آلة حاسبة للوجبات والانسولين

أعزائي السكريين المعتمدين على الانسولين

عشان نضبط سكرنا ويبقى طبيعي ونتجنب أى مضاعفات محتاجين الآتي :

  • ميزان مطبخ رقمي
    عشان نوزن أى أكل قبل ما ناكله ونقدر نحسب النشويات اللى فيه
  • جهاز منزلي لقياس السكر بالشرايط
    عشان نقيس سكرنا قبل الوجبة وبعدها بساعتين
  • نكون بنستخدم نوعين انسولين :
    • انسولين قاعدي بطئ مرة في اليوم
    • وانسولين سريع قبل كل وجبة
      (استخدام انسولين مخلوط مش مناسب وصعب ضبط السكر معاه)
  • ناكل بنظام لوكارب – وهو نظام اكل منخفض النشويات والسكريات عالي الدهون – ودة أفضل نظام لضبط مستوى السكر ويساعدك على تقليل جرعاتك لأقل درجة فتوفر فلوسك وصحتك وتتجنب مشاكل كثرة الانسولين اللى منها التعرض للهبوط والسمنة ومقاومة الانسولين
    تفاصيل نظام اللوكارب المفيد جداً لكم تجدونها هنا :
    https://www.facebook.com/SallamCS/posts/839203459759658

النقاط السابقة ضرورية عشان نقدر نستخدم الآلة الحاسبة بطريقة صحيحة
لاننا قبل كل وجبة حنحتاج :

  • نوزن اكلنا – وبعدين نسجل وزن كل صنف امام اسمه في الالة الحاسبة اللى حتحسب لك مجموع النشويات في وجبتك بعد جمع نشويات كل الاصناف اللى سجلتها في الوجبة بتاعتك
  • وحتحتاج تقيس سكرك قبل الاكل وتسجله أيضاً في الالة الحاسبة
  • وتسجل كمان بتاخد كام جرعة انسولين قاعدي وكام جرعة انسولين سريع قبل الفطار والغدا والعشا
  • وتسجل قياس السكر اللى عاوز توصل له بعد الاكل بساعتين
    120 رقم معقول – او ممكن تكون عاوزه 100 – حسب رغبتك – كل ما كنت عاوز الرقم أقل كل ما احتجت جرعة أكبر – الالة بتحسب لك لوحدها

بعد كدة الالة الحاسبة حتقوم بعمل الحسابات التالية الخاصة بك شخصياً :

  • معامل النشويات
    دة عبارة عن عدد جرامات النشويات اللى جسمك بيقدر يحرقها لما تاخد وحدة واحدة من الانسولين السريع – ودي بتختلف من شخص لآخر – المعتاد ان الجسم بيقدر يحرق من 12 الى 15 جرام نشويات لما ياخد وحدة انسولين سريع واحدة – لكن ممكن تتراوح ما بين 4 و 30 جرام
  • معامل حساسية الانسولين
    ودة ايضاً رقم خاص بيك وبتحسبه الالة عشان نقدر نعرف مدى حساسيتك للأنسولين – وبتستخدمه الآلة الحاسبة لحساب جرعة التصحيح
  • جرعة التصحيح:
    دي جرعة بناخدها مع جرعة الاكل لو كان سكرنا عالي قبل الاكل – او بناخدها لوحدها من غير أكل لو قسنا سكرنا في أى وقت ولقيناه عالي ومش ناويين ناكل بعدها
  • جرعة قبل الأكل + جرعة التصحيح
    ودي اجمالي الجرعة اللي مفروض تاخدها قبل الأكل – محسوبة حسب كمية النشويات اللى سجلتها وحسب قياس سكرك قبل الاكل – يعني داخل فيها أى جرعة تصحيح قد تكون محتاجها قبل الاكل – بحيث باذن الله لما تقيش سكرك بعد الأكل بساعتين تلاقيه زى ما انت عاوزه

قياس السكر بعد الاكل بساعتين :
بعد أخذ جرعة الانسولين السريع وبعد تناول وجبتك قيس سكرك بعد الاكل بساعتين
لو لاحظت انه أقل من قياس السكر اللى انت عاوزه تبقى المرة الجاية قلل الجرعة حاجة بسيطة – نصف وحدة مثلاُ – ولو لاحظت انه أعلي من قياس السكر اللى انت عاوزه تبقى المرة الجاية زود الجرعة حاجة بسيطة – نصف وحدة مثلاُ – ولاحظ المرة الجاية حيتظبط وللا لأ – وبالتجربة ويوم ورا يوم حتقدر ان شاء الله تعرف اذا جسمك بيحتاج اكتر وللا أقل من نتيجة الالة الحاسبة

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.