كورس تعلم الانسولين – الحلقة السابعة

احنا عرفنا ازاى نحسب معامل التصحيح المبدئي والفعلي وعرفنا ازاى نحسب معامل النشويات المبدئي

النهاردة حنعرف مع بعض آخر نقطة مهمة في حسابات الانسولين وهى: ازاى نحسب معامل النشويات الفعلي

احنا اتفقنا ان معامل النشويات المبدئي بيكون ربع معامل التصحيح الفعلي

يعني لو معامل التصحيح الفعلي بتاع حسين 40 يبقى معامل النشويات 10

دة معامل النشويات المبدئي بتاع حسين

أما معامل النشويات الفعلي فدة حيعرفه من قياساته الفعلية

وعشان يحسبه صح محتاج وقت يكون سكره فيه مظبوط في حدود 100 او 120

نفترض ان حسين قاس سكره وجده 100 وعايز يحسب معامل نشوياته الفعلي

لو حسين حياكل 60 جرام نشويات يبقى محتاج كام وحدة انسولين؟

هو عايز بعد الاكل بساعتين سكره يبقى 100 زى ما هو

اذن مش محتاج يصحح.. هو محتاج بس انسولين يحرق نشويات وجبته

حيقسم 60 ÷ 10 = 6

وبالتالي حسين اخد 6 وحدات انسولين سريع وبعد ربع ساعة اكل وجبته

لو بعد ساعتين حسين قاس سكره وجده 88

اذن هناك فرق 12 درجة اقل من المطلوب

معنى كدة ان الانسولين حرق سكر اكتر من اللازم

يعني معامل النشويات مفروض يزيد

طب يزيد كام؟

لو قسمنا 12 ÷ 6 = 2

اذن معامل نشويات حسين الفعلي مفروض يزيد 2

10 + 2 = 12

الرقم دة لازم حسين يحفظه ويتعامل بيه بعد كدة لما يحسب جرعاته قبل الاكل

معنى كدة ان حسين بعد كدة لما ياكل وجبة فيها 60 جرام نشويات ياخد كام وحدة لحرق نشويات وجبته؟

60 ÷ 12 = 5 وحدات انسولين سريع

 

طب نفترض العكس

لو حسين قاس سكره بعد ساعتين من اخد ال6 وحدات فوجد سكره 112

112 – 100 = 12

اذن توجد نسبة خطأ في وحدة الانسولين الواحدة كام؟

12 ÷ 6 = 2

اذن في الحالة دي معامل النشويات المبدئي حنطرح منه 2

10 – 2 = 8

اذن معامل النشويات الفعلي هو 8

اذن العلاقة عكسية:

يعني لو سكرنا بعد ساعتين وجدناه اقل من المطلوب بنزود معامل النشويات

ولو وجدنا سكرنا اكتر من المطلوب بنقلل معامل النشويات

 

ودلوقتي بقى ناخد مسألة عشان نتأكد اننا فهمنا صح:

ايمن معامل التصحيح الفعلي بتاعه 64

معامل النشويات المبدئي كام؟

حياكل وجبة تحتوي على 80 جرام نشويات

قاس سكره قبل الاكل وجده 100

ياخد كام وحدة انسولين سريع قبل الاكل عشان يحرق نشويات وجبته بحيث يفضل قياسه بعدها 100 زى ما هو؟

 

ولو قاس سكره بعد ساعتين من بداية الوجبة فوجده 120 وليس 100 كما اراد

تقدر تحسب له معامل النشويات الفعلي بتاعه؟

 

(بعد ما تجاوب.. قارن اجابتك بالاجابة الصحيحة الموجودة في اول تعليق.. لو وجدت اجابتك غلط ياريت تقرأ الموضوع من جديد وتحاول مرة اخرى الى ان تصل بنفسك الى الحل الصحيح)

One Comment

  1. الاجابة:
    المعامل النشويات المبدئي لأيمن:
    64 ÷ 4 = 16
    عدد وحدات الانسولين لحرق نشويات وجبته:
    80 ÷ 16 = 5 وحدات انسولين سريع
    مقدار الخطأ في معامل النشويات بالزيادة:
    120 – 100 = 20
    مقدار الخطأ لكل وحدة الانسولين:
    20 ÷ 5 = 4
    اذن معامل النشويات الفعلي اقل 4:
    16 – 4 = 12
    اذن معامل النشويات الفعلي = 12

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.