عجينة السبع ايام

آخر تحديث : 07-02-2021 الساعة 11:44 م

قرأتم عن عجينة العشر دقائق وعجينة السبع دقائق.. الان اليكم عجينة السبع ايام هههههههههههههه

دي عجينة للجادين فقط.. للي عاوز ياكل حاجة مميزة مش اى كروتة والسلام..

اذا كنت متعود تعمل بيتزا في البيت لاسرتك كل اسبوع.. ولو غاوي عجينة بجد وبتستمع بعمل مخبوزات احترافية.. او لو عندك محل بيتزا وعايز تبقى متميز عن باقي المحلات.. حاقولك على طريقة سهلة تبني بيها العجينة في 7 ايام.. لتحصل على عجينة برية مفيدة صحياً لكل افراد الاسرة (او لزباينك عشان يدعولك لما ينبهروا بطعامة العجينة البرية ذات المزازة اللذيذة اللي بتميزها عن اى عجينة عادية).. فكرتها بسيطة وهى اننا بناخد فتفوتة من عجينة خمرت وجاهزة لعمل البيتزا.. او بقايا العجينة في الطبق او الحلة اللي خمرنا فيه العجينة.. حوالي 2 جرام فقط

دايماً في الحلة اللي خمرنا فيها العجينة.. بتكون فيها بقايا عجينة لازقة في القعر.. بدل ما نغسل الحلة نحتفظ بيها كما هى.. هى دي حتبقى الخميرة بتاعتنا.. يعني مش حنستخدم خميرة تاني.. ولا حنحتاج نشتري خميرة بعد كدة ابداً.. دي الطريقة اللي كان الفراعنة بيخبزوا بيها من الاف السنين.. وهى نفس الطريقة اللي الفلاحة المصرية الاصيلة مازالت بتخبز بيها العيش الفلاحي الجميل.. وبعض افران العيش البلدي بتستخدمها ايضا حتى الان (لو قريب منك فرن بلدي اشتري من صاحب المخبز رغيف نى متقرص قبل ما يدخل الفرن.. وخد من الرغيف النى 2 جرام تبدأ بيها العجينة بتاعتك.. حتة بحجم حباية ترمس كدة)

نحضر زجاجة فيها ماء العجن.. انا باستخدم 510 جرام ماء لعجن كيلو دقيق.. نحط الماء في الزجاجة بالوزن.. ونضيف في الزجاجة 20 جرام ملح خشن (2% من وزن الدقيق) ونرج الزجاجة عشان الملح يدوب.. دي الزجاجة اللي حناخد منها الماء طوال الاسبوع

ناخد من الزجاجة نصف معلقة صغيرة ماء يعني حوالي 2 جرام ماء.. يعني نفس وزن قطعة العجينة اللي بحجم الترمساية.. او بقايا العجينة اللي في الحلة لو خبزنا قبل كدة.. وندوب العجينة والماء في بعض

وبعدين نفتح عبوة دقيق وزن كيلو وناخد منه 2 جرام دقيق نضيفه في الحلة ونقلب الكل لنحصل على عجينة طرية ناعمة

كدة بقى معانا عجينة وزنها 6 جرام (2 جرام عجينة + 2 جرام ماء + 2 جرام دقيق)

نغطي الحلة

وفي اليوم التالي نضيف ماء بنفس وزن عجينة امبارح اللي كانت 6 جرام.. يعني نضيف 6 جرام ماء من نفس الزجاجة

وبعد ما نقلبهم كويس ناخد نفس الوزن من كيس الدقيق.. يعني 6 جرام دقيق.. ونقلب الكل

كدة بقى معانا عجينة وزنها 18 جرام (6جم عجينة امس + 6جم ماء + 6جم دقيق)

ونغطي الحلة

في اليوم الثالث نكرر نفس الخطوات: 18 جرام ماء من نفس الزجاجة و18 جرام دقيق من عبوة الدقيق نفسها

كدة بقى معانا عجينة وزنها 54 جرام

ونغطي الحلة

في اليوم الرابع نكرر نفس الخطوات: 54 جرام ماء من نفس الزجاجة و54 جرام دقيق من عبوة الدقيق

كدة بقى معانا عجينة وزنها 162 جرام

ونغطي الحلة

في اليوم الخامس نحط 130 جرام ماء من نفس الزجاجة و130 جرام دقيق من عبوة الدقيق

كدة بقى معانا عجينة وزنها 421 جرام

ونغطي الحلة

في اليوم السادس نحط كل الماء المتبقي في الزجاجة (320 جرام)  و320 جرام دقيق من عبوة الدقيق

كدة بقى معانا عجينة وزنها 1062 جرام

ونغطي الحلة

في اليوم السابع.. يوم الخبز.. قبل 6 ساعات من بدء تسوية البيتزا في الفرن .. نحط باقي عبوة الدقيق ونقلب كويس ونحط العجينة على الرخامة ونعجنها للمرة الاولى والوحيدة

وبعدين نقسمها كور ونحط كل كورة في وعاء منفصل

وبعد 3 ساعات نفرد كل كورة في صينية مدهونة بفرشة زيت

ونحط الصواني في فرن مغلق 3 ساعات لغاية ما تنفش وتعلا

نسخن الفرن على درجة 200 لمدة نصف ساعة وبعدين نبدأ نحط اول صينية بعد ما نكون فردنا الصلصة والاضافات ماعدا الجبنة المبشورة

وبعد 7 دقائق ونصف نرش الجبنة على وجة البيتزا ونعيدها للفرن 7 دقايق ونصف ايضا

وهكذا باقي الصواني

ولو عايزين نعمل عجينة اكبر او اصغر او نغير مقدار الماء او الملح او لو عايزين نعمل العجينة في عدد ايام أقل من 7 ايام ممكن نعمل كل دة في فايل انا تركته لكم على جوجل شيتس لتستخدموه كيفما شئتم

رابط الشيت هنا:

 

https://docs.google.com/spreadsheets/d/1Q6H6rPfPLkf-mv3aQpS6wqPgJWS5oZkriCRs–bDQmI/edit?usp=sharing

 

ودي صورة الجدول موضح لكم فيه الخطوات لو بتخبزوا كل سبع ايام او كل 6 او 5 او 4 او 3 او يومين حسب اختياركم:

fill the yellow cells Day 1 2 3 4 5 6 7 Total
Total flour (g): 1000 seed 1 4 12 36 108 324 1074
Four to water ratio 100% water 1 4 12 36 108 375 536
Final hydration: 51% flour 2 4 12 36 108 375 463 1000
dough salt 2.6% total 4 12 36 108 324 1074 1536 1536
6-day build
Day 1 2 3 4 5 6 Total
seed 4 12 36 108 324 1076
water 4 12 36 108 376 536
flour 4 12 36 108 376 464 1000
total 12 36 108 324 1076 1540 1536
5-day build
Day 1 2 3 4 5 Total
seed 12 36 108 324 1084
water 12 36 108 380 536
flour 12 36 108 380 464 1000
total 36 108 324 1084 1548 1536
4-day build
Day 1 2 3 4 Total
seed 36 108 324 1108
water 36 108 392 536
flour 36 108 392 464 1000
total 108 324 1108 1572 1536
3-day build
Day 1 2 3 Total
seed 108 324 972
water 108 324 104 536
flour 108 324 568 1000
total 324 972 1644 1536
2-day build
Day 2 3 Total
seed 324 972
water 324 212 536
flour 324 676 1000
total 972 1860 1536

 

2 تعليقان

اترك رداً على انور إلغاء الرد

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.