إناء التخليل المثالي

سنين وسنين وانا بادور على إناء التخليل دة او اى حاجة شبهه بلا جدوى – مع اننا في مصر بلد الفخار بكل اشكاله وانواعه

سمعت انه موجود في بعض القرى في الارياف – ياريت لو حد يعرفه او يدلنا على مكان بيعه يخدمنا كلنا

دى صورة اناء التخليل اللى اقصده

وهو انسب وعاء لكل انواع المخللات – وسر نجاحه في تصميمه عند فتحته العلوية – الرقبة – ذات الجدار الموزدوج – بحيث يبقى فيه حوض صغير دائري يحيط برقبة الاناء – والغطاء مصمم بحيث ينزل وسط الحوض ما بين الجدارين المزدوجين – وبعد وضع الغطاء نملأ الحوض بالماء حوالين الغطاء –  كما بالشكل التالي :

هذا الماء لا ينزل الى الداخل لان الجدار الداخلي للحوض مصمم بأمان بحيث يكون اعلى من الجدار الخارجي – وبالتالي واحنا بنملا الحوض اى ماء زائد عن سعة الحوض حينزل برة الاناء وليس بداخله

طبعا دة بعد ما نكون حطينا الخضروات في الاناء – سواءاً خيار او لفت او كرنب او قرنبيط او جزر زى ما نحب – وبعدين بنحط ثقل داخل الاناء فوق الخضار عشان يفضل المخلل تحت – وبعدين نصب المحلول الملحي – وبكدة الثقل حيمنع المخلل من الطفو لفوق – ودة مهم جداً لان المخلل لو تعرض للهواء يتلف – ودة شرط اساسي في التخليل الناجح –  لذلك لازم نتأكد دائما ان هناك طبقة من الماء اعلى من ارتفاع المخلل لمنع وصول الهواء للمخلل واتلافه

طبعاً اثناء عملية التخليل بتخرج غازات نتيجة للتخمر – والغازات دي بتكون على شكل فقاعات هوائية ولازم تخرج من الاناء – لكن احنا غلط نفتح لاننا لو فتحتنا على المخلل لاخراج الغازات حيدخل في نفس الوقت هواء يفسد التخليل

عشان كدة التصميم العبقري دة اتعمل

الحوض العلوي اللي ملأناه بالماء بيسمح بتبادل الغازات الخارجة من المخلل اولاً بأول ويخرجها بره الاناء – وفي نفس الوقت بيمثل طبقة عازلة مثالية لمنع دخول الهواء الى داخل الاناء – دي صورة لتصميم اناء التخليل من الداخل :

الجزء الأخضر دة المخلل
والجزء الأصفر دة الثقل اللى بيخلى المخلل لا يطفو لفوق (بيكون قرص مقسوم قطعتين لكى يسهل ادخالهم واخراجهم من رقبة الاناء)
والجزء الازرق هو مستوي ماء التخليل اللى لازم يكون بارتفاع أعلى من ارتفاع المخلل
والمنطقة البيضاء هي منظقة خالية بتتجمع فيها غازات التخليل الناتجة عن عملية التخمر ثم يمتصه الماء الموجود في الحوض العلوي (اللون اللبني) لتخرج الى الهواء خارج الاناء

دى صورة اناء التخليل من فوق :

هذا الاناء يسمح باطالة مدة التخليل فتزداد طعامة المخللات بالطبع – بعكس البرطمانات العادية اللى بتخلي المخلل ميعيش كتير

المخللات الطبيعية المنزلية كلها فوائد صحية ومفيدة جداً للسكريين ومرضى تصلب الشرايين والضغط وامراض القلب والكوليسترول والدهون والزهايمر – لاحتوائها على البكتيريا اللبنية kactic acid ولاحتوائه على فيتامين K2 الهام جدا واللى من ضمن فوائده الرهيبة انه بيوجه الكالسيوم في اكلنا للاماكن الصحيحة – العظام والاسنان – ومن غيره الكالسيوم ضار جدا لانه بيترسب في جدران الشرايين ويساعد في تكويت الجلطات وضيق الشرايين وتصلبها – وحتى لو دة حصل طوال سنوات وجدوا ان تناول مخللات منزلية طبيعية فيتامين K2 يستطيع اذابة 75% من الترسبات اللى على جدران الشرايين فترجع تاني توسع وتزداد ليونتها فينتظم الضغط العالي ويقل الاجهاد على القلب اللى كان تعبان من ضخ الدم 70 مرة في الدقيقة في شرايين ضيقة وفقدت ليونتها

والمخللات الطبيعيى بتعمل وقاية من امراض الشيخوخة مثل الزهايمر وديمينتيا وبتقوي الذاكرة

شرط المخللات عشان تكون طبيعية ونطلق عليها بروبايوتيك انها تكون متخللة بالماء والملح فقط – لان اضافة الخل يمنع عملية التخمر وتكوين البكتيريا النافعة

وبعد اكتمال تخمر المخللات نقدر نضيف خل وثوم وكل النكهات اللى بنحبها – لكن لازم في الاول ماء وملح فقط لاغير حتى اتمام التخليل

والبكتيريا اللبنية تنمو اسرع في محلول ملحي منخفض الملوحة – تبدأ من 1.5% الى 10% – كلما زاد الملح كل ما احتاج وقت اطول للتخليل – يعني النسبة الاقل من الملح تسمح بتخليل اسرع – لكن في نفس الوقت كل ما قلت النسبة كان احتمال تكون بكتيريات غير مرغوبة اكبر – فيبدأ المخلل يفقد قرمشته وبعدين يبدأ يكون ريم ابيض وتتغير ريحته ويفسد

تختلف نسبة الملوحة المناسبة حسب نوع الخضروات

من خبرتي طوال سنين وجدت ان نسبة ملوحة 1.5% مناسبة لتخليل ورق الكرنب – بينما الخيار واللفت يناسبة اكتر 2%

طريقة عمل المحلول الملحي هى :

  • نضع الاناء فاضي على الميزان مطفي ثم نشغل الميزان فيقرأ صفر
  • نأخذ الاناء ونضع فيه الخضار ونملأه ماء ثم نعيده للميزان
  • سيظهر لنا وزن الخضار مع الماء – نقسم الرقم على 100 ثم نضربه في 2 والناتج يكون مقدار الملح اذا كنا عايزين محلول بنسبة 2%
  • مثلا لو وزن الماء والمخلل 1000 جرام نضع 20 جرام ملح
  • يفضل استخدام الملح البحري الخام – لان ملخ الطعام مضاف اليه يود – واليود يبطئ من نمو البكتيريا النافعة مما يسمح بنمو بكتيريات غير مرغوبة فيفسد المخلل

وبالف هنا وشفا ودمتم بصحة وعافية مع نظام كيتو / لوكارب الصحي


إقرأ كل ما يتعلق بنظام لوكارب - كيتو - LCHF

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.