آخر تحديث : 19-09-2021 الساعة 02:04 م

كلنا نحتاج احيانا لخفض نار شعلة البوتاجاز لاقل درجة.. مثلا عند تسوية الارز عشان نتجنب ان قعره يشيط او عند الطهى البطئ slow cooking

لكن اغلب البوتاجازات شعلاتها لما نوطيها مش بتوطى كالشمعة.. بتفضل عالية نسبيا

لكن احنا نقدر نضبط شعله منهم بحيث لما نوطهيها بمؤشر الشعلة توطي زى الشمعة

الطريقة سهلة جدا

الاول نشعل الشعلة اللي عاوزين نظبط الواطي بتاعها.. ونخليها على الوضع الواطي خالص

وبعدين نشيل الزر بتاع الشعلة بسحبه للخارج ونشيله من مكانه (بيركب شحط بدون مسامير)

حيظهر لك الشكل التالي:

باستخدام مفك صغير لف المسمار اللي بيشير اليه السهم.. وعينك على الشعلة الى ان توطى لاقل درجة حسب رغبتك

بس خلاص.. ركب زرار الشعلة تاني في مكانه.. ومتنساش تحط السوستة الداخلية بتاعة الزرار

بعد كدة في اى وقت عايز توطي الشعلة لف الزرار لاقصى اليسار حتلاقي الشعلة واطية كالشمعة

مع العلم ان مسمار ضبط الشعلة لا يؤثر على وضع النار العالية.. لكن تأثيره فقط على وضع الشعلة الواطية.. اما الشعلة على الوضع العالي فبتفضل عالية زى ما هى