كورس تعلم الانسولين – الحلقة الاولى

كل يوم سؤال
ياترى مين حيجاوب صح النهاردة؟
هدفنا نشر الثقافة الصحية لكل السكريين
اول امس اتكلمنا عن معامل التصحيح ..والنهاردة حسألكم سؤال جديد عنه
على فكرة.. حتى لو حضرتك مش بتاخد انسولين.. الثقافة حلوة وممكن تفيد غيرك بالمعلومة.. قريب او صديق.. شفاكم الله وعافاكم جميعا
النهاردة حسألكوا سؤال جديد يعتمد على المعلومات اللي في المنشور السابق برضه:
⭐ ⭐ ⭐ سؤال اليوم
منى بنت مريضة سكر نوع اول
وزنها 40 كيلو
قاست سكرها وجدته 270
هى مش حتاكل لكن عايزة سكرها ينزل يبقى 100
اخدت وحدتين انسولين سريع
لكن بعد ساعتين قاست سكرها وجدته 140
منى تستنتج من كدة ان معامل التصحيح الفعلي بتاعها كام؟
ولو تاني يوم قاست سكرها وجدته 295 تاخد كام وحدة تصحيح عشان يبقى 100 ؟
♥ ♥ ♥ شوية معلومات تساعدك في الحل:
عشان نقدر نحسب لنفسنا جرعة التصحيح محتاجين الاول نعرف معامل التصحيح.. كل واحد له معامل تصحيح خاص بيه يختلف عن غيره من الاشخاص
معامل التصحيح معناه وحدة الانسولين السريع قادرة على خفض سكرنا كام درجة
يعني مثلا لو قلنا ان حسين معامل التصحيح بتاعه 50 فدة معناه ان كل وحدة انسولين ياخدها بتخفض سكره 50 درجة
طيب ازاى اعرف معامل التصحيح بتاعي؟
يوجد معامل تصحيح مبدئي
ومعامل تصحيح فعلي (بنعرفه بالتجربة العملية ومراقبة سكرنا بعد التصحيح)
المبدئي نقدر نحسبه دلوقتي مع بعض
حنقسم 3400 على وزننا
يعني مثلا لو حسين وزنه 68 كيلو
اذن معامل تصحيح حسين = 3400 ÷ 68 = 50
اذن معامل التصحيح المبدئي لحسين هو 50
يستخدمه كبداية.. وبعدين من خلال متابعة قياساته يقدر يوصل لمعامل التصحيح الفعلي
يعني لو حسين لسة جديد في الانسولين وقاس سكره ووجده 300 ياخد كام وحدة عشان ينزله ويبقى 100 ؟
حنطرح 300 – 100 = 200
يعني حسين محتاج يقلل سكره 200 درجة
ياخد كام وحدة؟
حنقسم 200 ÷ معامل التصحيح المبدئي
200 ÷ 50 = 4
اذن حسين محتاج يحقن 4 وحدات انسولين سريع
طيب لو بعد ساعتين حسين قاس سكره ووجده 160 وليس 100
معنى كدة ان حساب معامل التصحيح محتاج تعديل
طيب ازاى نعدله؟
حنطرح القياس الفعلي بعد ساعتين من قياسه قبل التصحيح
300 – 160 = 140
وبعدين نقسم 140 على عدد الوحدات اللي حسين خدها
140 ÷ 4 = 35
اذن معامل التصحيح الفعلي لحسين هو 35 وليس 50
زى ما شوفنا معامل التصحيح الفعلي بنعرفه من التجربة العملية ومراقبة سكرنا
وطبعا المعامل الفعلي دة هو اللي حسين بعد كدة يحسب بيه وليس المبدئي
وطبعا محتاجين يكون عندنا انسولين سريع او انسولين وجبات عشان نستخدمه في التصحيح..
لو انسولين سريع مثل ابيدرا او نوفورابيد او هيومالوج بنقيس بعد ساعتين من جرعة التصحيح
اما لو انسولين بشري عادي زى اكترابيد او هيوميولين ار بنقيس سكرنا بعد 4 ساعات
الانسولين المخلوط مش مناسب للتصحيح
طبعا الناس اللي بتاخد انسولين لازم تكون شاطرة في الحساب.. لان الانسولين كله عمليات حسابية.. ومفيش دكتور حيقدر يتابعك كل يوم لو سكركك علي.. لازم تتعلم تحسب لنفسك.. ولو طفل لازم مامته تتعلم عشان تقدر تظبط سكره.. بلاش نقول مليش في الحساب.. كل حاجة قابلة للتعلم لو فيه رغبة.. والموضوع بسيط جدا
دلوقتي بقى مين حيجاوب؟
حتى لو جاوبت غلط يكفي انك تحاول.. ومرة في مرة حنتعلم سوا
ولو فيه نقطة مش واضحة اسألوني وانا اوضحها لكم
(بعد ما تجاوب.. قارن اجابتك بالاجابة الصحيحة الموجودة في اول تعليق.. لو وجدت اجابتك غلط ياريت تقرأ الموضوع من جديد وتحاول مرة اخرى الى ان تصل بنفسك الى الحل الصحيح)

One Comment

  1. الاجابة:
    270-140=130
    130÷2=65
    إذن معامل التصحيح الفعلي لمنى هو 65
    اذا منى قاست سكرها في اليوم الثاني وكان 295 وارادت ان تنزله الى 100 نتبع الخطوات التاليه:
    295 – 100=195
    اذن منى محتاجه تقلل سكرها 195
    195÷65 (معامل التصحيح الفعلي) =3 وحدات انسولين سريع
    اذن منى محتاجة تحقن 3 وحدات انسولين سريع

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.