كورس تعلم الانسولين – الحلقة الرابعة

كل يوم سؤال
ياترى مين حيجاوب صح النهاردة؟
هدفنا نشر الثقافة الصحية لكل السكريين
النهاردة حنكمل كلامنا عن معامل التصحيح
امبارح ماشاء الله اعضاء كتير جاوبوا صح.. لكن لسة ناس كتير مش عارفة تحسب.. يارب النهاردة كل الناس تحسب صح..
وعشان اسهل لكم الموضوع صممت لكم الة حاسبة بسيطة تقدروا تستخدموها وهى تحسب لكم كل حاجة.. بس الاول ياريت تحاولوا تجاوبوا السؤال بنفسكم بدون الاستعانة بالحاسبة.. وبعدين استخدموا الحاسبة للتأكد من الحل
على فكرة..
الانسولين مش بس للنوع الاول
النوع الثاني ممكن يضطر ياخد انسولين لو طبيبه كتب له اقراص محفزة للبنكرياس ارهقته واتلفت مع الوقت خلايا بيتا المنتجة للأنسولين.. ودة بيحصل مع ناس كتير للأسف الشديد.. خصوصا الناس اللي بتاكل عيش ورز والدكتور قالهم كلوا منه بس قليل!!
وحتى لو حضرتك مش بتاخد انسولين.. الثقافة حلوة وممكن تفيد غيرك بالمعلومة.. قريب او صديق.. شفاكم الله وعافاكم جميعا
النهاردة حسألكوا سؤال جديد يعتمد على معلومات كتبتها لكم تحت
⭐ ⭐ ⭐ سؤال اليوم
فاطمة مريضة سكر نوع ثاني
وزنها كان 95 كيلو
لكن وزنها فجأة نزل 15 كيلو بسرعة غريبة بدون تخطيط منها واصبح 80 كيلو
هى بقالها سنين بتاخد اقراص اماريل ولما لقت سكرها بيعلا تاني مؤخراً راحت للدكتور غير لها الدوا الى ديامكرون
مشيت عليه
ولما خست فجأة اتخضت وعملت تحليل كفاءة البنكرياس لقته اقل من الحد الأدنى.. طبعا بسبب اماريل وديامكرون اللي بيعصروا البنكرياس ويسببوا فشله مع الوقت.. ومع ذلك اغلب الدكاترة مازالوا مصرين يكتبوه لضحاياهم
الدكتور لما راحت له امبارح بنتيجة التحليل طبعاً لم يعترف لها بخطأه وقال للمسكينة ان دة التطور الطبيعي لمرض السكر وكتب لها انسولين تستمر عليه باقي حياتها لان البنكرياس خلاص مبقاش قادر يفرز ما يكفي لحرق سكر الدم ( وبرضه الدكتور مقلهاش تمنع نشويات ولا سكريات)
امبارح بدأت تاخد انسولين لأول مرة
روحت البيت متنكدة امبارح..
قاست سكرها وجدته 355
هى ملهاش نفس تاكل خالص دلوقتي..  لكن عايزة سكرها ينزل يبقى 100
لكن الدكتور مشرحلهاش تعمل ايه لو سكرها علي ولا تحسب ازاى ولا حتى قالها يعني ايه جرعة تصحيح.. وقته لا يسمح عشان الطوابير اللي واقفين برة
لكن هى شاطرة وكانت بدأت تقرأ وتثقف نفسها كويس وعرفت ان اول مرة تصحح لازم تحسب الاول معامل التصحيح المبدئي بتاعها بالمعادلة البسيطة وهى قسمة رقم 3400 على وزن الجسم
قسمت 3400 على وزنها طلعت النتيجة 42.5
دة معامل التصحيح المبدئ.. يعني المؤقت نستخدمه بس في بداية التعامل مع الانسولين وبعد كدة نتابع قياساتنا عشان نعرف المعامل الفعلي اللي نعتمد عليه بعد كدة  كام
طيب.. هى دلوقتي عايزة سكرها ينزل يبقى 100
اذن هى عايزة تنزل 355 – 100 = 255 درجة
قسمت 255 على معامل التصحيح اللي هو 42.5 طلعت النتيجة 6
فاخدت 6 وحدات انسولين سريع
لكن بعد ساعتين قاست سكرها وجدته 175 وليس 100
اذن هى تستنتج من كدة ان معامل التصحيح الفعلي بتاعها كام؟
والنهاردة قاست سكرها وجدته 310 وملهاش نفس تاكل برضه
 تاخد كام وحدة تصحيح فعلي عشان يبقى 100 ؟
