الخميرة البلدى جنب بيتك

آخر تحديث : 13-12-2018 الساعة 10:30 ص

أى حد يقدر يحصل على خميرة برية بلدى معتقة بطريقة سهلة جداً – انا اكتشفت ان افران العيش البلدى الاسمر ابو 5 قروش ببطاقة التموين (وبيبيعوه بربع جنيه للى معندوش بطاقة ) اكتشفت ان الافران دى مش بتحط خميرة فى العجينة – انما كل يوم بياخدوا حتة من عجينة النهاردة يخمروا بيها عجينة لبكرة – وهكذا كل يوم

فى الفلاحين بيعملوا العيش الفلاحى بنفس الطريقة – بيعجنوا فى “ماجور” من الفخار – وبعد ما يخبزوا مش بيغسلوا الماجور – بيسيبوا بقايا العجينة العالقة فى جدار الماجور تنشف لغاية الخبيز التالى – ولما ييجوا يخبزوا بيدعكوا بقايا العجينة القديمة بشوية ماء ساخن ويضيفوا ماء العجبن والدقيق – اول مرة يخبزوا هى المرة الوحيدة اللى بيجيبوا فيها خميرة بلدى – بيجيبوها من اى جارة – وبعدين خلاص ميحتاجوش خميرة تانى ابدا

الطريقة دى اسمها فى الغرب old dough وفى فرنسا بيسموها pate fermente او chef وفى امريكا بيسموها mother dough او Mother

المهم اننا بكدة نقدر نحصل على خميرة برية بلدى باحدى طريقتين :

  • نشوف فرن بلدى جنبنا ونشترى منه رغيف نى قبل ما يدخل الفرن – ونحطه فى برطمان ونشيله فى الثلاجة – حتبقى هى دى الخميرة بتاعتنا دايماً نخبز بيها أى حاجة
    بس قبل ما نشترى نتأكد الاول من صاحب الفرن انه مش بيشترى قوالب خميرة بيرة ويحطها فى العجين – لازم نتأكد انه بيخمر العجين بتاعه من غير خميرة – بقطعة من عجين كل يوم لتخمير عجين اليوم التالى وهكذا
  • او نشوف أى فلاحة من اللى بيبيعوا العيش الفلاحى ونوصيها تجيب لنا المرة الجاية معاها حتة من عجينة العيش الفلاحى فى كيس بلاستيك
  • اما لو مفيش جنبك فرن بلدى ولا فلاحات بيبيعوا عيش فلاحى – فممكن تاخد منى خميرة برية طازجة جاهزة
  • وطبعا لو عندك صبر ممكن تعمل خميرة برية بنفسك من الصفر

بكدة نقدر يكون عندنا خميرة برية ومنحتاجش تانى نشترى أى خميرة

الخميرة البرية او البلدى بتعيش طول العمر ونقدر نخبز بيها دايما – وهى صحية جدا وكلها فوائد – بعكس الخميرة التجارية اللى كلنا بنستخدمها مفيهاش فوائد الخميرة البرية الغنية بحمض اللبنيك اللى بيقوى المناعة الطبيعية ويحسن جدا من عملية الهضم وكمان بينشط المخ ويساعده على اداء وظائف الادراك وفيه وقاية من الزهايمر وامراض الشيخوخة

طريقة الاستخدام

بعد الحصول على عجينة رغيف من فرن بلدي او ريفي ميكونش بيستخدم قوالب خميرة بيرة – نخبز بيها بدلا من الخميرة العادية – ولما العجينة تخمر وتبقى جاهزة – قبل ما نشكل العيش وندخله الفرن – نأخذ قطعة صغيرة من العجينة ونحفظها في برطمان بالثلاجة لاستخدام المرة القادمة كخميرة – وهكذا كل مرة نكرر نفس الطريقة

2 تعليقان

    • مش متأكد الحقيقة – لكن حتى لو بدأوها بخميرة بيرة اول مرة فمع الوقت اثرها حيقل وحتتكاثر مع الوقت بكتيريا لبنية كتير يوم ورا يوم
      ولو عايزة تاخدى منى هدية او تعمليها من الصفر زى منا عملت برضه ممكن – الرابط حطيتهولك فوق

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.