هل مضاعفات السكر ممكن تحصل قبل ارتفاع السكر؟

احذروا مضاعفات مرض السكري فهي قد تكون مميتة - ويب طبس: هل مضاعفات السكر ممكن تحصل قبل ظهور مرض السكر؟
ج: ايوة ممكن للأسف
س: ازاى؟
ج: مضاعفات السكر بتحصل بسبب مقاومة الانسولين
طول ما البنكرياس بتاعنا قادر على افراز كميات عالية من الانسولين حنلاقي سكرنا مظبوط.. فمش حنعرف لاننا لما نقيس السكر حنلاقيه مظبوط.. اذن قياس السكر مقياس خادع
هناك فرق بين مقاومة الانسولين وبين السكر المرتفع
مقاومة الانسولين بتحصل من سنين قبل ظهور السكر.. احيانا من 15 حتى 20 سنة سابقة
الموضوع بيبدأ لما تظهر لنا بطن بسيطة
س: معقول؟ يعني الكرش الصغنن دة يعمل كل دة؟ ليه يعني؟
س: اصل المشكلة مش في الكرش في حد ذاته
المشكلة ان ظهور الكرش معناه ان بقى عندنا دهون حشوية احاطت – قبل ظهور الكرش – باعضاءنا الحيوية الكبد والبنكرياس والكلى و القلب والشرايين
الدهون دي بتعيق عملهم وتسبب ظهور المضاعفات
س: ايه الدهون الحشوية دي؟
ج: دي دهون بتتكون لما نكون بناكل اكل اكثر من قدرة جسمنا على حرق اللي بناكله
بالذات النشويات والسكريات اللي بتتحول الى جلوكوز
معدل الحرق دة بيختلف من شخص لآخر
س: وليه معدل الحرق مختلف من شخص لاخر؟
ج: اولا بسبب العامل الوراثي
يعني لو احد والديك وزنه زايد فدة قد يكون معناه ان معدل الحرق ضعيف عندك برضه
لكن العامل الوراثي لوحده مش كفاية
يعني لو بتلعب رياضة وبتتحرك اكثر وتقعد اقل دة حيزود معدل الحرق في جسمك وتتجنب السمنة والكرش
لكن لو حياتك خاملة وبتقعد معظم يومك في البيت والعمل والسيارة ومش بتمارس رياضة.. هنا العامل الوراثي حيكون تأثيره واضح جداً
خصوصا بقى لو بتاكل نشويات او سكريات كتير
س: ايه علاقة النشويات بالدهون الحشوية.. مش المفروض دهون الاكل هى السبب؟
ج: لأ خالص
اللي بيحصل ان لما يكون اكلنا اكثر من معدل الحرق بتاعنا.. الجلوكوز الناتج عن نشويات وسكريات اكلنا مش كله بيتحرق في خلايا جسمنا
الفائض بيحوله جسمنا الى دهون
وكمان السكريات بيكون نصفها تقريبا سكر فركتوز.. لو استهلكنا منها كتير بتتخزن كدهون وتأثيرها بيكون اكبر في تكوين الدهون الحشوية
وخطورة الفركتوز اشد من الجلوكوز
الفركتوز بيلزق في البروتين ويخليه يبقى بروتين متسكر يسد اوعية الدموية وبالذات الشعيرات الدموية الرقيقة فلا تصل المغذيات لأعصاب الطرفية وهنا تظهر مشاكل كثيرة بدئا من تنميل الرجلين الى الضعف الجنسي وتعب الكلى والعيون وكل مكان فيه انسجة رقيقة في جسمنا
س: وليه الجسم بيخزن دهون؟ هدفه ايه من كدة؟
دي حاجة تبع غريزة حب البقاء
استراتيجية بيعملها الجسم للحفاظ على حياتنا اى طاقة غير مستخدمة جسمنا بيخزنها على هيئة دهون كمخزون احتياطي يستخدمه وقت الاحتياج له.. مثلا اثناء الصيام او النوم او لو مثلا تهنا في الصحرا ومفيش اكل
الطبيعي والعادي ان الجسم يخزن الدهون دي في الكبد والعضلات
لكن لما الدهون تزيد عن الحد المعقول يضطر الجسم يخزنها في منطقة البطن وما يحيط بها من اعضاء حيوية
وتبتدي خلايا جسمنا تتملي دهون ثلاثية
وهنا تظهر المشكلة
س: مشكلة ايه؟