♥ ♥ ♥ شوية معلومات تساعدك في الحل:
عشان نقدر نحسب لنفسنا جرعة التصحيح محتاجين الاول نعرف معامل التصحيح.. كل واحد له معامل تصحيح خاص بيه يختلف عن غيره من الاشخاص
معامل التصحيح معناه وحدة الانسولين السريع قادرة على خفض سكرنا كام درجة
يعني مثلا لو قلنا ان حسين معامل التصحيح بتاعه 50 فدة معناه ان كل وحدة انسولين ياخدها بتخفض سكره 50 درجة
طيب ازاى اعرف معامل التصحيح بتاعي؟
يوجد معامل تصحيح مبدئي
ومعامل تصحيح فعلي (بنعرفه بالتجربة العملية ومراقبة سكرنا بعد التصحيح)
المبدئي نقدر نحسبه دلوقتي مع بعض
حنقسم 3400 على وزننا
يعني مثلا لو حسين وزنه 68 كيلو
اذن معامل تصحيح حسين = 3400 ÷ 68 = 50
اذن معامل التصحيح المبدئي لحسين هو 50
يستخدمه كبداية.. وبعدين من خلال متابعة قياساته يقدر يوصل لمعامل التصحيح الفعلي
يعني لو حسين لسة جديد في الانسولين وقاس سكره ووجده 300 ياخد كام وحدة عشان ينزله ويبقى 100 ؟
حنطرح 300 – 100 = 200
يعني حسين محتاج يقلل سكره 200 درجة
طيب.. ياخد كام وحدة؟
حنقسم 200 ÷ معامل التصحيح المبدئي اللي حسبه لنفسه ووجده 50
200 ÷ 50 = 4
اذن حسين محتاج يحقن 4 وحدات انسولين سريع
طيب لو بعد ساعتين حسين قاس سكره ووجده 160 وليس 100
معنى كدة ان حساب معامل التصحيح محتاج تعديل
طيب ازاى نعدله؟
حنطرح القياس الفعلي بعد ساعتين من قياسه قبل التصحيح
300 – 160 = 140
يعني 4 وحدات خفضوا سكره 140 درجة
يبقى نقسم 140 على ال4 وحدات اللي حسين خدهم
140 ÷ 4 = 35
اذن معامل التصحيح الفعلي لحسين هو 35 وليس 50
زى ما شوفنا معامل التصحيح الفعلي بنعرفه من التجربة العملية ومراقبة سكرنا
وطبعا المعامل الفعلي دة هو اللي حسين بعد كدة يحسب بيه وليس المبدئي
وطبعا محتاجين يكون عندنا انسولين سريع او انسولين وجبات عشان نستخدمه في التصحيح..
لو انسولين سريع مثل ابيدرا او نوفورابيد او هيومالوج بنقيس بعد ساعتين من جرعة التصحيح
اما لو انسولين بشري عادي زى اكترابيد او هيوميولين ار بنقيس سكرنا بعد 4 ساعات
الانسولين المخلوط مش مناسب للتصحيح
طبعا الناس اللي بتاخد انسولين لازم تكون شاطرة في الحساب.. لان الانسولين كله عمليات حسابية.. ومفيش دكتور حيقدر يتابعك كل يوم لو سكركك علي.. لازم تتعلم تحسب لنفسك.. ولو طفل لازم مامته تتعلم عشان تقدر تظبط سكره.. بلاش نقول مليش في الحساب.. كل حاجة قابلة للتعلم لو فيه رغبة.. والموضوع بسيط جدا
دلوقتي بقى مين حيجاوب؟
حتى لو جاوبت غلط يكفيك شرف المحاولة.. ومرة في مرة حنتعلم سوا باذن الله
لو الحسبة مش مش مفهومة او لو حليت وعايز تتأكد.. استخدم حاسبة جرعات التصحيح: https://my2cents.gawaher.com/24297
ولو فيه نقطة مش واضحة اسألوني وانا اوضحها لكم
وعلى فكرة متتصوروش فرحتي بيكوا لما تجاوبوا.. بتحسسوني ان تعبي معاكم جاب نتيجة.. ربنا يفرح قلبكم ويسعدكم دنيا وآخرة
#كل_يوم_سؤال

 

(بعد ما تجاوب.. قارن اجابتك بالاجابة الصحيحة الموجودة في اول تعليق.. لو وجدت اجابتك غلط ياريت تقرأ الموضوع من جديد وتحاول مرة اخرى الى ان تصل بنفسك الى الحل الصحيح)

One Comment

اترك تعليقاً

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.