طريقة عمل سلطة الطحينة

عندى ليك مفاجأة النهاردة اضغط هنا عشان تشوفها (مفاجأة جديدة كل يوم)

تحضير سلطة الطحينة معروف للكثيرين – لكن فكرت أن أكتبه لتستفيد منه العرايس والبنات الجداد على المطبخ وأى حد يبحث عن طريقة عمل سلطة طحينة تجنن

اضغط هنا

المقادير 

  • 60جم طحينة
  • 30جم خل
  • عصير ليمونة
  • 70جم ماء دافئ
  • 1 معلقة صغيرة كمون مطحون
  • ربع ملعقة صغيرة شطة (اختيارى)
  • ربع ملعقة صغيرة ملح
  • ملعقة صغيرة ثوم مهروس او بودرة ثوم (اختيارى)
  • ذرة ملح صينى (اختيارى – يعطيها نكهة خرافية)

الطريقة 

  • نخلط الطحينة مع الخل بمعلقة فى طبق عميق صغير (انا باخلطها فى برطمان أسهل بكتير – وكمان عشان احفظها فى الثلاجة وتبقى جاهزة لأى أكلة خلال اسبوع) – ثم نصب بعض الماء الدافئ ونقلب – ثم كمية ماء اخرى ونقلب تانى – وهكذا حتى نحصل على القوام المطلوب وتصبح ناعمة كالكريمة بدون ما تكون محببة
  • نضيف عصير الليمون الملح والكمون والشطة والثوم المهروس والملح الصينى ونقلب الكل
  • سنجد الطحينة طرية وسايبة – لكن بعد ان نضع الطحينة فى الثلاجة نصف ساعة على الأقل ستصبح سميكة أكثر

طبعاً يمكن مضاعفة الكميات – بنفس النسب – فى حالة الرغبة فى عمل كمية أكبر – وفى هذه الحالة نعمل الطحينة فى برطمان ونحكم غلقه ونحفظه فى الثلاجة لتبقى صالحة حتى أسبوع

سلطة الطحينة مناسبة لعديد من الأكلات – فهى رائعة لعمل سندوتشات من أقراص الطعمية الساخنة مع سلطة الطماطم – وسندوتشات الكفتة والبرجر والكبدة والفراخ والسمك والجمبرى والشاورما – ويمكن إضافتها لطبق الفول فتعطيه مذاق رائع – كما تصاحب أطباق الكفتة وكل المشويات وأطباق السمك والكبدة – وممكن تقليبها مع سلطة طماطم حتخلى الطعم روووووعة – وهى إضافة لذيذة تجمل أى سفرة طعام وفى العزومات والبعض ينثرها حتى على الأرز – ولو الميزانية خرمت آخر الشهر وعندك شوية طحينة يمكن تغميسها بطماطم مقطعة وتبقى وجبة تمام التمام يامعلم

يمكنكم أيضاً تصنيع الطحينة فى البيت – فهى سهلة جداً وموفرة – للطريقة اضغط هنا

لو الموضوع نال اعجابك اضغط هنا لدعم الكاتب (جزاكم الله خيراً)

5 تعليقات

  1. شكرا جزيلا يا حاج محمد. كان خالى شغال طباخ فى دايرة عدلى يكن باشا، وبعد الملكية فتح محل صغير بشارع سوق السلاح بالقلعة. وقبل آذان الظهر ما كنتش تعرف تحط رِجلك من زحام السمكرية والميكلنيكية وعمال سبك المعادن وأهل الحى. كان الله يرحمه محله بجوار مقام الشيخ سعود، لكن أى طحينة يا حاج بالبقدونس والخل والشطة ومش عارف مان بيضيف عليها إيه تانى وكان الواحد يلهف معاها رغيف بيتى من كان بيتعمل فى الماجور مع 6 قرص طعمية من بتاعة عدلى يكن، كان الواحد يقوم وِشُّه منفوخ بالعرض، وكان يجهز قرطاس طعمية يكنىِ ويقول: إدّيه لامك وسلم عليها. وكان أيام شغله فى دايرة الباشا طباخ: كان يفوت على أمى ويعطيها الفلوس المعدن فى قرطاس. كانت أيام يا حاج.
    شكرا جزيلا متعك الله بالصحة والعافية.

    • هو فيه زى اكل الناس بتوع زمان!
      الله يرحم خالك ويرحم موتانا وموتى المسلمين جميعا يارب
      كتر خيرك فكرتنى بموضوع الطحينة – فقمت بتعديل الوصفة اللى كتبتها من 5 سنين – قبل ما اكتشف ان عصير الليمون لا غنى عنه لاحلى مذاق لسلطة الطحينة
      ياريت لو عرفت اسرار وصفة خالك تكتبها لى الله يخليك

  2. منور الشبكة الدولية للمعلومات يا حاج محمد.
    أما بالنسبة لسلطة الطحينة، فتلك حكاية تانية
    بيتعملها طقوس خاصة يا سِيدى مع وصفة الكفتـة
    الحاتى بتاعة زمان الأصلى اللى حضرتك أكرمتنا بوصفها.
    وإيشى لو أقراص الطعمية مظبوطة تمام مع الباچيت
    الفرنساوى الأصلى من باكيرى ماريوت الباب الخلفى
    اللى بيطل على نادى الجزيرة. ادخل واطلع باكيرى ونَقّى المخبوزات اللى تعجبك .
    1- طحينة خام ¼ كج
    2- خل وليمون
    3- كزبرة ناشفة مطحونة
    4- كمـــون
    5- بقدونس مرعرع ودا روح الطحينة لو الناس تعرف.
    6- طبعا الكفتة الحاتى بتاعتك الملهلبة اللى الصُباع
    7- ملـح
    8- فلفل اسمر مطحون
    صباع منفوخ وملهلب، انت عارف ان سلطة الطحينة ما تنفعش من غير قرون شطة عصافرى حمرا مطحونة من
    بتاعة الواحات الداخلة. تقريبا وصل الكيلو منها 40 جنيه.
    ما تنفعش الطحينة من غير قِطع البقدونس الصغيرة والشطة الحمرا. لكن يبدو لى انك مش حتتحمل شطة الواحات الداخلة، لأنى أذكر انك مرة لمّحت ان معدتك ما تستحملش الكلام دا. لكن تتعمل سلطة الطحينة من غير شطة وحتكون زى الفل.
    بالنسبة للثوم، أنا مش من هواة إضافة الثوم على الطحينة
    لكن مزاج عند ناس وناس لأ.
    كثافة سلطة الطحينة انت عارف انها بحسب مزاج ناس وناس، لكنى با احبها مزيج متماسك وزى ما قلت لك سلطة الطحينة زى ما كنت با اكلها من إيد خالى رحمة الله عليه ما تنفعش بصراحة من غير بقدونس.
    المقادير معاك، وبالمناسبة: سلطة الطحينة مش حتختلف من خالى للشيف حسن لكتاب أبلة نظيرة.
    وانا عارف يا سِيدى انك شاطر بأمارة الكفتة الحاتى
    التى حصلت على وصفتها منك.
    إبدأ وبشطة أو من غير شطة، بالهنا والشفا يا حاج محمد،
    ومنور الشبكة الدولية للمعلومات.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *