كورس تعلم الانسولين – الحلقة الخامسة

كل يوم سؤال
ياترى مين حيجاوب صح النهاردة؟
هدفنا نشر الثقافة الصحية لكل السكريين
فلا تبخلوا بدقائق من وقتكم كل يوم لتعلم شئ جديد عن السكر.. لان السكري طبيب نفسه ومحدش حينفعك غير نفسك.. وثقافتك الصحية هى الدرع الواقي من مضاعفات السكر ربنا يحفظكم
بقالي اسبوع باسألكم على جرعات التصحيح لغاية ما زهقتوا مني.. لكن الحمد لله اعضاء كتير بقوا اساتذة في حساب جرعات التصحيح
النهاردة حنتكلم في موضوع جديد: معامل النشويات
ما معنى معامل النشويات؟
معناه للناس اللي بتستخدم انسولين وجبات: وحدة الانسولين الواحدة تحرق او تغطي كام جرام نشويات؟
كل شخص له معامل نشويات خاص به
يعني مثلا لو قلنا ان حسين معامل النشويات بتاعه 10 فمعنى كدة انه لو اكل وجبة مجموع نشوياتها 50 جرام اذن هو محتاج 5 وحدات انسولين وجبات (اكترابيد – نوفورابيد – ابيدرا – هيومالوج) يا خدهم قبل الوجبة
يعني بنقسم مقدار نشويات الوجبة على معامل النشويات بتاعنا والناتج حيكون هو عدد وحدات الانسوين السريع او انسولين الوجبات
طيب ازاى اعرف معامل النشويات بتاعي؟
ببساطة نقسم معامل التصحيح على 4
يعني لو معامل التصحيح بتاعك 40 يبقى معامل النشويات المبدئي 10
يعني ايه مبدئي؟
يعني مؤقت.. يعني نستخدمه كنقطة نبدأ منها.. لكن معامل النشويات الفعلي بنعرفه من متابعة سكرنا بعد الاكل
زى بالظبط لما اتكلمنا عن معامل التصحيح المبدئي والفعلي
المبدئي بنستخدمه مؤقتاً في بداية استخدام الانسولين وبيكون رقم بنحسبه بمعادلة ثابتة
اما الفعلي فبنعرفه بعد ما نتابع قياساتنا وبنستخدمه بعد كدة دايما
يعني معنى كدة اني لازم اعرف الاول معامل التصحيح بتاعي؟
ايوة بالظبط
معامل التصحيح هو الاساس.. وبعد ما تعرفه وتتأكد منه فعلياً تقسمه على 4 ويبقى هو دة معامل النشويات المبدئي الخاص بحضرتك
لو لسة مش عارف معامل التصحيح بتاعك اقرأ هذا الموضوع:
طيب ازاى اعرف معامل النشويات الفعلي بقى؟
طب مش تسأل الاول ازاى تحسب نشويات اكلك؟
اه صحيح.. ازاى؟
توجد طرق كتير لحساب النشويات.. ادقهم الحساب بالوزن.. بتشتري ميزان مطبخ رقمي رخيص بحوالي 80 جنيه
وتوزن اى حاجة قبل ما تاكلها
وبعدين تستخدم جدول انا عاملهولكوا هنا:
او ممكن تستخدم الموقع دة:
طيب سؤال: امتى استخدم معامل التصحيح بتاعي وامتى استخدم معامل النشويات؟
معامل التصحيح تستخدمه لو لقيت سكرك عالي وعايز تنزله في غير اوقات الاكل
اما معامل النشويات فتستخدمه قبل الاكل.. لكن مع معامل التصحيح؟
ازى يعني؟
يعني مثلا لو حسين معامل التصحيح الفعلي بتاعه 40 وقاس سكره وجده 180 وعايز ينزله ل100
لو مش حياكل يبقى كدة محتاج يحقن وحدتين انسولين سريع
لكن لو حياكل وجبة مجموع نشوياتها 60 جرام يبقى لازم كمان يزود 6 وحدات انسولين يعني ياخد 8 وحدات
2 منهم للتصحيح لخفض 80 درجة
و6 عشان يحرقوا نشويات وجبته
(بما ان معامل التصحيح بتاع حسين 40 اذن معامل النشويات ربع هذا الرقم يعني 10)
بالراحة علينا شوية.. دي معلومات كتير كدة!
طيب خلاص كفاية كدة النهاردة ونكمل بكرة باذن الله باقي الشرح
هو لسة فيه شرح تاني؟
ايوة.. خد بالك ان البنكرياس الهدية الربانية دي يعتبر سوبر كمبيوتر بيقوم بكل الحسابات بدون اى تدخل بشري.. وعند السكريين لما يكون البنكرياس مش بيفرز انسولين كفاية لازم احنا بقى نحسب ونجمع ونطرح ونقسم ونضرب عشان نظبط سكرنا عشان نتجنب اى مضاعفات.. فالموضوع يستاهل وقتك
طيب فين سؤال النهاردة؟
اتفضل:
حسام معامل التصحيح الفعلي بتاعه 32
قبل ما ياكل قام بوزن كل صنف من اصناف الاكل اللي حياكلها وحسب نشويات كل منهم.. فوجد مجموع نشويات الوجبة 56
وقبل ما ياكل قاس سكره وجده 260
السؤال:
لو حسام عاوز بعد الاكل يكون سكره 100
ياخد كام وحدة انسولين سريع قبل الاكل؟
#كل_يوم_سؤال

 

(بعد ما تجاوب.. قارن اجابتك بالاجابة الصحيحة الموجودة في اول تعليق.. لو وجدت اجابتك غلط ياريت تقرأ الموضوع من جديد وتحاول مرة اخرى الى ان تصل بنفسك الى الحل الصحيح)

One Comment

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.