افران العيش البلدى لا تستخدم خميرة

بحكم تعودى على مذاق الخميرة البرية اللى باخبز بيها كل حاجة فى البيت – مثل بيتزا وعيش وتوست ومنين وبقسماط – اصبحت قادر على تمييز أى حاجة مخبوزة بخميرة برية

اضغط هنا

ولاحظت ان العيش اللى بيتباع فى بعض افران العيش البلدى فى مصر طعمه فيه مزازة جميلة – قلت الطعم دة مش غريب عليا – هل ممكن تكون الافران دى بتستخدم خميرة برية ؟

وخمنت انهم ممكن يكونوا بيخمروا عجينة العيش بطريقة “العجينة الام” (اللى بيسموها بالانجليزى mother dough او mother فقط – وبالاسبانى Masa Madre وبالفرنساوى pâte fermentée) – وهى طريقة بتستخدمها الافران الكبيرة العريقة فى الغرب – تتلخص فى انهم كل يوم ياخدوا قطعة عجينة خمرانة من اللى عملوا بيها العيش – ويستخدموها عند عمل عجينة لليوم التالى – وهكذا كل يوم

انا خمنت ان الافران البلدى ممكن تكون بتستخدم الطريقة دى لان فيها وفر لصاحب الفرن لانه مش محتاج يشترى قوالب خميرة كل يوم (خميرة بيرة) – لكن الاهم ان الطريقة دى تعطى للعيش فوائد صحية هائلة نتيجة لان العجينة لما تبات بتتكائر فيها البكتيريا اللبنية lactic acid bacteria او LAB وهى بكتيريا مفيدة جدا للجهاز الهضمى ومفيدة ايضا للمخ ووظائف الادراك ووقاية من امراض الشيخوخة المرتبطة بالمخ كالزهايمر وغيره – بحسب احدث الدراسات العلمية

وكمان انا عرفت معلومة مهمة وهى ان الفلاحين لما يخبزوا عيش فلاحى بيتركوا الوعاء اللى عجنوا فيه – بيسموه ماجور – بيتركوه بدون غسيل – وتظل بقايا العجينة ملتصقة بداخله ويتركوها تنشف لغاية لما يعوزوا يخبزوا تانى يحطوا شوية ماء يمسحوا بيها الماجور عشان بقايا العجينة القديمة تفك وتطرى ويستخدموها كخميرة للعجينة الجديدة – وهكذا كل مرة

وبما ان كثير من الافران البلدى اصحابها اصلاً من الصعيد ومن الارياف – لذلك قلت ان استخدامهم للطريقة دى وارد جداً

لذلك قررت اسأل بنفسى – وبالفعل اليوم بعد ما اشتريت عيش بلدى من الفرن المجاور لى سألت صاحب المخبز فاذا به يؤكد تخمينى – فقد قال لى انهم لا يستخدمون قوالب خميرة ولكن يخبزون بقطعة عجينة من اليوم السابق وأعطانى رغيفين من طاولة العيش قبل ان يدخلوا الفرن مباشرةً – هذه هى بالظبط طريقة العجينة الام – واستطيع الان ان استخدمها لتخمير ما اريد فى المنزل او الاحتفاظ بها فى الثلاجة لحين الاستخدام

هل يا ترى جميع الافران البلدى تتبع نفس الطريقة فى العجين بتاعهم ؟
المعلومة دى لو تأكدت صحتها من اكثر من مخبز بلدى يبقى العيش البلدى فى مصر مفيد جدا صحيا وعلينا كلنا ان نشتريه بدلا من العيش الفينو والشامى والتوست والكايزر وجميع انواع الخبز الاخرى

ياريت كل اللى بجواره فرن بلدى يسألهم هذا السؤال حتى نستطيع ان نعرف اذا كانت كل الافران تستخدم نفس الطريقة ام لا – افران العيش البلدى فقط – اما الفرن الافرنجى اللى بيعمل فينو فانا عارف انه بيستخدم قوالب خميرة بيرة على طول – ودة لانه بيفتح 24 ساعة ومعندوش وقت كافى يحضر عجينة ويبيتها قبلها بليلة

ياريت اللى يعرف من اى فرن عيش بلدى يكتب لنا تعليق هنا يعرفنا

لو الموضوع نال اعجابك اضغط هنا لدعم الكاتب (جزاكم الله خيراً)

أضف تعليق

كن أوّل من يعلّق

avatar
‫wpDiscuz