لونها لون التراب وتجسها بايدك تلاقيها ناشفة – وطول ما التربة رطبة لا تسقيها ابدا
لا تسقى الزرع بصفة منتظمة – لان درجات الحرارة مختلفة يوم عن آخر – اعتمد مفياس النظر الى لون التربة وجسها – طول ماهى سوداء ورطبة فلا تسقيها ولا نقطة ماء
شكراً جداً على المعلومات المفيدة وشكراً للمساعدة
انا من راى الطريقة دى هتاخد وقت كتير انا عندى الحل وانا جربتها انت تجيب فرع من فروع الريحان سواء صغير او كبير وبعدين تجيب برطمان به ماء وتحط العود فيه 8 ايام بالضبط وتظهر جزور بس تغير الماء كل يومين بعدين تحطه فى اصيص به طينه وانشاء الله يطلع شجرة ريحان كبيرة
طريقتك جميلة يا اسلام – وانا باعمل كدة مع نباتات كتير لكن مجربتهاش مع الريحان – المشكلة ان طريقتك محتاجة حرص وخبرة فى اثناء نقل الجذور الرقيقة الى الطينة – وكمان ما تنفعش تستخدمها فى بداية الربيع لان الريحان السابق بيكون نشف وخشب – اما البذور فميزتها انك ممكن تخزنها سنوات وتستخدمها كل سنة قبل بداية الربيع
انا عندي ريحان وظهر عليه دود كتير طويل ايه الحل
يبقى لازم اشتريتيه من مشتل لانهم بيحطوا طينة مش بيتموس – وطبعا الطينة بيبقى فيها دود
انقلى الريحان فى قصارى بلاستيك وحطى فيها بيتموس بدل الطينة – او ممكن مشتل يعمل لك كدة
حاولى دايما لما تشترى زرع يكون فى بيتموس مش طينة ارض – اطلبى كدة من المشتل
انا بسقية صح بس انا مش فهمه ليه بيفضل دبلان انا من ساعة مشتريته وهو دبلان ايه الحل
ممكن تشرحى اكتر امتى بتسقيه؟
وهل التربة طينة وللا بيتموس
وهل القصيص بلاستيك وللا فخار – مخروم من تحت وللا مسدود؟
انا بسقية صح بس انا مش فهمه ليه بيفضل دبلان انا من اول مشتريته وهو دبلان ايه الحل بقالى 4 ايام مشترياه
صوريه وارفعى الصورة هنا عشان اعرف من شكله السبب
انا اشتريت زرعة ريحان وحطيتها في اصيص بلاستيك مش مخرم وصاحب المشتل قال اسقها كل يومين واخي الشمس يوصلها بس ذبلت على طول ايش السبب وهل لازم الإصيص يكون مخرم عشان الموية الزايدة تخرج وكمان عندي فل وقاردينيا بس ماذبل الا الريحان ..
ممكن تفيدني في الطريقة الصحيحة بالعناية فيهم وسقايتهم وشكرا
حضرتك كدة غالبا خنقتى الجذور واحتمال تعفن والنبات يموت ربنا يستر – الحقى افتحى خرمين من تحت
لانك لما تسقى زرع ماء كثير وبدون تسريب للماء الزائد الجذور بتتخنق وتعفن – الجذور محتاجة اكسجين
ثانيا لا تسقى اى زرع مطلقا الا لما تلاقى الطينة نشقت – يعنى تجسيها باصابع يدك لو لقيتيها رطبة يبقى مش عايزة ماء – لو لقيتيها ناشفة يبقى تسقيها – سواءا بعد يومين او اسبوع او اسبوعين – وكمان تقدرى تعرفى من لون الطينة – لو سوداء يبقى مش عايز ماء – لو تحول الى لون التراب الرمادى يبقى عطشان
اسقه كل كام يوم
اسقه كل كام يوم عشان ميموتش هو كبر شويه
لا توجد اجابة قاطعة – انت جس الطينة بصوابعك لو لقيتها رطبة ما تسقيهوش – لو لقيتها ناشفة اسقيه – ولما تسقيه اسقيه كويس مية كتير – وبعدين سيبه بدون سقى لغاية لما الطينة تنشف تانى وهكذا – كمان لون الطينة حيقول لك – لو سوداء يبقى مش عايز ماء – لو لون التراب يبقى الزرع عطشان
هوا اه البتموس دى انا جبت ريحان من المشتل والراجل حطلى الريحان مش فى طينة فى تراب بحر
البيتموس دة بديل للطينة وهو انظف وانسب للاماكن السكنية – بيتباع فى المشاتل ومحلات الورد فى اكياس او شكاير كبيرة او سايب بالكيلو وايضا يباع فى بعض الهايبرات
ممكن تخلطه برمل لانه خفيف عن الطينة وهش قوى – وشكله بيكون كدة:
انا عندى الزرعة بعد مقصقصتها ابتدت فروعها تسود والورق كذالك برده بيسود وبيكون عليه اخرام .. ارشدونى !!
