برجر طازج بيتي طعمه روعة

البرجر الجاهز سواءاً من مطاعم الوجبات السريعة او المجمد من السوبرماركت يحتوى على نسبة قليلة من اللحم ومعظمه فول صويا وعيش مفروم ومواد حافظة والوان صناعية وكيماويات ضارة بصحتك

أفضل شئ هو عمل برجر بيتى صحى بلا أى اضافات صناعية او تجارية ضارة – والمفاجأة انه ارخص بكتير من الجاهز – الواحدة تتكلف 3 جنيه فقط (بسعر المقادير وقت الكتابة) – وأطعم من أى برجر بتاكلوه في السلاسل الشهيرة – مش حتصدقوا طعامته

اليكم طريقة سهلة وسريعة لعمل برجر بيتى شهى ولذيذ – تتميز طريقتى بخلوها من المواد الحافظة طبعاً وبالطعامة الرهييييييبة!

المقادير (تكفى 10 برجرات)

  • نصف كيلو لحم كندوز مفروم بالدهن
  • ربع كيلو بصل
  • معلقة صغيرة ونصف ملح
  • معلقة صغيرة ملح صينى
  • معلقة صغيرة ورق لورا مطحون
  • نصف معلقة صغيرة كبابة صينى جب
  • نصف معلقة صغيرة فلفل اسود حب
  • 5 فصوص قرنفل
  • ثمن معلقة صغيرة قرفة
  • ثمن معلقة صغيرة شطة
  • معلقة كبيرة خل
  • معلقتين كبار زيت
  • 1 بيضة
  • معلقة كبيرة ثوم مهروس
  • معلقة كبيرة صلصة

الطريقة

  • نفرم البصل فى الكبة نبضات وليس متواصل – لنحصل على فرم خشن
  • نطحن التوابل الصحيحة في مطحنة التوابل
  • نخلط البصل مع اللحمة والتوابل  فى طبق كبير ونضيف باقي المقاديرونعجنهم مع بعض باليد كويس قوى
  • نترك الطبق فى الثلاجة بضعة ساعات او ليلة ليتماسك اللحم
  • نضع طاسة تيفال على نار متوسطة
  • نقسم اللحم الى 10 كور – ثم نضع بعض الكرات في الطاسة ونضغط خفيف بظهر معلقة لنفردها على شكل قرص برجر – ثم نغطي الطاسة ونتركها 3 دقائق
  • نقلب البرجر على ظهره بمعلقة خشب او سباتيولا سيليكون – ونغطيه على النار 3 دقائق اخرى
  • تقدم ساخنة مع كتشب وخس ومايونيز او طحينة – او تقدم مع طبق خضروات (كوسة – سبانخ – فاصوليا – بسلة .. الخ)

لمعرفة طريقة جميلة لسلطة الطحينة اضغط هنا

مقادير صوص البرجر اللذيذ

  • كوب زيت
  • 1 صفار بيضة
  • 3 ملعقة كبيرة خل او عصير ليمون
  • نصف ملعقة صغيرة ملح
  • نصف ملعقة صغيرة فلفل
  • 2 ملعقة كبيرة كتشب
  • 2 ملعقة كبيرة مستردة
  • ربع ملعقة صغيرة بودرة ثوم
  • 4 حلقات خيار مخلل

تضرب كل مكونات الصوص فى الخلاط – ويا سلام لو عندك زجاجة كتشب او مستردة بلاستيك فاضية من النوع اللى له بوز رفيع – نملاها بالصوص بتاعنا وعند الاستخدام نضغط على الزجاجة فتنزل الصوص فى السندوتش بسهولة وبيد واحدة بدل غلبة استخدام معلقة وبرطمان وغطا وايدينا الاتنين
جمال الصوص دة انه بيجمع بين الكتشب والمستردة والمايونيز كلهم فى ضغطة واحدة سريعة وسهلة

استغنوا بوصفتى عن البرجر الجاهز فهو مقلب كما كتبت من قبل – اقرأ التفاصيل بالضغط هنا

أضف تعليق

كن أوّل من يعلّق

avatar
‫wpDiscuz