ج: البنكرياس لما يفرز انسولين عشان ياخد الجلوكوز يدخله الخلايا.. بيلاقي الخلايا مفيهاش مكان.. اتملت دهون.. فميعرفش يدخل
يقوم المخ واخد خبر
فيبعت امر للبنكرياس: افرز انسولين اكتر
وبرضه الانسولين مش عارف يدخل الخلايا
وهكذا تزيد نسبة افراز الانسولين لتصل احيانا الى 10 اضعاف المعدل الطبيعي
ودة اللي بيسموه مقاومة انسولين.. يعني خلايا الجسم بتقاوم دخول الانسولين والجلوكوز اللي جايبهولها
كدة الخلية جعانة لم يصلها غذاء
فالمخ يشعرك بالجوع فتاكل تاني
لذلك من علامات مقاومة الانسولين اننا نجوع كل شوية
س: طيب مش في الحالة دي الجلوكوز حيبقى عالي في الدم ولما نقيس نلاقيه عالي؟
س: فى الاول ولسنين طويلة البنكرياس بيعمل كل ما في وسعه لادخال الجلوكوز وبينجح في كدة على حساب تعبه وارهاقه لانه بيضطر يفرز اضعاف المعدل الطبيعي من الانسولين
ودي نقدر نعرفها سنين قبل ظهور السكر لو عملنا تحليل اسمه Homa IR
س: ايه التحليل دة؟
ج: دة تحليل بسيط بنعمله بعد صيام 8 ساعات
هو تحليل بنقيس فيه حاجتين:
السكر صايم
والانسولين صايم
س: انسولين صايم؟
ج: ايوة هرمون الانسولين بيكون موجود في الدم ونقدر نقيسه في اى وقت
لما تطلع النتيجة المعمل بيضرب النتيجتين في بعض وبعديا يقسم حاصل الضرب على 405
او لو معمل صغير ممكن احنا نحسب بنفسنا
المفروض النتيجة تكون 1 او اقل
وكل ما الرقم زاد معنى كدة ان عندنا مقاومة انسولين اعلى
معنى كدة ان البنكرياس بيفرز انسولين مضاعف اكثر
معنى كدة ان البنكرياس تعبان اكتر
معنى كدة ان خلايا بيتا المسئولة عن انتاج وتخزين وافراز الانسولين نسبة منها بيحصل لها تلف اكثر كل شوية
معني كدة اننا نقترب من حد الخطر
س: ايه حد الخطر دة
ج: الحد اللي البنكرياس لا يعد فيه قادر على افراز المزيد من الانسولين
وهنا بس تظهر اعراض مرض السكر المعروفة من عطش شديد وجوع مستمر وكثرة تبول وتعرق وارهاق
س: طب والحل ايه عشان منوصلش لحد الخطر دة؟
ج: اول حاجة نوقف سبب المشكلة الاصلي: النشويات والسكريات
ونتحرك اكثر ونجلس اقل
ونمارس رياضة ترفع معدل الحرق وتساعدنا على زيادة الكتلة العضلية
وننام بدري وما ناكلش متأخر
ونبعد عن اى حاجة بتوترنا او تزعلنا
س: ايه علاقة الزعل والتوتر بالموضوع؟
ج: مفيش حاجة في جسمنا مش بتتأثر لما نزعل او نتوتر.. كل هرمونات الجسم بتتلخبط.. وكل العمليات الحيوية في جسمنا بتتأثر..
مينفعش تكون صحتنا كويسة لو احنا عايشين في نكد او هم او ضغوط عصبية ونفسيه
قرب من ربنا.. صلي.. اقرا قران.. اذكر الله
القلوب العامرة بالايمان ربنا بيديها قوة وسلام نفسي عجيب
وتصبح الحياة بكل همومها ومصائبها امر هين لا يقلقنا.. ليقيننا ان المؤمن كل امره خير وان ما نعتقد انه شر هو خير لنا باذن لله
لو وصلت للدرجة الايمانية دي صحتك حتتحسن جداً وهرموناتك حتشتغل زى الساعة وتنام بدري وتصحى مع نسمات الفجر تملأ قلبك بذكر الله ورئتيك بهواء الفجر العليل اللي لا مثيل له في اى وقت آخر من اوقات اليوم
س: طب بص يا هندسة.. اخلص بس طقم السندوتشات دة في السريع.. واحبس بمرقع بيبسي وبعدين نكمل الحوار بتاعك دة.. حلو الكلام؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.