بيتزا بالخميرة البرية وشرش اللبن بنظام البناء التدريجي

آخر تحديث : 23-07-2019 الساعة 12:15 م

لو بتعملوا لبنة بيتي مثلي يبقى اكيد بيتبقى عندكوا كمية كبيرة من شرش اللبن نتيجة لتصفية الزبادي – طبعاً خسارة نرميه لانه مليان بروتين وكالسيوم ومغنسيوم وبوتاسيوم وفيتامين A وفوايد كتير جدا – ومعروف ان البروتين اللى بياخدوه الناس في الجيم هو عبارة عن شرش لبن مجفف لذلك فهو يساعد جدا في تكوين العضلات وعمل فورمة

اما اذا كنتم مش بتعملوا لبنة فممكن تحصلوا على شرش من أى فﻻجة من اللي بيبيعوا جبنة قريش – بس توصيها تمﻷ له زجاجة شرش اﻻسبوع التالي وممكن تتفق معاها تجيب لك كل اسبوع – هما بيرموا الشرش فمش حتخسر حاجة لو جابتهولك طالما انت زبونها وبتشتري منها جبنة او لبن اوبيض او زبدة – هات لها بس زجاجات بﻻستيك فاضية

ولعشاق البيتزا عندي لكم خبر جميل: تقدروا تستخدموا شرش اللبن بدلا من الماء عند تحضير عجينة البيتزا – والنتيجة بتكون بيتزا لذيذة وطرية وبتكتسب لون غامق تحفة في الفرن وبتكون نافشة وهشة عن البيتزا العادية
وطبعا كالعادة حنسنخدم خميرة برية عشان الفوايد الصحية تكتمل

انا هنا باقدم لكم طريقة البناء التدريجي للعجينة – ودي طريقة بتخلي البكتيريا النافعة تتكاثر وتبقى البيتزا مفيدة جدا صحياً – والطريقة ببساطة هى اننا بدل ما نخلط كل الدقيق والماء مرة واحدة  بنبدأ بمعلقة صغيرة ونخمرها بنسبة ٥٠٪ في وسط دافي ثم نضعها في الثﻻجة ليلة – وفي اليوم التالي نضيف مزيد من الدقيق والماء ونكرر نفس الخطوات كل يوم حتى تستعمل كل دقيق الوصفة

التخمير في جو دافي بيسرع من تكوين حمض اللبن  Lactic acid ودة بيدي البيتزا طعم مزز لذيذ مثل طعم الزبادي
ولما نحطها في الثﻻجة بيتكاثر حمض الخل  Acetic acid ودة بيضيف طعم ﻻذع شوية زى طعم الليمون او الخل
لكن الفايدة الصحية اهم – وكﻻهما مفيد جدا وبيحول البيتزا الى مصدر غني بالبريبايوتك اللى هو غذاء البروبايوتك وهى الكائنات المفيدة اللى عايشة في امعاءنا الدقيقة وبتساعد على الهضم وتنشيط المخ والتذكر والوقاية من اﻻمراض

المقادير

  • كيلو دقيق
  • 10 جرام خميرة برية
  • 600 جرام شرش لبن حلو
  • 20 جرام ملح بحري

الطريقة

  • ناخد في طبق صغير 10 جرام خميرة برية من البرطمان اللى شايلينه في الثلاجة – دة اول مرة – لكن بعد كدة كل مرة في يوم الخبيز ناخد معلقة صغيرة من العجينة اللى اكتمل تخميرها قبل فردها في الصواني – ونقلب معاها 10 جرام شرش ثم نضيف دقيق بالتدريج مع التقليب لغاية ما تبقى العجينة متماسكة ومبتلزقش في الايدين – ونعجنهم كويس ثم نضعها في برطمان ونضعه في حمام ماء دافئ (دفي شوية ماء مثل دمعة العين في حلة ثم اطفي النار وحط فيها برطمان الخميرة وغطي الحلة)
  • بعد ساعتين نضع البرطمان في الثﻻجة ليلة
  • في الصباح نضيف 30 جرام شرش ونقلب – ثم دقيق برضه بالتدريج مع التقليب لغاية ما تبقى العجينة متماسكة ومبتلزقش في الايدين – ونعجنهم كويس ثم نضعهم في البرطمان ونقوم بعمل عﻻمة على زجاج البرطمان تظهر ارتفاع العجينة – ثم نضع البرطمان في حمام ماء دافئ كالخطوة السابقة
  • عند وصول العجينة الى ارتفاع ٥٠٪ ننقل البرطمان للثﻻجة
  • في اليوم التالي نضيف مزيد من الشرش والدقيق ونكرر نفس الخطوات السابقة بحيث بعد من ٣ ايام الى اسبوع (حسب الرغبة) نكون وصلنا بالعجينة الى الحجم المطلوب – افضل وسيلة هى تحديد كمية الدقيق من البداية ثم اﻵخد منها كل يوم – وعندما تنتهي كمية الدقيق نكون حصلنا على حجم العجينة المطلوب – وطبعا كمية الشرش والدقيق تختلف حسب احنا عايزين العجينة جاهزة بعد كام يوم – اقل حاجة ٣ ايام واكتر حاجة اسبوع – لو ٣ ايام نضيف كل يوم شرش ودقيق اكتر من لو عايزينها بعد اسبوع
    مثال: لو عايزين العجينة نستخدمها بعد ٤ ايام وحنستخدم كيلو دقيق:

    • اول يوم نستخدم كوب دقيق
    • ثاني يوم نضيف ٢ كوب دقيق
    • ثالث يوم نستخدم باقي الدقيق
    • رابع يوم نخبز
  • في اليوم اﻷخير نخرج العجينة من الثلاجة ونتركها مغطاه حتى ترتفع ٥٠٪
  • نقسم العجينة ونضعها في صواني مدهونة بفرشة زيت – ونشكل كل جزء على شكل كرة ونتركهم 5 دقائق يستريحوا
  • نفرد العجينة في الصواني ثم نضعهم في فرن دافئ ٣ ساعات
  • نخرج العجينة عشان نشعل الفرن على اعلى درجة نصف ساعة فاضي للاحماء
  • في الوقت دة نحط الصلصة على البيتزا ثم الاضافات ماعدا الجبنة المبشورة
  • نضع اول صينية بيتزا في الفرن الحامي لمدة ٦ دقائق
  • نخرج الصينية ونرش الجبنة المبشورة (الجبنة الشيدر المستوردة هى الأفضل على الاطلاق للحصول على مذاق مميز للبيتزا – بلاش موزريللا مصري) ثم نعيدها للفرن بسرعة (مع مراعاة اننا نلف الصينية 180 درجة عشان تستوي بالتساوي في كل الاركان)
  • بعد ٦ دقائق اخرى نخرج الصينية وندخل صينية أخرى
  • ننقل البيتزا من الصينية الى شبكة تهوية 3 دقائق قبل تقطيعها وتقديمها ساخنة

وبالف هنا وشفا

شارك هذا الموضوع
error

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.