لحمه كباب حله بطعم الكباب بجد

كلنا عارفين لحمة كباب الحلة وعارفين ان كلمة كباب هنا مجازيه مش معناها ان اللحمه طعمها كباب طبعا . لكن ايه رايكم لو قلت لكم ان عندي لكم طريقه تخلي اللحمه طعمها كباب بجد . بدون شوايه ولا وجع دماغ

الطريقه سهله جدا ومش محتاجه غير ان يكون عندنا علبة تونه فاضيه و قطعتين فحم

الطريقة

نضع مكعبات اللحم في حله ويفضل انها لو مكعبات كبيره نقطعها اتنين او تلاته عشان ماتبقاش تخينه اوي و نقلب معها  البصل والبهارات بتاعتنا و ملح وليمون وخل ونسيبها في الثلاجه ليله

مش لازم تكون اللحمه نوع معين ممكن ضاني أو من البتلو او الكندوز. ممكن تكون  بلدي او لحمه برازيلي يعني مش هتفرق. المهم تبات ليلة في الليمون والخل والبصل والملح والتوابل

في اليوم التالي نخرج حله اللحمه من الثلاجه ونضع في وسطها علبه التونه الفاضيه في قعر الحله بحيث تبقى قطع اللحم حواليها

ونجيب قطعتين الفحم نسخنهم على البوتاجاز لغايه ما يحمرو كويس و بالمساكة نحطهم في علبه التونه الفاضية

ونبدا نهوي جامد على الفحم بقطعه كرتون لغايه ما يحمر كويس اوى ويقرب يطلع لهب. ساعتها هنجيب معلقه زيت نرشها على الفحم

حنلاقي فورا دخان ابيض بدا يطلع من الفحم.  نروح مغطيين الحله بسرعه عشان نكتم الدخان جوه الحله

و بعد خمس دقايق لما الدخان يتوقف نطلع  الفحم ثاني ونسخنه من جديد على النار ونكرر نفس الخطوه السابقه

بعد خمس دقايق كمان لما الدخان يخلص نبدا نولع بقى على الحله وهي متغطيه نار هاديه جدا شمعة لمده من تلات الى خمس ساعات حسب نوع اللحمه

الطريقه دي مش هنستخدم فيها ميه خالص ولا نقطه. اللحمه حتستوي في البهريز بتاعها لغايه ما تتشرب البهريز وتبقى بدون سوائل. اما لو عايزين نستفيد من شوربتها فممكن قبل ما البهريز ينشف ناخده نعمل اللي احنا عايزينه بيه

حتلاقوا اللحمه لذيذه جدا نفس طعم الكباب كل ده بفضل دخان الفحم اللي كتمناه في حله

و انا اكتشفت ان الطريقه دي متنفعش لو عملنا خطوه الفحم بعد ما اللحمه تستوي زي ما بيتقال في الوصفات المنتشره في مواقع كثير جدا على النت وعلى يوتيوب. في الحاله دي ما بتاخدش طعم الفحم خالص. اكتشفت من تجاربى ان عشان تاخد طعم الفحم لازم تكون اللحمه نيه قبل ما تستوى. كده بتتشرب ريحه الفحم كويس جدا. وبعد كده نبدأ بقى نسويها براحتنا هتفضل محتفظه بريحه الشوي و مش هتروح منها

جربوا الطريقه دي وان شاء الله حتدعولي

وبالف هنا وشفا

 

أضف تعليق

كن أوّل من يعلّق

avatar
‫wpDiscuz