كفتة ارز عالبخار – بانيه

اليكم طريقة عرفتها من أحد أعز اصدقائي – حكى لي ان والدته كانت بتعملها لهم وكان طعمها تحفة

هي تشبه كفتة الارز – المقادير هى نفسها مع فروق بسيطة –  لكن الفرق في طريقة التسوية – بنطهيها الاول على البخار وبعدين نضعها فى بيض وبقسماط ونحمرها بانيه – ودة سر مذاقها المميز

الكفتة دى اقتصادية وموفرة جدا – لان دى كمية حتدينا 2100جم كفتة تكفى لعمل 24 وجبة لفرد واحد – او 6 وجبات ل4 افراد – نقدر نقسمها فى اكياس ونحفظها فى الفريزر للمرات القادمة

المقادير

  • نصف كيلو لحمة مفرومة
  • ربع كيلو بصل
  • ربع كيلو ارز نى ناشف
  • 30جم بقدونس مفروم
  • معلقة صغيرة ثوم مهروس
  • روزمارى مطحون
  • ورق لورا مطحون
  • قرفة مطحونة
  • كبابة صيني مطحونة
  • ملح صينى MSG
  • معلقة كبيرة طحينة خام
  • عصير ليمونة
  • ملح
  • فلفل اسود

الطريقة

  • نقشر البصل ونخرطه ونقطع البقدونس قطع صغيرة ونضربهم قليلا نبضات مع الثوم والتوابل فى الكبة – عايزينهم فتافيت صغيرة لكن مش عصير
  • نطحن الارز ناشف كما هو – بدون غسيل – فى مطحنة التوابل 3 دقائق حتى يصبح ناعما
  • نضع الكل فى طبق واسع ونعجنهم باليد جيدا حتى يختلط الارز وباقي المكونات تماما مع الخلطة
  • نضع الطبق فى الثلاجة لمدة ساعتين على الاقل حتى تتماسك الخلطة
  • نشكل الخلطة صوابع فى ايدنا ونبططها ونرصها فى صينية ونضعها في حلة البخار – او نضعها فوق حلة بمقاس مناسب نغلي فيها ماء ونغطي الحلة حتى لا يهرب البخار
  • نجهز طبق به بيضة مضروبة مع قليل من الملح والفلفل وطبق آخر له بقسماط مطحون
  • بعد ان تستوى الكفتة على البخار نضعها في الثلاجة حتى تبرد
  • نضع كل كفتاية فى البيض ثم في البقسماط ونرصهم في طبق نعيده للثلاجة حتى تتماسك – حوالي ساعة او اكثر
  • نسخن قليل من الزيت فى طاسة
  • نحمر الكفتة فى الزيت الساخن علي نار متوسطة حتى يصبح لونها ذهبي
  • 7 دقائق فقط فى الزيت مع قلبها فى نصف الوقت (لو قعدت اكتر من كدة عصارة اللحمة حتتسرب منها وتفقد البهريز بتاعها فى الزيت فتقل طعامتها) ثم نخرجها من الطاسة ونتركها حتى تبرد

اقترح عليكم تقديمها مع مكرونة بالثوم والزيت و خيار مخلل او كرنب مخلل

وبالف هنا وشفا

أضف تعليق

كن أوّل من يعلّق

avatar
‫wpDiscuz