تحديث:

كتبت لكم وصفة أحدث للطعمية – إقرأوها هنا: أخيراً عجينة طعمية ناجحة

—————————–

الطريقة القديمة  (طريقة مش حلوة – طريقة الافضل تجدونها هنا)

كنت طول عمرى لما أحاول أعمل عجينة طعمية تطلع فاشلة
وبعدين عرفت إن السبب إنى كنت بأضربها فى الخلاط زيادة عن اللزوم لغاية ماتنعم قوى – والصح إننا نخليها خشنة قليلاً لا ناعمة قوى ولا خشنة قوى

لكن برضه بعد القلى بتبقى لونها غامق من برة ومن جوة لسة نيئة

بحثت كتير عن السر فى إن طعمية المحلات بتكون هشة ومقرمشة ومستوية من جوة من غير مالنها يغمق من برة
لغاية ما عرفت السر الخطير

وهو إننا قبل ما نقلى الطعمية نضرب العجينة بمضرب كهربائى أو مضرب البيض اليدوى السلك – نضرببه العجينة كتير حوالى خمس دقائق – حتى تصبح لها رغوة وفايرة – ساعتها نقليها فى زيت ساخن – وبسبب هشاشتها حرارة الزيت ستتخلل مسامها وبكدة تستوى بسرعة من جوة زى من برة من غير ما لونها يغمق

نصف كيلو فول مدشوش
2 بصلة
10 فصوص ثوم
5 أعواد من كل من: بقدونس – كزبرة خضراء – شبت
3 ملعقة كبيرة كزبرة ناشفة
3 ملعقة صغيرة ملح ناعم
نصف ملعقة شطة

نغسل الفول المدشوش جيداً ثم ننقعه ليلة فى الماء
فى اليوم التالى نغسله ونصفيه من الماء تماما ثم نضربه فى خلاط أو كبة حتى تصبح حبيباته فى حجم حبيبات الكسكسى المتوسط
ثم نفرغه فى طبق ونضرب باقى المقادير مع بعض (بعد تخريط الخضرة ليسهل ضربها)
ثم نصب الخليط على الفول ونقلب الكل مع بعض
نحفظ العجينة فى الثلاجة – تكفى لعمل 3 مرات – وتستخدم خلال أسبوع
قبل القلى نضرب العجينة خمس دقائق بمضرب بيض حتى تصبح هشة ولها رغاوى
ثم نقلييها فى زيت حار على الجنبين

طريقة صحية لقلى الطعمية أو أى شئ محتاج للقلى
أنا بأعملها بطريقة صحية بأقل كمية من الزيت – بأن أصب العجينة فى صينية تيفال مدهونة بقليل من الزيت ثم أفردها فى الصينية بظهر ملعقة خشب حتى تبقى مسطحة – وبعدين أمسح وشها بفرشة مبللة بالزيت – – وأخيراً أقوم بعمل خطوط طولية وعرضية بالملعقة الخشب حتى تصلها الحرارة وتستوى من الأجناب – والأفضل إستخدام بخاخة صغيرة نرش بها الزيت بعد عمل الخطوط وفى هذه الحالة لا نمسحها بفرشة الزيت – ثم أضع الصينية فى الفرن وأشغل الشواية العلوية لمدة عشر دقايق حتى يصبح لونها ذهبى – ممكن إستعمال أى زيت لكن أنا بأفضل الزيت الحار لإنه مفيد جداً لمرضى السكر وضغط الدم المرتفع والكوليسترول وأنزيمات الكبد العالية – والحمد لله كلهم عندى
بنفس الطريقة ممكن نقلى الباذنجان المقلى – الفراخ البانيه – قطع فراخ كنتاكى سابقة السلق – البوفتيك – البطاطس المحمرة بعد سلقها وغيرها من أصناف الطعام المقلى – وبكدة نستخدم أقل كمية ممكنة من الزيت والأكل يكون خفيف على المعدة مش بيشر زيت

سيكون من المفيد لتنفيذ كل تلك الوصفات أن يكون لدينا بخاخة نرش منها الزيت – يمكننا إستخدام أى زجاجة عطر قديمة فارغة – بعد غسلها وتركها تنشف – ثم نلأ نصفها بالزيت ونرش منه على سطح أى طعام بالطريقة السابقة

يمكننا إستخدام زجاجة عطر قديمة كبخاخة لرش الزيت