زراعة الحلبة سهل جدا فى اى بلكونة او شباك مشمس – العصافير والحمام واليمام بيحبوها قوى – حتاخد ثواب كل طائر ياكل منها

اما لو بتربى طيور زينة مثل البادجى او الكوكتيل مثلا فهم بيحبوا الحلبة جدا – وهى مفيدة ومغذية جدا ليهم – واحسن بكتير من أى خضرة تشتريها من السوق – لان احيانا بتكون مرشوشة وبتجيب لهم اسهال ومشاكل – ازرع لهم بنفسك اضمن وانظف بكثير بلا مبيدات ولا كيماويات – وبلا تكلفة

ازرع لهم حلبة فى قصرية او علبة بلاستيك وكل يوم خليهم ياكلوا منها زى ماهى – يعنى بدل ما تقطفها وتقدمها لهم : حط علبة الحلبة جوة البيت وبعدين وديهم عندها وسيبهم ياكلوا من اوراقها كل يوم شوية

وعلى فكرة الحلبة مفيدة جداً لنا ايضاً – خصوصا لمرضى السكر والكلى والكوليسترول والشرايين وامراض القلب والدم عموما

انا جبت طبق من بتوع الوجبات الجاهزة ولما فضى غسلته وحطيث فيه شوية طينة – ونقعت معلقتين كبار حلبة حصى فى كوب ماء

وبعد ما الحبة تنفش وتتشرب الماء – حوالى 6 ساعات – اخذت شوية طينة خلطتهم فى طبق مع الحلبة وبعدين بدرتهم على وش التربة بعد ما سقيتها ماء – وبعدين رشيت عليهم رزاز ماء ببخاخة

وكل يوم ارش عليهم ماء بالبخاخة واتأكد انه التربة مندية وما اسيبهاش تنشف

الحلبة بتنمو بسرعة وبكثافة خلال اسبوع وتفضل تعلى وتكبر

بعد ما الحلبة تظهر براعمها وتبدأ تكبر نراعى – مثل أى زرع – اننا دائما لا نسقيها ماء الا بعد ان تجف التربة – نلمس التربة بصباع ايدنا – لو حسينا انها ناشفة ومفيهاش اى رطوبة نسقيها (كثرة السقى هى السبب رقم 1 لتعفن الجذور ثم موت النباتات عند اغلب الناس)

جربوا تزرعوا حلبة وياريت تكتبولى النتيجة – وانا تحت امركوا فى اى اسئلة او مساعدة