ارز كاوباد كيتو

آخر تحديث : 21-11-2019 الساعة 06:22 م

كاوباد kao pad طبق رز تايلاندي لذيذ جدا منتشر فى شوارع تايلاند – ممكن يتعمل بالجمبرى او مكعبات سمك او كابوريا او فراخ او رومى زى ما تحبوا – هنا حنعدل الوصفة عشان تبقى من غير رز – بحيث تبقى مناسبة لنظام لوكارب وللناس اللي عاوزة تخس – جربوه وان شاء الله حتدعولى – وحيبقى من اطباقكم الاساسية لان اللي يجربه بيحبه جدا

المقادير

  • نصف قرنبيطة صغيرة او ربع واحدة كبيرة
  • ربع كيلو سمك فيليه او جمبري مقشر او صدر فرخة مقطع مكعبات
  • عصير ليمونة
  • معلقة زبدة او سمن بلدي او زيت زيتون
  • بصلة صغيرة مخرطة
  • معلقة صغيرة ثوم مفروم
  • قرن فلفل حامى
  • ملح وفلفل
  • 3 بيضات
  • كوب خضرة مشكلة (بقدونس – كزبرة – شبت) او المتوفر منهم
  • معلقة كبيرة خل تفاح منزلي.. او عضوي غير مبستر ولا مفلتر

الطريقة

  • نفرم فرم خشن البصل والثوم والفلفل الحامي في الكبة – ونصبهم مع عصير الليمون على الجمبري المقشر او مكعبات السمك او صدور الفراخ ونتركهم ساعتين
  • نقطع القرنبيط ونغسله وبعدين نضربه في محضرة الطعام لغاية مايبقى فتافيت رفيعة بحجم وشكل حبات الارز
  • نسخن الزبدة او السمن او زيت الزيتون فى ووك او حلة تيفال ونسقط خلطة الجمبري او قطع السمك ونقلب بسرعة على نار عالية (في حالة مكعبات الفراخ نغطي الطاسة 5 دقائق على نار هادية الاول عشان تستوي وبعدين نعلي النار.. بس بصراحة الاكلة دي بتبقى احلى بالجمبري او السمك الفيليه)
  • نضيف نصف كمية ارز القرنبيط ونقلب 3 دقائق
  • نزيح الارز على جنب ونكسر البيض ونسقطه فى جنب الحلة واول ما يبدأ البياض فى الظهور نقلب البياض والصفار مع الارز
  • نضيف باقى الارز ونقلب
  • نطفى النار
  • نضيف الخضرة وخل التفاح ونقلب وناكل بالف هنا وشفا

على فكرة طعم القرنبيط في الطبق دة مش باين خالص – يعني اللي زهق من القرنبيط باقوله جرب الاكلة دي على ضمانتي !

دمتم بصحة وعافية مع نظام كيتو / لوكارب الصحي


إقرأ كل ما يتعلق بنظام لوكارب - كيتو - LCHF

شارك هذا الموضوع
error

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.