أسهل عيش توست بخميرة برية بدون عجن

آخر تحديث : 24-11-2018 الساعة 06:09 ص

sliceاقدم لكم اسهل واطعم عيش توست ممكن تعملوه فى البيت بمنتهى السهولة – حنستخدم خميرة برية – ممكن تعملوها بنفسكم – الطريقة هنا:  خميرة بلدى برية بالزبادى
او ممكن تاخدوها مني هدية بدون مقابل – التفاصيل هنا: خميرة برية متوفرة لمن يريد sourdough chef
وحنستخدم ردة حتى تكتمل الفائدة الصحية – لكن فى حالة عدم وجود ردة نستبدلها بنفس وزنها دقيق

مزيا هذه الوصفة

  • لا تحتاج الى عجن – مجرد تقليب فقط بمعلقة خشب او سباتيولا سيليكون
  • لن نلمس العجينة مطلقاً في أى مرحلة
  • طريقة صحية لأن الخميرة البرية والتخمير البطئ للعجينة سيسمح بتكاثر بكتيريا نافعة هى البكتيريا اللبنية LAB وهى تفس البكتيريا الموجودة في الزبادي – تساعد على الهضم وتقوي الجهاز المناعي للجسم
  • هذا الخبز يعيش فترة اطول ولا يتعرض للتلف بسرعة مثل الخبز العادي
  • أسهل في الهضم من الخبز العادي المصنوع بالخميرة التجارية

المقادير

  • معلقتين كبار خميرة برية او عجينة سابقة معمولة بخميرة برية
  • 800جم ماء
  • 550جم دقيق للمرحلة الاولى + 300جم دقيق للمرحلة الثانية
  • 150جم ردة ناعمة (اذا لم تتوفر ردة نضع 150جم دقيق بدلا منها)
  • 70جرام زيت
  • 2 معلقة صغيرة بيكربونات صوديوم (كربوناتو)

الطريقة

  • في الليلة السابقة للخبيز نخرج من الثلاجة برطمان الخميرة او العجينة السابقة ونضيف لها 3 معالق كبيرة من الماء ونقلبهم جيدا – ثم نضيف 3 معالق كبيرة من الدقيق ونقلب كويس حتى يصبح الخليط ناعما بدون كلاكيع
  • نترك البرطمان مغطى بدون احكام في المطبخ خارج الثلاجة
  • في الصباح نصب الخميرة في حلة العجن ونبدأ نخلط معها ماء العجن بالتدريج مع التقليب
  • نضيف بالتدريج دقيق المرحلة الاولى + الردة ونقلب كويس بسباتيولا سيليكون اوعصاية خشب او ايد معلقة خشب حتى يمتزج كل الدقيق بالماء
  • نغطى العجينة ونتركها على المطبخ 20 دقيقة
  • نكرر التقليب مرة ثانية حتى يصبح العجين ناعم بدون أى كلاكيع
  • نغطي العجينة ونتركها حتى تعلو لأقصى ارتفاع ثم تبدأ في الهبوط – من 4 الى 10 ساعات حسب الجو
  • نضيف الملح والبيكربونات لباقي الدقيق ونخلطهم جيدا
  • بعد ان تبدأ العجينة في الهبوط نضيف الزيت ونقلب كويس جداً  ثم نضيف باقي الدقيق المخلوط بالملح والبيكربونات ونقلب كويس جدا
  • بعد 20 دقيقة نقلب تاني حتى نحصل على عجينة ناعمة بدون كلاكيع
  • نأخذ معلقتين كبار من العجينة ونضعهم في برطمان الثلاجة كخميرة للمرة القادمة – مهم ألا ننسى هذه الخطوة كل مرة – وممكن احتياطي نضع معلقتين تانيين من العجينة في برطمان بالفريزر عشان لو مرة نسينا وللا حاجة
  • نصب العجينة في قوالب عيش توست او صينية فويل كبيرة بس تكون جوانبها عالية ولازم ندهنها الأول بفرشة زيت حتى لا تلتصق يها العجينة ويخرج العيش بسهولة – انا باستخدم طبق فويل ابعاده من خارج الشفة 32سم×26سم وارتفاع اجنابه 6.5سم ودة شكله :