بصراحة مشفتش قبل كدة ورق ريحان يسود ويبقى مخرم – للاسف مش حاقدر افيدك
ممكن زراعة الريحان في مايو؟
هو اية تراب البحر و هل هو ميفد للريحان
لم اسمع من قبل عنه
من فضل حضراتكم أنا بزرع الحب على مسافة 1 سم وأسقى كل يومين أو كل ما الطينة تنشف بس المشكلة تطلع سقان وورق صغير وبعدها ألاقيها ماتت على طلو ؟
هل زراعتة ليها مواعيد ولا أى وقت يا جماعه
الريحان ممكن تزرعه فى اى وقت خلال الربيع والصيف – وفى الخريف بيبدأ يكون زهور وبعدين ثمار مليانة بذور – وبعدين ينشف ويبقى خشبى وتحتاج لزراعته من جديد على فبراير-مارس
انصحك تضع 3 او 4 بذور فى نفس المكان – وبعد ما ينبتوا تبقى على اللى صحتها احسن وتنزع الاخرين من حولها – لتصبح نبتة واحدة فى القصيص اللى قطره من 10-20سم – ولما تبدأ تعلى تقص اعلاها عشان تفرع وتبقى كثيفة الافرع
تأكد من وضعها فى مكان مشمس معظم النهار ولا تسقيها الا بعد الطينة ما تنشف – ولما تسقيها اسقيها بغزارة لغاية ما الماء يخرج من الثقوب السفلية – ولا تترك الطبق ملئ بالماء حتى لا تغرق الجذور وتعفن
انا زرعت البذور فى طبق به قطن ودلوقتى نبتت اعمل ايه عشان انقلها لتربة عادية
بما ان الجذور بتكون رقيقة جدا اذن خطر على حياتها انك تخرجها من القطنة – الافضل انك تضع القطنة كما هى فى حفرة بسيطة 1سم او 2سم فى التربة وتردم عليها بالراحة خالص – وبعدين تسقيها بالراحة برضه – حتنمو وتمتد جذورها للتربة بسهولة باذن الله – اما لو البذور اللى نبتها كتير يبقى ممكن تقطع القطنة اكثر من جزء وتزرع كل جزء فى اصيص مستقل – وكل مجموعة نبتات لما تعلو بعد كام يوم اختار اقواهم وانزع الباقى من حولها عشان تنمو اسرع وتتغذى افضل
السلام عليكم – يعني الريحان عمره بس سنه ؟؟
ازاي طيب اقدر اترك الريحان بيعمر – شغلانه صرحه ازرع بقى كل سنه ^_^
هو الحقيقة بيعمر لو اتزرع فى الارض – لكن فى البلكونات صعب
هى على فكرة عملية ممتعة انك تزرع نبات من الصفر وتشوفه بيكبر امامك
وكمان ساعات الواحد بيزهق ويحب يزرع حاجة تانية بدل اللى زرعناه السنة اللى فاتت وهكذا – يعنى الريحان ضيف خفيف وكفاية بس ريحته لما تهزه او وانت بتسقيه
عندي نباتات مختلفه اشتريتها يوم الجمعه وليها اسبوع عندي اتفجات اليوم الاربعاء ان اواقها بدات تدبل مش زي ما اشتريتها من المشتل ومنفين احصل عل البتموس انا بعيده عن الاماكن دي النباتات مشك وعطر الليل و حصى لبان او روزماري وريحان والريحان بدت فروعه تتخشب وانا زعلانه جدا على نباتاتي واحب احافظ عليهم لان اتربيت ببيت فيه جنينه جميله
نفس المشتل حتلاقى عنده بيتموس
خلال اسبوع سقيتى الزرع كام مرة؟
لو سمحت عمو محمد لو عندك بعض الوقت تشرحلى الاعتناء بيهم خاصة في الشتاء وهل المسك هيزهر ام لا وصاحب المشتل قلي لو حابه نباتات تزيني يلكوناتك بيها عرفيني وانا اجهزلك مجموعه حلوه انا احب الياسمين بلدي وهندي ايه تاني مناسب لبلكونه وخاصة في الشتاء