طريقة تقطيع وتتبيل الفراخ المشوية بطريقة الكبابجية

لو عايزين نشوى فرخة وتطلع زى فراخ الكبابجى بالظبط حنبقى محتاجين الاول نفتحها على شكل الفراشة – الطريقة سهلة جدا – شاهدوا الفيديو التالى :

اضغط هنا

وبعدين نتبل الفراخ ليلة قبل الشوى – برضه الطريقة سهلة جداً :

مقادير تتبيله الكبابجية للفراخ المشوية

  • فرخة نقطعها نصفين كما فى الفيديو
  • نرفع الجلد من الجنب (لكن نتركه ماسك من الناحية الاخرى) ونعمل شقوق طولية عميقة فى اللحم اللى تحت الجلد
  • نضرب فى الخلاط 11 حاجة :
    • بصلة
    • طماطماية
    • 5 فصوص ثوم او معلقة كبيرة مهروس
    • ربع كوب خل
    • عصير نصف ليمونة
    • معلقة صغيرة روزمارى مطحون
    • معلقة صغيرة زعتر جاف
    • معلقة صغيرة شطة او قرن فلفل حامى
    • ملح وفلفل
    • معلقتين زيت (الافضل نضيفه فى وعاء التتبيل بعد الخلاط عشان منزفروش)
  • نحشى الشقوق اللى تحت الجلد بالتتبيلة وندهن اللحم وبعدين نغطى عليه بالجلد
  • ندهن جلد الفرخة من الخارج ايضاً بالتتبيلة
  • فى الاخر نضع الفرخة على ظهرها بحيث يكون الجلد لتحت فى حلة او صينية التتبيلة – ونضع المتبقى من التتبيلة فى التجويف الصدرى وفوق الوراك
  • نضعها فى الثلاجة لليوم التالى

اليوم التالى نقدر نشويها فى فرن البوتاجاز بحيث نضعها على شبكة تحتها صينية بها بعض الماء حتى لا تحترق – وندهن وش قطع الفراخ بفرشة زبدة وزيت متقلب فيه روزمارى مطحون وثوم مهروس وملح بسيط ومعلقة صغيرة صلصة – ونشغل الفرن على 180 لمدة 45 دقيقة ثم نقلبها على الوش التانى وندهن بالفرشة ونتركها فى الفرن لمدة 45 دقيقة برضه – وفى الاخر لومكانتش لسة خدت لون الشوى الاحمر نشغل الشواية العلوية للبوتاجاز 5 دقائق على كل جانب

صينية الماء اللى تحت الفرخة حيتجمع فيها بهريز الفراخ المشوية – ودى نقدر نستخدمها مثلا فى عمل احلى ملوخية ببهريز الفراخ المشوية – او ممكن نحط صينية بطاطس فرن تستوى تحت الفرخة وتتسقى ببهريزها – مع ملاحظة اننا نغطى الصينية الاول بورق فويل ونسويها على عين البوتاجاز – على نار اقل حاجة شمعة – ساعة قبل ما نبدأ خطوة الفرن – وبعدين نشيل الغطاء ونحطها تحت الفراخ ونبدأ نشويها – عشان ناكل بطاطس ناعمة زى الزبدة

مش حتصدقوا طعامة الفراخ المشوية بالطريقة دى – أحلى واطعم وانظف من أى فراخ مشوية جاهزة – ومستوية زى الزبدة.. بتدوب فى الفم ذوبان !

بالف هنا وشفا

 

أضف تعليق

كن أوّل من يعلّق

avatar
‫wpDiscuz