حل مشكلة عدم سماع صوت تكتكة سخان الغاز

آخر تحديث : 23-11-2019 الساعة 05:27 م

انا مش فني صيانة سخانات.. انا مجرد شخص عندي سخان غاز ايديال وباحب لما اعرف حاجة مفيدة اقولها للناس عشان يستفيدوا
أى عطل بيحصل واطلب الصيانة باحرص على مشاهدة الفني وأسأله في كل حاجة عشان اتعلم منه.. عشان بعد كدة اعر اعملها بنفسي وعشان انقل لكم اللي اتعلمته مهم

لو سخان حضرتك ماركة تانية مش مشكلة.. اغلب سخانات الغاز بتشتغل بنفس الطريقة ومكوناتها هى هى.. بنفس الاسماء

مش باطلب ابداً الا الصيانة الرسمية للجهاز.. لان الاعلانات الخادعة كتير جدا وبيحاولوا يوهموك انهم مركز الصيانة الرسمي.. لذلك اضمن طريقة لمعرفة الصيانة الرسمية هى الرجوع لكتالوج السخان حتلاقي رقم تليفون الصيانة الرسمي.. بالنسية لماركة ايديال رقم الصيانة الرسمي هو: 19999

طبعا فني الصيانة الرسمي بيكون شاطر جداً فبلاش تلجأ لاى فنى آخرلانه ممكن يعمل شغل غلط ويبقى السخان غير آمن

لكن المشكلة ان ايديال صيانتها غالية
اولا مصاريف الانتقال 90 جنيه تدفعهم حتى لو معملش اى حاجة.. مجرد حضور الفني يكلفك 90 جنيه

ثانياً اى قطعة غيار يركبها لك بياخد 10 اضعاف ثمنها.. يعني مثلا السولينويد بيحاسبك على ثمنه 300 جنيه.. بينما لو جبته من كلوت بك حتلاقي سعره 30 جنيه.. وقيس على كدة اى حاجة.. عشان كدة لو اشتريت القطعة وركبتها بنفسك فحضرتك كدة حتوفر كتير قوي.. ولا تقلق.. الفك والتركيب سهل جداً وحاشرح لحضراتكم كل حاجة بالصور

نيجي بقى للأعطال الشهيرة:

لو السخان لما تفتح حنفية الماء الساخن بتسمع تكتكة لكن الشعلة مش بتولع ومفيش ماء ساخن يبقى شوف الحل هنا: حل مشكلة عدم اشتعال سخان الغاز

اما لو حضرتك لما تفتح حنفية الساخن ومتسمعش صوت تكتكة يبقى المشكلة ممكن تكون :

  • إما في بيت البطارية
  • او في قاعدة المايكروسويتش
  • او في المايكروسويتش نفسه

بيت البطارية

بيت البطارية هى العلبة البلاستيك اللي بنحط فيها 2 حجر طورش.. احيانا الغطا اللي بتقفله على البطاريات واللي فيه قطعة معدن وسوستة.. احيانا السوستة دي بتتكسر.. وبالتالي كدة البطاريات مش حتبقى متوصلة.. في الحالة دي الفني حيقولك يغير لك بيت البطارية بسعر 120 جنيه.. انا رفضت طبعا لان بيت البطارية بلاستيك لا يساوي اكتر من 10 جنيه.. فما كان من الفني الا انه استخدم حل عبقري لم يخطر على بالي الصراحة.. طلب مني حتة سلك مواعين.. عارفين سلك المواعين اللي بيتباع بالكيلو سايب دة واللي الستات بتشتريه بالوزن من البقال او السوبرماركت؟

 

قطع حتة وكورها وحطها مكان السوستة المكسورة وقفل الغطا.. كدة المشكلة اتحلت

قاعدة المايكروسويتش

لو التكتكة فضلت مستمرة بعد ما شعلات السخان ولعت.. او لو مفيش تكتكة خالص.. يبقى العيب إما في قاعدة المايكروسويتش او في المايكروسويتش نفسه

قاعدة الميكروسويتش دي عبارة عن قطعة معدنية الفني غيرهالي بسعر 170 جنيه.. انا دايماً  اول مرة باوافق وادفع.. لكن بعد كدة بانزل كلوت بك اشتري منها 2 او 3 واخليهم عندي احتياطي باقل من عشر ثمنها ..

القاعدة شكلها كدة:

بتتفك وتتركب بمسمارين في سقف القطعة.. مكان الخرمين اللي في الصورة في الجزء العلوي منها

عشان تعرف اذا كانت القاعدة محتاجة تتغير وللا لأ.. افتح حنفية السخن.. المفروض حتلاقي الدراع اللي على اليمين دة اتحرك وراح ناحية اليمين.. ولما تقفل حنفية السخن.. الدراع يرجع مكانه

لو دة مش بيحصل تبقى القاعدة محتاجة تتغير

المايكروسويتش

الفني قال لي ثمنه 250 جنيه لكن لما رفضت قال لي طب هات برفان بخاخ وراح فكه ورشه بالبرفان وركبه تاني.. بس كدة
وقال لي هو حيشتغل معاك فترة بس بعد كدة حتحتاج تغيره.. فابذن الله حاشتري 2 احتياطي.. وغالبا حيكون ثمنه مثلا 20 جنيه مش اكتر

لمعرفة طريقة فك وش السخان حتلاقوا الطريقة في الموضوع السابق: حل مشكلة عدم اشتعال سخان الغاز

ولمعرفة ارخص مكان تشتروا منه قطع غيار السخانات حتلاقوا الوصفة بالتفصيل هنا: سعر ومكان شراء قطع غيار سخان الغاز

ارجو اني اكون افدتكم بشوية معلومات تساعدكم على توفير فلوسكم بدلا من استغلال الشركات واسعارهم الغير مبررة

اسيبكم مع فيديو حتشوفوا فيه قاعدة المايكروسويتش وازاى بتتحرك لما نفتح حنفية السخن

شارك هذا الموضوع
error

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.