  • الصوانى الالومنيوم ايضاً تعطى نتائج ممتازة – لكن حتى لا يلتصق بها العيش علينا اتباع الاتى قبل استخدام الصينية أول مرة فقط لتحويلها الى صينية لا يلتصق بها الطعام كالتيفال تماما:
    • ندهن الصينية من الداخل بقليل من الزيت باستخدام فرشة
    • نضع الصينية على نار بوتاجاز عالية حتى يبدأ الزيت اخراج دخان ابيض
    • نعرض كل جوانب الصينية للنار بنفس الطريقة حتى يدخن الزيت من كل الجوانب
    • نطفئ النار ونصب الزيت فى بلاعة الحوض ونترك الصينية حتى تبرد تماما
    • بذلك تكون الصينية قد تغطت بطبقة ملساء من الزيت وتصبح كالتيفال غير قابلة للالتصاق
    • بعد استخدام الصينية لا نغسلها بالصابون – اذا احتجنا الى غسلها نغسلها فقط بالماء حتى لا نفقد طبقة الزيت الملساء
    • اذا لم نستخدمها فترة طويلة قد يصبح للزيت رائحة غير لطيفة – فى هذه الحالة نغسلها بالصابون ونكرر الخطوات السابقة من البداية مرة أخرى
  • الصواني الفويل عملية اكتر ورخيصة جدا – حنحتاج نشترى 2 – واحدة نصب فيها العجينة والثانية نغطي بها الصينية
  • يجب الا يزيد ارتفاع العجينة عن نصف ارتفاع الطبق الفويل او الصينية عشان نعمل حساب ارتفاع العجينة لما تخمر وكذلك في الفرن لما تعلى
IMG_1409

العجينة بعد صبها فى قالب العيش

  • نضع القوالب او اطباق الفويل فى فرن البوتاجاز على الرف الأوسط ونغطيهم باطباق مماثلة ونقفل الباب ونتركهم ساعتين لغاية ما يصلوا الى ضعف ارتفاعهم
IMG_1412

العجينة بعد ساعة من صبها اتفردت وبقت متساوية فى القالب

IMG_1413

العجينة بعد ساعتين من صبها فى قالب العيش

  • نشعل الفرن على درجة 180 ونترك فيه العجينة مغطاه كما هى بدون تحريكها لمدة ساعة
  • نخرج العيش من القوالب ونقلبه على ظهره على شبكة الفرن ونغلق عليه باب الفرن ونطفئ نار الفرن – ونترك الخبز ربع ساعة بداخله مطفي حتى تخرج منه الرطوبة الزائدة
  • نخبط بصوابعنا على قعر العيش – لو بيخبط زى مانكون بنخبط على خشب يبقى استوى – اما لو لقينا القعر طرى نعيده للفرن مطفي مرة اخرى لمدة 5-7 دقائق
  • لو لقينا العيش لازق نغطيه بفوطة نصف ساعة ليسهل اخراجه
  • عندما يبرد تماما نضعه فى كيس فى الثلاجة
  • فى اليوم التالى نقطعه شرائح ليسهل تقطيعه

IMG_1415

بعد ما تجربوا العيش دة مش حتشتروا عيش تانى من اى فرن – كفاية بس ريحته اللى تجنن وبتملا الشقة كلها – ريحة ملهاش حل فى جمالها

وشرائح العيش حتلاقوها طرية وجميلة فى عمل السندوتشات او فى الغموس – وكمان العيش دة موفر جدا – ارخص 4 مرات على الاقل من الجاهز

وبالف هنا وشفا

أضف تعليق

3 تعليقات على "أسهل عيش توست بخميرة برية بدون عجن"

avatar
Rania
ضيف
Rania

هو كده مش العجين هيكون ملزق ولا مجرد ما نخلطة بنحطة فى الوعاء و نسيبة يتخمر وبعدها بنحطة فى الفرن علطول ؟

‫wpDiscuz