آخر تحديث : 07-04-2017 الساعة 11:36 ص
تحديث : اقرأ اسرار تدميس فول دايب زي الزبدة
محلات الفول اصبحت تبيع الفول غالى جدا وكإنه حبات من اللؤلؤ – مع ان تدميسه رخيص جدا واسهل من السهولة – دة غير نظافة البيت طبعا
الفول المستورد يباع بسعر من 4 الى 6 جنيه – حيعمل لك كمية فول لو اشتريناها من المحل جاهز سيكلفنا 20 جنيه وربما اكثر
المقادير
- نصف كيلو فول تدميس
- ربع كيلو فول مدشوش
الطريقة
- ننقى الفول اولا لنتخلص من اى فوله مخرومة او سوداء
- ثم نغسله 3 مرات
- ثم ننقعه فى ماء كثير فى طبق كبير او حلة لمدة 12 ساعة
- ننقع الفول المدشوش فى وعاء آخر
- ثم نصفى ماؤهم (لو عندك زرع فى البلكونة استخدمه فى سقيه – فهو مغذى جدا للنباتات) – ونغسله
- نضع فول التدميس فى حلة ونضيف له ماء حتى يغطيه وفوقه 5سم ماء
- نسخن الفول على نار عالية وعندما يصل الى الغليان ننقل الحلة الى اصغر عين بوتاجاز ونوطيها لأقل درجة ممكنة ثم نغطى الحلة
- بعد 5 ساعات عندما يصبح الفول طرى كالملبن نضيف الفول المدشوش ونغطيه ساعة اضافية
- نطفئ النار ونترك الحلة بدون غطاء – وعندما تبرد نضعها فى الثلاجة
- ملحوظة: لو نار بوتاجازك عالية او لو غطاء الحلة غير محكم قد نحتاج لإضافة كوب او كوبين ماء زيادة – لذا من الأفضل فتح الغطاء بين الحين والآخر لنرى إذا كان الماء قل – وخصوصاً اول مرة ندمس فول – بعد كدة حنقدر نعرف كمية الماء المطلوب اضافتها من الأول
والف هنا وشفا
ممكن لو سمحتي تعرفيني لما نشتري الفول من عند العطار ازاي بنعرف الفول الكويس ؟؟؟ لان احيانا نشتريه يطلع قشرته قاسيه جدا و الفول يستوي كويس بس القشره تفضل ناشفه؟؟؟
انتوا ليه بتكلمونى على انى واحدة ست؟ ليه بتفترضوا ان طالما الكلام عن الاكل يبقى المتحدث ست؟؟
طب أتوقف عن الكتابة عن الاكل خالص عشان اتجنب المشكلة دى؟
حضرتك مش ملاحظة ان الموضوعات المكتوبة هنا بتفاصيل دقيقة وخطوات محسوبة ومجربة واوزان بالجرام؟ هل قرأتى لستات بكتب بالمستوى دة من الدقة؟
يا حاج محمد انت كلامك زى العسل، ويمكن كتبتلك تعليق امبارح يؤكد وجاهة موقعك واختيارك ألوانه بعناية وكذلك محتوى الموقع وأسلوبك الجميل اللّى بيفكرنا بعمنا العزيز أحمد فؤاد نجم- هذا إن لم يكن يروق لك التشبيه فأنا آسف جدا.
موقعك وانت زى القمر ببدرُه وطلته يا حاج محمد، شكرا كتير موضوعاتك الجميلة.
الف شكر لكلمات حضرتك الرقيقة
ويسعدنى ان ارى سيادتك دائما من خلال صفحات الموقع