فراخ مشوية على الفحم سهلة جدًا

اضغط هنا

طبعاً كلنا عارفين ان الفراخ المشوية على الفحم طعمها خيالي ولا يعلى عليه – لكن المشكلة ان الشوى على الفحم متعب وغلبة – لكن أنا طورت طريقة سهلة بتجمع بين طعم الشوى على الفحم وبين سهولة فرن البوتاجاز

الطريقة ببساطة اننا حنبدأ بشوى الفراخ على الفحم لمدة ثلث ساعة فقط – عشان تتشرب طعم الفحم وفي نفس الوقت بنشمع الفرخة يعنى نخليها تحتفظ بالبهريز بتاعها عشان تبقى طرية ولذيذة – وبعدين نكمل سواها فى الفرن – عشان تستوى كويس بقى على مهلها من برة ومن جوة

  • أول حاجة نفتح الفرخة بمقص المطبخ من ظهرها – من عند العمود الفقري – ونكسر عظممها عشان تبقى مفرودة باننا نفردها على قرمة بحيث يبقى الجلد لفوق – ونغطيها بكيس بلاستيك وندق عليها بشاكوش فرد اللحمة او بايد هون او حتى بقبضة ايدنا
  • نعمل شقوق بالسكينة فى الفرخة عشان التتبيلة تتغلغل فيها
  • نتبل الفراخ قبلها بيوم بخلطة الشوى التالية :
    • معلقتين خل
    • نصف كوب ماء بصل (نضرب البصل مع الخل في الخلاط وبعدين نصفيه ونرمي التفل)
    • معلقة صلصة
    • عصير ليمونة
    • معلقتين زيت
    • معلقة صغيرة زنجبيل
    • ثوم مفروم
    • معلقة صغيرة كزبرة ناشفة
    • 2 معلقة صغيرة ملح
    • معلقة صغيرة فلفل
    • معلقة صغيرة بودرة ثوم
    • معلقة صغيرة كمون
    • معلقة صغيرة كاري او كركم
    • معلقة صغيرة زعتر
  • ونشيلها فى الثلاجة لليوم التالي
  • فى يوم الشوى نشعل فرن البوتاجاز فاضي على درجة 180 مئوية
  • نجيب بعض قطع الفحم ونحطها على النار عشان تحمر
  • انا عندي شواية صغيرة معدن بأحطها على عين البوتاجاز – وافرش قطع الفحم اللى احمرت فى قعر الشواية – لو مفيش شواية ممكن نجيب صينية المونيوم قديمة نحط فيها الفحم
  • وبعدين نحط شبكة معدن – مثلا الرف بتاع الفرن الكهربا – فوق الشواية او الصينية الالمونيوم – ونرص عليها الفرخة المتبلة
  • وأبدا أهوي على الفحم
  • كل دقيقتين او ثلاثة نقلب قطع الفراخ عشان متسودش مننا
  • نحضر صينية فرن بمقاس مناسب للشبكة ونملأ ثلثها بالماء
  • بعد حوالي 20 دقيقة ننقل الشبكة بالفراخ اللى عليها ونحطها على الصينية اللى فيها ماء وندخلها فى الفرن على الرف الأوسط
  • بعد نصف ساعة نخرج الصينية ونقلب الفراخ على ظهرها ثم ندخلها الفرن لمدة نصف ساعة أخرى – بعدها تكون الفراخ المشوية جاهزة
  • بهريز الفرخة اللي نزل في ماء الصينية نقدر نحتفظ به في كيس في الفريزر نستخدمه في اي وقت كشوربة فراخ – عند عمل محشي او شوربة كريمة دجاج

ريحة وطعم الفراخ بيبقى تحفة ولونها أحمر وبتلمع ولا أحلى مطعم مشويات – تبقى هايلة للعزومات ولجميع أفراد الأسرة

 

وبالف هنا وشفا

أضف تعليق

كن أوّل من يعلّق

avatar
‫wpDiscuz