بيتزا بالخميرة البرية وشرش اللبن

آخر تحديث : 30-06-2019 الساعة 01:16 م

لو بتعملوا لبنة بيتي مثلي يبقى اكيد بيتبقى عندكوا كمية كبيرة من شرش اللبن نتيجة لتصفية الزبادي – طبعاً خسارة نرميه لانه مليان بروتين وكالسيوم ومغنسيوم وبوتاسيوم وفيتامين A وفوايد كتير جدا – ومعروف ان البروتين اللى بياخدوه الناس في الجيم هو عبارة عن شرش لبن مجفف لذلك فهو يساعد جدا في تكوين العضلات وعمل فورمة

ولعشاق البيتزا عندي لكم خبر جميل: تقدروا تستخدموا شرش اللبن بدلا من الماء عند تحضير عجينة البيتزا – والنتيجة بتكون بيتزا لذيذة وطرية وبتكتسب لون غامق تحفة في الفرن وبتكون نافشة وهشة عن البيتزا العادية
وطبعا كالعادة حنسنخدم خميرة برية عشان الفوايد الصحية تكتمل

المقادير

  • كيلو دقيق
  • 10 جرام خميرة برية
  • 600 جرام شرش لبن حلو
  • 20 جرام ملح بحري

الطريقة

  • ناخد في طبق صغير 10 جرام خميرة برية من البرطمان اللى شايلينه في الثلاجة – ونقلب معاها 10 جرام شرش ثم نضيف 10 جرام دقيق ونقلبهم كويس ونغطيهم في مكان دافي (دفي شوية ماء في حلة صغيرة وحط فيها وعاء الخميرة وغطيها)
  • بعد 4 ساعات نضيف 30 جرام شرش ونقلب – ثم 30 جرام دقيق ونقلب ونغطيهم برضه في مكان دافي
  • بعد ما تظهر فقاقيع كتير على وش الخميرة نضيف 90 جرام شرش ونقلب – ثم 90 جرام دقيق ونقلب ونغطيهم برضه في مكان دافي
  • بعد ما تظهر فقاقيع كتير على وش الخميرة نضيف باقي الشرش (يعني 470 جرام شرش ونقلب – ونرش الملح ونقلب – ثم باقي الدقيق ونقلب
  • نضع حلة العجينة في الثلاجة ليلة
  • في اليوم التالي نخرج العجينة من الثلاجة ونتركها مغطاه
  • بعد نصف ساعة نبل ايدينا بقليل من الماء ونصب العجينة على الرخامة ونبدأ نمط العجينة ونتنيها على نفسها من كل طرف 4 مرات – مرة من كل طرف وبعدين نرجعها في الحلة ونغطيها في فرن دافي مطفي – ونكرر عملية المط والثنى ثم الفرن الدافي كل نصف ساعة 4 مرات (يعني اجمالي ساعتين)
  • نقسم العجينة ونضعها في صواني مدهونة بفرشة زيت – ونشكل كل جزء على شكل كرة ونتركهم 5 دقائق يستريحوا
  • نفرد العجينة في الصواني ثم نضعهم في فرن دافئ ساعتين
  • نخرج العجينة عشان نشعل الفرن على اعلى درجة نصف ساعة فاضي للاحماء
  • في الوقت دة نحط الصلصة على البيتزا ثم الاضافات ماعدا الجبنة المبشورة
  • نضع اول صينية بيتزا في الفرن الحامي لمدة 7 دقائق
  • نخرج الصينية ونرش الجبنة المبشورة (الجبنة الشيدر المستوردة هى الأفضل على الاطلاق للحصول على مذاق مميز للبيتزا – بلاش موزريللا مصري) ثم نعيدها للفرن بسرعة (مع مراعاة اننا نلف الصينية 180 درجة عشان تستوي بالتساوي في كل الاركان)
  • بعد 7 دقائق اخرى نخرج الصينية وندخل صينية أخرى
  • ننقل البيتزا من الصينية الى شبكة تهوية 3 دقائق قبل تقطيعها وتقديمها ساخنة

وبالف هنا وشفا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.